ስርዓት ህግደፍ፡ ንኹሎም መራሕቲ ተቓወምቲ ሓይልታት ኢትዮጵያ ኣብ ከባቢ ኣስመራ ኣብ ዝገበረሎም ምስጢራዊ ኣኼባ፡ ኩሉ ዓቕምታቶም ኣኻኺቦም ኣንጻር ወያነ ኣብ ዝካየድ ኵናት ንምስታፍ ኣድላዪ ምድላዋት ክገብሩ ከምዝኣዘዞም ምንጭታት ሓቢሮም።

ብመሰረት’ቲ ሓበሬታ፡ ነቲ ኣኼባ ዝመርሐ፡ ሓደ ካብቶም ዕሉላት ናይ ወጻኢ ስለያ ስርዓት ግህደፍ ዝኾነ፡ ብሬገደር ጀነራል ጠዓመ ጎይቶኦም (መቐለ) እዩ።

መቐለን መዛንኡ ሓለፍቲ ሓይልታት ጸጥታ ስርዓት ህግደፍን፡ ከም ብዓል ኮለኔል ታደሰ ምሉነህ ዝኣመሰሉ ንዝርከቡዎም ሓያለ መራሕቲ ናይቶም ባዕሎም ዝሕብሕቡዎም ኢትዮጵያውያን ተቓወምቲ ኣቐዲሞም ኣብ ምስጢራዊ ቤትማእሰርቲ ሓይሮሞም ክንሶም፡ ከምዚ ዝኣመሰለ ኣኼባ ምክያዶም ስግንጢራዊ ምዃኑ እቶም ምንጭታት ብተወሳኺ የዘኻኽሩ።

ውልቀመላኺ ኢሳያስ ኣፈወርቂ፡ ኣብ ምውድዳብ ናይዞም ተቓወምቲ ዝውዕል ዘድልዮ ዓቐን ናይ ወጻኢ ሸርፊ ካብ ሓላፊ ንግዳዊ ባንክ ኤርትራ የማነ ተስፋይ ክወሃቦ፡ ብመንገዲ ሓላፊ ናይ ብሕቲ ሓለዋኡ፡ ኮለኔል ተስፋልደት ፈቒዱሉ ከምዘሎ ‘ውን ኣገንዚቦም።

ኣብዚ እዋን’ዚ፡ ኣብ ዶባት ኤርትራን ኢትዮጵያን ዘሎ ወጥሪ ኣብ ዝለዓለ ደረጅኡ ከምዝርከብ ይፍለጥ።