ህጹጽ ዜና ኣሰና – ኣብ ቦር ደቡብ ሱዳን፣ ኣብ ከባቢ ናይቲ ልዕሊ 450 ኤርትራውያን ዝርከቡዎም ዓሰርተታት ኣሽሓት ስደተኛታት ተዓቝቦምሉ ዘለዉ ቀጽሪ ውድብ ሕቡራት ሃገራት ጽዑቕ ቶኽሲ ክስማዕ ጀሚሩ ከምዘሎ ቅድሚ ፍርቂ ሰዓት ደዊልና ኣብ ዝገበርናዮ ናይ ቴለፎን ዝርርብ ኣረጋጊጽና።

እቲ ቶኽሲ ኣብ ዝስመዓሉ ዘሎ እዋን፣ ቆልዓ ሰበይቲ ተሰናቢዶም ጫቝጫቝ ክብሉ ውን ይስማዕ። ዛጊት ክሳብ’ቲ ቴለፎን ንዛራረበሉ ዝነበርና ግዜ ኣብ ሰብ ዝበጽሐ ጉድኣት ኳ እንተዘይተፈልጠ፣ ሓደገኛነት ናይቲ ኩነታት ኣዝዩ ርኡይ ኮይኑ ‘ሎ።

እቶም ኣብቲ መዓስከር ዝርከቡ ኤርትራውያን፣ ዕጡቓት ሰባት ናብቲ ህዝቢ ተዓቝቡሉ ዘሎ ቦታ ይኣትዉ ምህላዎም ደጊሞም ኣረጋጊጾም። ጥምየትን ጽምእን ሕማምን ኣንጸኣልዩዎም ከምዘሎ ‘ውን ተፈሊጡ።

ብዘይካዚ፣ ኣብ ካልእ ማላካል እትብሃል ከተማ ዝርከቡ ካብ 300-400 ኤርትራውያን ኣብቲ ዞባ ሎሚ ብዝተወዓወዐ ወጥሪ ኣብ ከቢድ ጸገም ከምዝርከቡ፣ ብቴለፎን ካብቲ ቦታ ዝደወሉልና ኤርትራውያን ኣፍሊጦም። ኣብ ጎደናታት ቶኽሲ ስለዘሎ ክጥርነፉን ናብ መዕቆቢ ቦታታት ክኸዱን ‘ውን ዕድል ኣይረኸቡን። ኣብ ገገዘኦም ኮይኖም እዮም ዝጽልዩ ዘለዉ።

ብዘይካ ‘ዚ ኣብታ ‘ዩኒቲ ስቴት’ እትብሃል ኣውራጃ፣ ኣብ ባንቲ እትብሃል ዋና ከተማ ኣብ ቀጽሪ ውድብ ሕቡራት ሃገራት ልዕሊ 170፣ ኣብ ካልኦት ናእሽቱ ከተማታት፣ ሳርያን 12፣ ኢባ 40፣ መዮም 15፣ ላሎብ 6፣ ኮች 4 ኤርትራውያን ኣብ ሓደገኛ ኩነታት ከምዝርከቡ ሓቢሮምና ኣለዉ።

መብዛሕትኦም ኣብቲ ናይ ነዳዲ ዕደና ዝካየደሉ ቦታታት ንስራሕ ዚወፈሩ ክኾኑ ከለዉ ገለ ድማ ምስ ቆልዓ ሰበይቶም ኣብቲ ከባቢ ንግዳዊ ንጥፈታት እናካየዱ ዝነብሩ ዝነበሩ እዮም።

ኩሎም ከኣ፣ ህይወቶም ንምድሓን ህጹጽ ሓገዝ ክግበረሎም ይጽውዑ።