ከመይ ትቕንዩ ክቡራት ኤርትራውያን!

ሎሚ ሃገርና ኣብ ሓደ ወሳኒ መሰጋገሪ መድረኽ ትርከብ ኣላ። ኢሳያስ እቲ ንሃገርናን ህዝብናን ከም ሕሱም ዘድመየ፡ ንመንእሰያትና ባዕሉ ኣብ ዝጻሕተሮ ኵናት ዝጠበሰ፡ ናብ ሳሃራን መዓምቝ ባሕርን ዘጥሓለ፡ ንዓበይቲ ዓዲ ዝመቝሐ፡ ንኤርትራውያን ኣዴታት ዝዘለፈ ገበነኛ መራሒ ስለምንታይ ከምኡ ክገብር ክኢሉ ዝብል ሕቶ ክነልዕል ግድነት’ዩ። ኢሳያስ ክሳብ ክንድዚ ኣብ ልዕለና ሸይሸይ ክብል ዝኸኣለ፡ ብስንኪ ዘይምሕባርናን ስንፍናናን ጥራይ’ዩ። ኢሳያስ ሓደ ውልቀሰብ ክነሱ ዝመስሉዎ ሰባት ወዲቡ ንኣስታት ሽዱሽተ ሚልዮን ህዝቢ ንዕስራ ዓመታት ከም ኵዕሶ ክጻወተልና ክኢሉ። እቲ ዘገርም! ልክዕ ነዛ ዓንቀጽ’ዚኣ እናጸሓፍኩ ከለኹ ሓደ መንእሰይ ኣብ ፓልቶክ ንመሪር ኵነታት ሃገርና ኣመልኪቱ፡ “ኣይተዓደልናን!” ክብል ሰሚዐዮ። ነቲ ሓው ንምውቃስ ዘይኮነ ኣይተዓደልናን ኢልካ ምዝራብ፡ ንድኻምካ ክትሽፍን ምፍታን ጥራይ ኮይኑ ይስምዓኒ። ንሕና ከም ህዝቢ መጠን ሓውና እናተበደለ ያዕ! ኢልናዶ? ብጨካን ስርዓት ኢሳያስ ኣብ ልዕሊ ንጹሃት ዜጋታት ግፍዕን በደልን ክፍጸም ከሎ ተቓውሞ ኣርኢናዶ? ዝብል ሕቶ ብኣሉታ’ዩ ዝምለስ። ካብዚ ታሪኻዊ ሓላፍነት’ዚ ድማ ከቶ ክነምልጥ ኣይንኽእልን። ብዝኾነ ብዛዕባ ሕሉፍ ካብ ዝግባእ ንላዕሊ ምዝራብ ፍረ ስለ ዘይህልዎ፡ ናብቲ ሕጂ ከጋጥመና ዝኽእል ብድሆን ዕማምን ክነተኵር ዝሓሸ ኮይኑ ይስምዓኒ።

ኣብዚ ተኣፋፊ እዋን’ዚ ብዙሓት ሰባት ኢሳያስ ኣብ ኣፍደገ ሞት ስለ ዘሎ ወይ’ውን ብወግዒኳ እንተ ዘይተገልጸ ስለ ዝሞተ ኣብ ሓጐስን ደስታን ይገልጹ ኣለዉ። ሓጐስካ ክትገልጽ ንቡር ይመስለኒ። ግንከ፡ ሕጂ ናይ ደስታን ዳንኬራን ግዜ ኣይኮነን። ነቶም ኢሳያስ ዘህለቖም ግዳያት ንዝክረሉ ግዜ፡ ሃገር ናበይ ገጻ ክትከይድ ከም ዘለዋ ንቕይሰሉ፡ ሓደ ጨካን ውልቀመላኺ ንዕስራ ዓመታት ዝተጻወተላ ሃገር ትትስኣሉ፡ ሃገርና ውሑዳት ኣድብዮም ናይ ዝጽበዩ ሰባት ግዳይ ከይትኸውን ኣዒንትና ቋሕ ክነብል፡ ኣእዛንና ክንከፍት፡ ሓንጐልና ድማ ካብ ክርቢት ንላዕሊ ክነንጥፎ ይግብኣና።

