ውልቀ መላኺ ኢሳያስ፡ ኣብ ዝሓለፈ ሳልስቲ ህሉው ኩነታት ንምሕባርን መጻኢ መደባት ስራሕ ንምሕንጻጽን ብዝብል ጉልባብ፡ ነቶም ንኣስታት መንፈቅ ኣኪብዎምን ቁሊሕ ኢሉዎምን ዘይፈልጥ ስማውያን ካቢነ ሚኒስተራቱ ዘካየዶ ናይ ፍርቂ መዓልቲ ኣኼባ፡ ቀንዲ ዕላምኡ ደገፍቱን ተቃወምቱን ንምፍላጥን፡ ኣንጻሩ ክለዓል ንዝኽእል ምንቅስቃስ ብኣጋ ንምቁጻይን ከምዝነበረ ምንጭታት ካብ ኤርትራ ገሊጾም።

ውልቀ መላኺ ኢሳያስ፡ ኣቀዲሙ ምስ ኢትዮጵያ ቀጺሉ ድማ ምስ ንግስነት ስዑድ ዓረብ ፡ ንህዝቢ ኤርትራ ኣግሊሉ ዘካየዶን ንልኡላውነት ኤርትራ ኣብ ዋጋ ዕዳጋ ዘእተወ ዝፈረሞ ዘይሕጋዊ ውዕላት ሰላም፡ ካብ መላእ ህዝቢ ኤርትራ ቁጥዐን ተቃውሞን ስለዘጋጠሞ፡ ቅጥፈቱን ተንኮላቱን ንምሕባእ’ዩ ናይ ድሕሪ ማይ ኣብ በዓቲ ኣኼባ ሚኒስተራት ኣካይዱ።

ኣባላት ካቢነ ሚኒስተራት ስርዓት ህግደፍ፡ ዋላ’ኳ ተኣኪቦም ኣይተኣኪቦም፡ ንዕንደራን ኣዕናዊ ውጥናትን ውልቀ መላኺ ኢሳያስ ጠጠው ከብልዎ ዝኽእሎም ድፍረትን ስልጣንን ዘይብሎም እንተኾኑ፡ እቲ ቅድሚ ሰለስተ ኣዋርሕ (ብ9 ሓምለ) ኢሳያስ ንመራሕቲ ኢትዮጵያ ንምሕጓስን ስልጣኑ ንምድልዳልን ብዘይግሉጽነት ዝኸተሞ ውዕል ሰላም ሕጋዊ ንምምሳልን ናዕቢ ህዝቢ ንምህዳእን’ዩ።

ውልቀ መላኺ ኢሳያስ ግዚኡ ዝሓለፈን ትርጉም ዘይብሉን ኣኼባ ሚኒስተራት ምኽያዱ፡ ሓደ ሓደ ካብቶም ስማውያን ኣባላት ካቢነ ሚኒስተራት ብዛዕባ መስርሕ ሰላም ኢትዮ-ኤርትራ “ስለምንታይ ኣብ እዋኑን ብግልጽን ኣይተሓበረናን” ኢሎም ስለዘዕዘምዘሙን ካብ ስልጣኖም ንምውራድ ሕቶ ስለዘቅረቡን፡ ጉዳያት ካብ ቁጽጽር ከይወጹን ኣብ ህዝቢ ከይልሕምን ስግኣት ስለዘለዎ ምፍርራሕን ምስሉይነትን መግለጺታት’ዩ ተጠቂሙ። እቲ ብቤላበለውን ብዘይሕግን ዝተፈረመን ተሓይኹ መረቁ ዝተወድአን ስምምዕ ሰላም ኤርትራን ኢትዮጵያን፡ ኣብ ዝመጽእ ሒደት ኣዋርሕ ንኽብርን ሃብትን ህዝቢ ኤርትራ ኣብ ምዕናውን ምብሓትን ከይተሓጽረ ኣካላዊ ህላወ ሰራዊት ኢትዮጵያ ኣብ መሬትን ባሕርን ኤርትራ ዘረጋግጽ መደባት’ዩ ተወጢኑ ዘሎ።

ኣብ ዝሓለፈ ኣኼባታት ካቢነ ሚኒስተራት ስርዓት ህግደፍ፡ ላዕለዎት ኣዘዝቲ ሰራዊትን ሓለፍቲ ጸጥታን ምስ ሚኒስተራት ተሰሪዖም ይእከቡ’ኳ እንተነበሩ፡ ኣብ ናይ ሎሚ ኣኼባ ሚኒስተራት ግን ብኢሳያስ ስለዘይተኣምኑ ኣይተኣከቡን።

እዚ ኣብ ሃገርና ድሕሪ ስምምዕ ሰላም ኤርትራን ኢትዮጵያን ዝርአ ዘሎ ዋሕዚ ኤርትራውያን ናብ ኢትዮጵያን ፍኑው ቁጠባዊ ምስፍሕፋሕን ነጋዶን ኢትዮጵያ፡ እታ ብመስዋእቲ ዓሰርተታት ኣሽሓት ዝተረኽበት ኤርትራ ኣብ ዓቢ ስግኣት ዘውድቅ ስለዝኾነ፡ ኩሉ ወዲ ሃገርየ ዝብልን መስዋእቲ ጀጋኑ ዘሕምሞን ኤርትራዊ ክልዓል ዝሕተተሉ እዋን’ዩ።

እቲ ውልቀ መላኺ ኢሳያስ ኣብ ኢትዮጵያ ከይዱ “ምስ ኢትዮጵያ ሓደ ህዝቢ ኢና፡ ዶክቶር ዓቢዪ ኣሕመድ ክትመርሓና ምሉእ ሓላፍነት ሂበካ ኣለኹ፡ ጉዳይ ዶብ ቀዳምነትና ኣይኮነን” ዝበሎ መግለጺ፡ ንብዙሓት ኤርትራውያን ዋዛ ይመስለና’ኳ እንተሎ፡ ኢሳያስ ግን ቀስ ብቀስ ኤርትራ ብቁጠባ፡ ብወተሃደራውን ፖለቲካን ተረሚሳን ተዳኺማን ኣብ ትሕቲ ምልኪ ኢትዮጵያ ክትከውን ስልጣን ዝህብ ውዕላትን ሕልምን ከምዘለዎ ክስቆረና ይግባእ።