ስርዓት ህግደፍ ብድፍኢትን ተጽዕኖን ገዳማት ኤርትራ፥ ነቶም ወኪላቱን መጋበርያታቱን ገይሩ ኣብ ቤት ጽሕፈት ኦርቶዶክስ ቤተ ክርስቲያን ዘጽንሖም ክልተ ካድራት  ዮፍታሄ ድሜትሮስን ሃብቶም ርእሶምን ካብ ሎሚ ጥቅምቲ 9, 2014 ካብ ስራሕ ኣባሪርዎም።

እዞም ምሕረትን ሓልዮትን ዘይብሎም ኣዛብእ፥ ሞባእ ቤተ ክርስቲያን እናሸምጠጡ፥ ቤተ ክርስቲያን ተዋህዶ መሕብኢ ጎሓሉን ካድራት ህግደፍን ገይሮማ ዝጸንሑ እዮም።

ናይ ኦርቶዶክስ ዓበይቲ ገዳማትን ሓለፍቲ ቤተ ክህነትን ካብ ዝሓለፈ ክልተ ኣዋርሕ ጀሚሮም፥ በብገዳማቶም ተኣኪቦም፥ ኣብ ርእሲ እቲ ፓትርያርክ ኣቡነ እንጦንዮስ ኣብ ልዕሊ ዮፍታሄ ድመጥሮስን ሃብቶም ርእሶምን ዘንበርዎ ውግዘት ተወሳኺ ናይ ሓባር ውግዘት ገይሮም፥ እዞም በላዕቲ ሞባእ ካብ ቤተ ክርስትያን ክእለዩ ንመራሒ ህግደፍ ብጽሑፍ ኣቕሪቦም።

በዚ ዝረዓደ ስርዓት ህግደፍ፥ ንዮፍታሄ ማንም ዝትንክፈካ የለን ዝብል መብጽዓን ተስፋን ሂብዎ ድሕሪ ምጽናሕ፥ ሎሚ ንጉሆ ዮፍታሄ ይኹን ሃብቶም ዘይተጸበይዎ፥ ኣብ ቤት ጽሕፈቶም ምስ ኣተዉ፥ ጀነራል ኣብርሃ ካሳን፥ ሓላፊ ሃይማኖታዊ ጉዳያት ኮሎኔል ሰመረ በይንን ብምዃን፥ ኣኼባ ከም ዘሎ መጸዋዕታ ኣመሓላሊፎም።

ኣብቲ ጳጳሳት፥ ዮፍታሄን ሃብቶምን ዝተሳተፉሉ፥ ጀነራል ኣብርሃ ካሳ፥ ኣብ መግለጺኡ፥ “ኣብ ውሽጥን ወጻእን ዝርከብ ህዝብና ብሰንክኹም ፋሕፋሕ ኢሉ ገዳማትን ኣድባራትን ብኩሉ ስራሕኩም ጉህዮምን ሓዚኖምን እዮም። ስለዚ ካብዛ ሰዓት እዚኣ ኣብዚ ከባቢ ቤት ጽሕፈት ከይትረኣዩ፥ ዘሎኩም ንብረት ብምዱብ ክሳብ ዝመሓላለፍ ኩሉ ተዓጽዩ ክጸንሕ ኢሎም ናይ ቃል መምርሒ ድሕሪ ምሃብ፥ ነቲ ጉባኤ ዛዚሞሞ።

ጀነራል ኣብርሃ ካሳን ኮሎኔል ሰመረ በይንን፥ ምስ ዮፍታሄ፥ ሃብቶምን ቀሺ ሳሙኤል ጸጋይን ኢድን ጓንትን ኮይኖም፥ ሞባኣን ሃብታን ክብዝብዙን ክዘምትኑ ዝጸንሑ፥ ጊዜን ኩነታትን ምስ ጸንከረ፥ ናይዚ ኩሉ ኣበሳን ገበንን ግዕዘይን ተሰከምቲ ነዞም ክልተ ሰባት በጊዕ ፋሲካ ገይሮም ነብሶም ነጻ ንምውጽእ ዝመሃዝዎ ተንኮል እዩ።

ህዝብና በዚ ክህመል ኣይግባእን፥ እቲ ፖለቲካዊ ሓይሊ ኢዱ ካብ ቤተ ክርስቲያን ክሳብ ዘየውጽአ፥ ነቶም ሕጋዊን ቅዱስን ፓትራይርክ ኣቡነ እንጦንዮስ ኣብ ቦትኦም ክሳብ ዘይመለሰ፥ ነገሩ ወጮ እንተ ገልበጥካዮ ወጮ፥ ስለ ዝኾነ፥ ዮፍታሄ እንተ ኸደ ካልእ ዮፍታሄ ይመጽእ። ዮፍታሄ ግበር ኣኽፍእ ጸይቕ፥ ኣእስር ጭወ ዝተባህሎ ገበረ እምበር ካብ ርእሱ ዝመሃዞ ኣይኮነን።

ህዝቢ ተዋህዶ ግን ናይ ሃማኖትና ግህሰት ክሳብ ዝዕገት ናይ ፓትርያርክና ምድፋርን ማእሰርትን ምዕለቢ ክሳብ ዝርከበሉ፥ እዞም ክልተ መንደዓት ቤተ ክርስቲያን ካብ ዝባና ወሪዶሙላ ማለት ኩሉ ሕማማ ተወጊዱላ ማለት ከም ዘይኮነ ክግንዘብዎ ይግባእ።

ግዱሳት ካብ ኤርትራ።