ክቡራት ኤርትራውያን ሃገራውያን! ኣብዚ እዋን’ዚ ዘድልየና ሰልፈይ ሰልፍኻ፡ ጕጅለይ ጕጅለኻ፡ ሃይማኖተይ ሃይማኖትካ፡ ወገነይ ወገንካ ዘይኮነ ንኤርትራ ብምቕዳም ሓቢርና ንቕድሚት ንስጕመሉ ኣገባብ ክንፈጥር ግድነት’ዩ። ኤርትራውያን ብፍጥረትና ኣብ ጐነጽ ኣይንኣምንን ኢና። ህዝብና፡ ድሕሪ ናይ ዕስራ ዓመታት ዘመነ ፖለቲካዊ ሕንፍሽፍሽ፡ ናይ ሰላሳ ዓመታት ደማዊ ኵናት፡ ናይ ዕስራን ሓደን ዓመታት ስርዓት ኣልቦነት ዝዓበለሎ ብግፍዒ፡ ህልቂት፡ ስደትን ዝተሰነየ ህይወት ውግእን ወረ ውግእን ዒፍ ከም ዝበሎ ዝስሕቶ ሰብ ዘሎ ኣይመስለንን። ስለ ዝኾነ፡ ባህጉን ሃንቀውታኡን ንሰላም፡ ንምዕባለ፡ ንሕውነትን ፍቕርን ዘተኣናግድ ልቦና እንተ ዘይኮይኑ፡ ንኣፈላላይ፡ ግርጭት፡ ህውከትን ናይ ስልጣን ቍርቍስን ዕድል ዝህብ ዕላማ የብሉን። ዝኾነ ጕጅለ፡ ማሕበር፡ ሰልፊ፡ ውድብ ወይ ምትእኽኻብ ናይ ሰባት ብዘይ ድሌትን ፍቓድን ናይ ህዝቢ ናብ ስልጣን ክድይብ ምስ ዝፍትን ብትሪ ክንቃወሞን ናብ ልቡ ክንመልሶን ከም ዝግብኣና ንፍለጥ። ቅድሚ ሕጂ ብውልቀመላኺ ኢሳያስ ዝተሃመልናዮ ኣስካሕካሒ ወቕቲ ብምዝካር፡ ነዚ ኣማእት ኣሽሓት ዜጋታት ዘህለቐ ስርዓት ዝመሳሰል፡ ብዘይ ፍቓድ ህዝቢ ኣብ ስልጣን ክድይብ ንዝደሊ ጕጅለ ኣይፋል! ክንብል ደም ስዉኣት ይሓተና ኣሎ።

