ኣብ  ከተማ  ባክናንግ  ወረዳ  ምምሕዳር   ሉድቪክስቦርግ  ኣብ ላዕልን  ታሕትን  ደርብታት  ብዙሓት  ሓደስቲ ኤርትራውያንን  ካልኦት  ዜጋ   ስደተኛታትን  ዝነብሩሉ  ገዛ ብዕለት  17.02.2019  ኣስታት  ሰዓት  18፡30  ድ.ቀ  ኢዩ  እዚ  ሓደጋ  ዝተኸስተ። ኣብዚ  እዋን  እዚ ዳርጋ  መብዛሕትኦም   ነበርቲ  ኣብ  ኣባይቶም  ነበሩ። ጠንቂ  ናይቲ  ሓደጋ  ሓንቲ  ኤርትራዊት  ሓብትና  ምስ  ክልተ  ሕጻናታን  ዓርካን ኣብ  ክፍላ  ኮይና  ቡን  ናይ  ዠበና  ኣብ  ውሽጢ  መንበሪ  ገዛ  ክትሰርሓሉ ዘይፍቀድ ብጋዝ  ኣፍሊሖም እንዳሰተዩ  ከለው ነቲ  ጋዝ  ከይተርድኣ  ብእግራ  ምስ ተንከፈቶ  ምስ  ዠበንኡ  ወዲቑ  ነቲ  ኣብ  መሬት  ዝነበረ  ጨርቀመርቂ  ኣቃጺሉዎ  ብኡ  ንብኡ  ከኣ  ነቲ  መሓለውታ  ተባሂሉ ተቐሪቡ  ዝጸንሐ  ካርቱሽ  ጋዝ  ስለዝተንከፎ  ከም  ሓደ  ቦምብ  ተተኲሱ  ብምብራዑ  ክሳብ ነጸላ  መናድቕ  ጎረባብቲ  ኣፍሪሱ  ሓዊ  ብፊንስትራታት  ወጸ። ሓብትና  ምስ  ስንባዴኣ ተቐላጢፋ ነቲ  ወዲ  ክልተ  ሰሙን  ውላድ  ሕጻና  ሒዛ  ዓርካ  ከኣ  ነታ  ካልኣይቲ  ጓል  ሸውዓተ  ዓመት ሕጻን  ሒዞም  ካብቲ  ላዕለዋይ  ደርቢ  ወሪዶም  ህይወቶም  ክድሕኑ  ከኣሉ። እቲ  ዓርኪ  ናይ  ኣልሞት  ባይ  ተጋዳይ  ኮይኑዎ  ነቲ  ሓዊ  ብኢዱ  ከጥፍእ  ኢሉ  ፈተነ ኣካይዱ  ብሰሩ  ከኣ   ክልቲኡ  ኣእዳዉ  ተቓጸለ። እቶም  ካልኦት  ኣሕዋትናን  ካልኦት  ዜጋታትን  በቲ  ናይ  ገዛ  ኣላርም  ተሓቢሮም  ቀልጢፎም  ካብቲ  ገዛ  ብምውጻእ ሂወቶም  ኣድሒኖም  ብህጹጽ ከኣ  ንፖሊስን  ንመጥፋእቲ  ሓውን  ሓቢሮም  ዝምልከቶም  ኣካላት  መጺኦም  ነቲ  ባርዕ  ገዛ  ተቆጻጸሩዎ። ኣብቲ  ክፍሊ  ናይ  ሓብትና  ጎረባብታን ዝነበረ  ኲሉ  ንብረት  ፈጺሙ  ሓረረን  ወደመን።   እቲ  ገዛ  ክሳዕ  300,000.00  ኦይሮ  ዝግመት  ክሳራ  ከምዘስዓበ  ተነጊሩ። ኣምላኽ  ካብ  ሰሪ  መዓቱ  የውጽኣና !!  ኩሎም  ኣሕዋትናን  ከምኡ`ውን  እቶም  ካልኦት  ዜጋ  ስደተኛታትን  እንካብ`ዚ መቕዘፍትዚ  ሂወቶም  ብሰላም  ምውጽኦም  ንኣምላኽ  ክብሪ  ይብጽሓዮ !!

ነዚ  መልእኽቲ  ከተሓላልፎ  ካብ  ዘገደደኒ  ምኽንያት  ካልእ  ዘይኮነስ  ኣብ  ውሽጢ  ገዛ  ብዘይፍቀድ  መሳርሒ  ጋዛት  ተጠቒምካ  ቡን  ምፍላሕ  ይኹን  እንጀራ  ምስንካት  ክሳዕ  ክንደይ  ሓደገኛን  ብሂወትካ  ምጥላዕን  ከምኡ`ውን  ኣብ  ጎረባብትኻ  ከስዕቦ  ዝኽእል  ኣሉታዊ  ሳዕቤናትን  ምዝንጋዕ  ጥራሕ ኢዩ  ዘርኢ። እቲ  ኣብ  ውሽጢ  ገዛ  ዘይፍቀድ  ጋዛት  ኣብ  ደገ ኣብ  ባልኮን  ወይ  ጋርደን  ክትጥቀመሉ ይከኣል  ኢዩ  ኩሉ  ከኣ  መምርሕን  ሓበሬታን  ምስ  መጠንቀቕታ  ጽሑፍ  ኣለዎ። ስለዚ  ሓደራ !  ሓደራ !  ብኻልእና  ንጠፍኦ  ዘለና  ከይኣኽለናስ  ባዕልና  ብእነምጽኦ  ጠንቂ  ሂወትና  ከነጥፍእ  ኣየምሕርን  ዓገብ  ከኣ   ኢዩ።

ፖሊስ  ባክናንግን ሓደጋ  ዝበጽሓ  ሓብትናን  ነዚ  መልእኽቲ`ዚ ናብ  ኲሎም  ዝሰምዕ  እዝኒ  ዘለዎም  ኤርትራውያን  ከቃልሖ  ፍቃዶም  ሓቲተ  ከምዝተሰማምዑ ይሕብር።

ኣንገሦም  ገ/ዮውሓንስ

ኣባል ደላይ  ፍትሒ  ስቱትጋርትን  ከባቢኣን

28.02.2019