ናብ ሎሚ ሰንበት 19 ሚያዝያ ኣብ ዘውግሐ ለይቲ 700 ኣፍሪቃውያን ስደተኛታት ጽዒና ካብ ሊብያ ናብ ዓዲ ጥልያን እትጓዓዝ ዝነበረት ጃልባ ኣስታት 17 ማይልስ ድሕሪ ምጕዓዛ ኣብ ማእከላይ ባሕሪ ብምጥሓላ ኣስታት 700 ኣፍሪቃውያን ስደተኛታት ኣብ ባሕሪ ጥሒሎም ከምዝሃለቑ ላዕለዋይ ኮምሽነር ስደተኛታት ውድብ ሕቡራት ኣህገራት ኣፍሊጡ።

ህጹጽ ናይ ህይወት ኣድሕን ኣዋጅ ፍርቂ ለይቲ ምስ ተኣወጀ፣ ሓንቲ መርከብ ከተድሕኖም ከምዝተላእከት፣ እንተኾነ እቶም ኣብ ጭንቀት ዝነበሩ ስደተኛታት እታ መርከብ ናብ እትመጽኣሉ ዝነበረት ወገን ብሓንሳብ ብምዝባሎም እታ ጃልባ ተገምጢላ ከምዝጠሓሉ ሓለዋ ባሕሪ ዓዲ ጥልያን ምሕባሮም ተጠቒሱ።

ካብቲ ሓደጋ 28 ሰባት ኳ እንተደሓኑ፣ እቶም ተረፉ ብምሉኦም ከምዝሞቱ ይሕበር። ዛጊት 24 ሬሳታት ተረኺቡ ኣሎ።

እዚ ዘሕዝን ሓደጋ ‘ዚ ኣብ ዝሓለፉ ዓሰርተታት ዓመታት ኣብ ማእከላይ ባሕሪ ካብ ዘጋጠሙ ጃምላዊ ህልቂታት ስደተኛታት እቲ ዝኸበደ ህልቂት ምዃኑ ይንገረሉ።

ኣባል ፓርላማ ማልታ ጆሴፍ ሙስካት ናይ ድሕነት ሰራሕተኛታት ኣብዚ እዋን ‘ዚ ካብቶም ጸምበለል ዝብሉ ዘለዉ ሬሳታት ትንፋስ ዘለዎም ሰባት ኣብ ምልላይ ከምዝርከቡ ኣገንዚቡ። ድሕሪ’ዚ ዝተርፍ ስራሕ ናይ ኣማኢት ሬሳታት ካብ ባሕሪ ምዝቋቝ ጥራይ እዩ ክኸውን ክብል ንኣሰካቕነት ናይቲ ሓደጋ ገሊጹዎ።

“ሕጂ ኣብ ቅድሚ ዓይንና እንርእዮ ዘለና መግለጺ ዘይብሉ ትራጀዲ እዩ፣ ኤውሮጳን ማሕበረሰብ ዓለምን ነዚ ትራጀዲ ‘ዚ ዓይኖም ዓሚቶም እንተሓሊፎሞ፣ ልክዕ ከምቲ ኣብ ዝሓለፈ ዘመን ኣብ ልዕሊ ሰብኣውነት ንዝተፈጸሙ ህልቂታት ዓይኖም ዓሚቶም ብምላፎም ዘጋጠሞም ታሪኻዊ ፍርዲ፣ ሕጂ ውን ብታሪኽ ክፍረዱ እዮም’ ክብል ‘ውን ንቢቢሲ ሓቢሩ።

ኣብ ዝሓለፈ ክልተ ሰሙን ብተመሳሳሊ መንገዲ ህይወት 400 ኣፍሪቃውያን ስደተኛታት ኣብ ሓደ እዋን ምጥፍኡ ይፍለጥ።

ነዚ ናይ ሕጂ ህልቂት ደሚርካ ኣብዘን ዚሓለፈ ሒደት ኣዋርሕ ናይዛ ሓዳስ ዓመት ልዕሊ 1500 ስደተኛታት ኣብ ማእከላይ ባሕሪ ጥሒሎም ኣለዉ።