እቲ ግዜ ናይ ሸለልትነት፡ ናይ ጥቕመይ ጥቕምኻ ወይ ብውልቃዊ ጕዳይ ንሃስበሉ ግዜ ኣይኮነን። ሓደ ህዝቢ ወይ ሓደ ሰብ ሓንሳብ ክጋገ ይኽእል’ዩ። ካልኣይ ግዜውን ክጋገ ይኽእል ይኸውን። ካብኡ ንላዕሊ ዝጋገ እንተ ኾይኑ ግን ምስ ሰብ ዘይኮነ ምስ ትሕቲ እንስሳ’ውን ክቝጸር ይኽእል። ዘበን ግርህነት ኣብቂዑ ብኣተኵሮን ብብልሕን ንሓስበሉ ግዜ በጺሕና ኣለና። ስለዚ፡ ቅድሚ ሕጂ ዝተደናገርናዮን ዝተታለልናዮን ግዜ ናይ ኣሽሓት ዜጋታት መቕዘፍቲ ስለ ዝሓተተና፡ ዳግማይ ብታሪኽ ከይንሕተት ነገራት ናበይ ገጾም ይጐዓዙ ከም ዘለዉ ክነስተብህል ኣለና። ኣብዚ ተኣፋፊ ወቕት’ዚ፡ ኢሳያስ እንተ ሞይቱ ኣብ ኤርትራ ሃጓፍ ክፍተርን ህውከት ክለዓልን’ዩ፡ ኤርትራ ናብ ሶማል ክትቅየር’ያ፡ ህዝቢ ክበታተን’ዩ ወዘተ ብዝብል ከንቱ ፕሮፓጋንዳ ንለውጢ ከም ዘይትብህግ ክገብሩኻ ዘይፈተኑ ኣይኮኑን። ብኻልእ ሸነኽ’ኮ ኤርትራ ካብ ህውከትን ምጕጅጃልን ኣይደሓነትን። ክንደይ ካብ ህዝባ ብምልቝ ምልቝን ብሰላሕታን ዘይጠፍአ! ክንደይ መንእሰይ ዘይተረሸነ፡ ክንደይ ብተመልከተለይ ዘይተቘልበ፡ ክንደይ ኣብ ባሕሪ ዘይጠሓለ፡ ክንደይከ ኣብ ምድረበዳ ዘይጸነተ፡ ግዳይ መሸጣ ኣካላት ዘይኮነ! ክንደይከ ብወገነይ ወገንካ ዘይተፈላለየ፡ ክንደይ ኣሽሓት ዘይጠፍኡ! ሓደ ክፍለጥ ዘለዎ ሓቂ ኣሎ። ንሱ ድማ ኤርትራ ፋሕ ትብል እንተ ትኸውን ኣብ ሓምሳታትን ኣብ ስሳታትን ፋሕ ምበለት ነይራ!

ኣዚ ዅሉ ክኸውን ከሎ ይትረፍ ብረት ከልዕልን ጐነጽ ክሕውስን ዝፈተነ፡ ዓው ኢሉ ዓገብ ዝበለ ሰብ’ውን ኣይነበረን። እዚ ድማ ህዝቢ ኤርትራ ዳግማይ ናብ ጐነጽን ህልቂትን ክኣቱ ስለ ዘይደሊ’ዩ ዝብል መልሲ ንረክብ። ደቁ ኣብ ዓዲኣቤቶ ዝተሰጥሑዎ ኣቦ ዓገብ ዘይብል፡ ሓዉ ብጥይት ዝተቘልዎ ወይ ዝተረሸኖ ሕነ ዘይፈዲ፡ ወዳ ኣብ ዔራዔሮ ዘሎ ኣደ ኤህ ዘይትብል እንተ ኾይና፡ ሓለፍቱ ንንጹሃት ብጾቱ ክብረ ንጽህናአን እናገፈፉወን ትም ዝበለ መንእሰይ ኣይተዓዘብናን ዲና? እዚኸ ምስ ምንታይ’ዩ ክጽብጸብ? ምስ ፍርሒ ዘይኮነ፡ ምስ ምጽላእ ዕግርግርን ህውከትን ምጽላእ ጥራይ’ዩ ዝተኣስሳአር!

