ህጹጽ ዜና፣ ኣብ ዶባት ኤርትራን ኢትዮጵያን፣ ብወገን ጸሮና፣ ካብ ሎሚ ወጋሕታ ጀሚሩ ንሓያለ ሰዓታት ብርቱዕ ውግእ ከምዝተኻየደ ምንጭታት ሓቢሮም።

ካብ ሎሚ ወጋሕታ 12 ሰነ 2016 ጀሚሩ፣ ኣብ ዶባት ኤርትራን ኢትዮጵያን፣ ብወገን ጸሮና ሂደት ኪሎሜተራት ናብ ዶባት ቅድም ኢሉ፣ ንሓያለ ሰዓታት ዝቐጸለ ብርቱዕ ውግእ ከምዝተኻየደ ምንጭታት ሓቢሮም።

እቲ ኣጋር ሰራዊትን ከበድቲ ጽዋርን ዝተሳተፉዎ ውግእ፣ ብዓይነቱን ዓቐኑን ካብቲ ኣብ ዶባት ሓሓሊፉ ዘጋጥም ግጭትን ቶኽስን ኣዝዩ ዝተፈልየ ምዃኑ ክፍለጥ ተኻኢሉ።

ሰራዊት ኢትዮጵያ ንከባቢ ኣኽራን ተቖጻጺሩ፣ ናብ ዑና ይስሓቕ ዝብሃል ዓዲ ገጹ ይግስግስ ምህላዉ፣ ከቢድ ብረት ‘ውን ንከተማ ጾሮና ሓሊፉ ኣብ ውሽጢ ኤርትራ ከምዝዓለበ እቲ ሓበሬታ ብተወሳኺ የረድእ። ብፍላይ ከቢድ ብረት ኣብዚ ዳሕረዋይ ሰዓታት ዝግ ኢሉ ኳ እንተሎ፣ ገስጋስ ሰራዊት ኢትዮጵያ ይቕጽል ከምዘሎ እቲ ሓበሬታ የመልክት። እቲ ውግእ ደው ከምዝበለ ድማ መረጋገጺ የልቦን።

ኣብ ዶባት ዝርከብ ህዝብና ኣብ ሻቕሎት ከምዝርከብ ድማ ተፈሊጡ።

ኣብዚ እዋን’ዚ ኣብ ሰብን ንብረትን ብዛዕባ ዝወረደ ጉድኣት ዝተረኽበ ሓበሬታ የለን።

ነቲ ውግእ መን ከምዝጀመሮ ‘ኳ ዛጊት ንጹር ሓበሬታ እንተዘይረኽበ፣ ብወገን ኢትዮጵያን ኤርትራን ኣብ ዶባት ጽዑቕ ወተሃደራዊ ምድላዋት ክግበር ጸኒሑ እዩ።

እቲ ንመንእሰያት ናብ ስደት ከምዝበታተኑ ብምግባር ንሓይልታት ምልክልኻል ኤርትራ ዘቖንቆኖ ምልካዊ ስርዓት ኢሳይያስ፣ ካብ ሰራዊት ብሓፈሻ ሓቢኡ ብፍላይ ንኣዘዝቲ ሰራዊት ነዚ ወተሃደራዊ ኩነታት ብስምጢር ኣቐዲሙ ሓቢሩዎም እዩ።

ክቡራት ሰማዕትና ዝያዳ ሓበሬታ ኣብ ዝረኸብናሉ ሰዓት ዝተማልአ ሓበሬታን ምዕባለታት ናይዚ ኩነታትን ከነስዕበልኩም ኢና።