ክቡራት ኤርትራውያን! እዚ ክብል ከለኹ፡ ዝተቓወሙን ያዕ ዝበሉን ዜጋታት የለዉን ንምባል ኣይኮነን። እንታይ ደኣ ተቓውሞና ምስቲ ዝፍጸም ዝነበረ ግፍዕታት ዝዳርግዶ ነይሩ ንምባል ጥራይ! ካልእ ይትረፍ ነዚ ዝተዓዘበ መለስ ዜናዊ፡ ኤርትራውያን ኣንጻር ባዕዳዊ መግዛእቲ’ምበር ኣንጻር ምልካዊ ወዲ ሃገር ወይ ንደሞክራሲ ክቃለስ ወኒ የብሉን ክብል ነቒፉና’ዩ። እዚ ነቐፌታዚ ኣብ ቦታኡ ዘሎ ኾይኑ ይስምዓኒ። ስለምንታይ እንተ ተባህለ፡ ኤርትራውያን ሕማቕ ዕድልና ኮይኑ ንመጀመርያ ግዜ እቲ ጨካን ኢሳያስ ዝዅብኩቦ ህዝባዊ ግንባር መንግስቲ ኣቝሙልና። ስለዝኾነ፡ ነቀይ እንተልና ኣዛ ድሕሪ መዋእል ዝረኸብናያ መንግስትና ክትፈርስ’ያ! ምናልባሽ ድማ ብኡ ኣቢላ ህልም ክትብል’ያ ዝብል ራዕዲ ኣብ ሓንጐልና ሰፊኑ። ኢሳያስ ድማ ነዚኣን ነቲ ዘለና ናይ ውግእ ክርሃትን ኣስተውዒሉ ከም ባሊና ወይ ባሊቃ ናብ ሓደ ግኡዝ ነገር ቀዪሩና። ሃየንታ’ዩ ብሓቂ! ካብዚ ዝዓቢ ትምህርቲ ስለ ዘየሎ፡ ካብ ሎሚ ንንየው ግን ይኣክል ኢልና እጅገና ሰብሲብና ሱርበተኻዊ ለውጢ ንበገስ!

ንምድምዳም ዝኣክል፡ ንሕና ኤርትራውያን ውሑዳትን ሕቡናትን ህዝቢ ኢና። ናብ ትምክሕቲ ገጹ ዝጽጋዕ ሓበን ይስምዓና። ከምኡ ካብ ኮነ ነዚ ብግብሪ ክነረጋግጾ ኣለና። ኣብ ውልቀሰባት ዝነበረና እምነት ኣወጊድና ኣብ ሃገር፡ ኣብ ሕብረተሰብ፡ ኣብ ሓባራዊ ምዕባለ፡ ኣብ ህዝቢ ክንኣምን ኣለና። ውልቀሰብ ንሕብረተሰብ ዘየገልግል እንተ ኾይኑ ናብ ናይ ታሪኽ ጐሓፍ ክድርበ ኣለዎ። ካብኡ ተረፈ ንውልቀሰብ ምስ ህላዌ ሃገር ምትእስሳር ጕድለት ጥራይ ዘይኮነ ገበንውን’ዩ። ኣማእት ኣሽሓት ዝተሰውኡላ ሃገር ምስ ህላዌ ሓደ ጨካን ደም ዘይብሉ ውልቀመላኺ ምትእስሳር ናይ ጓሶት ባህሪ ምኻኑ ንፍለጥ። ንጓሶት ክጸርፍ ኢለ ኣይኮንኩን ይቕሬታ። ሃገር ናይ ህዝቢያ ሕዝቢ ድማ ናይ ሃገር። ውልቀሰብ ድማ ባርያ ናይ ሓፋሽ’ዩ። ስለዚ፡ ድሕሪ ኢሳያስ ንሓፋሽ ዘገልግል ደሞክራስያዊ፡ ህዝቢ ዝቕበሎ፡ ንኵሉ ወገናት ሕበረተሰብ ዝውክል፡ ንናይ ፖለቲካ እሱራት ካብ መቝሕ ነጻ ዝገብር፡ ፍትሒ ዘንግስ ክኸውን ኣለዎ። ድሕሪ ኢሳያስ ዝመጽእ ወይ ዝቕልቀል ስርዓት ብውሕሉል መደረታቱ ዘይኮነ ኣብ ባይታ ብዘርእዮ ተግባራት ኢና ክንመዝኖ ዘለና። ጨለ ዘረባ ዘበኑ ኣሕሊፉ’ዩ!

ደሞክራስያዊት ኤርትራ ክትትከል’ያ!

ዓወት ንህዝቢ! ዝኽሪ ንስዉኣትና!

ዘመን