ሓደ ላዕለዋይ ዲፕሎማት ኣመሪካ ምህዳስ ሰላም ኤርትራን ኢትዮጵያን ብሓጎስ ኳ እንተተቐበለ፡ ንምኽባር ሰብኣዊ መሰላት ብዝምልከት ገና ኣመሪካ ሻቕሎት ከምዘለዋን ካብ ምትሕግጋዝ ዓንቃፊ ኮይኑ ምህላዉን ምግላጹ ሮይተርስ ሓቢሩ።

እቲ ቲቦር ናጊ ዝተባህለ ኣብ ሚኒስትሪ ጉዳያት ወጻኢ ኣመሪካ ተሓጋጋዚ ሰክረታሪ ኣብ ጉዳያት ኣፍሪቃ ዝኾነ ዲፕሎማት፡ ትማሊ ረቡዕ ኣብ ባይቶ ኣመሪካ ኣብ ዝሃቦ መግለጺ፡ ኣመሪካ ኮነ ኢላ ኣብ ዝሓለፈ ኣዋርሕ ምስ ኤርትራ ኣብ ጽምዶ ኳ እንተኣተወት፡ ኣብዚ እዋን`ዚ ብዛዕባ ምልዓል እገደ ውድብ ሕቡራት ሃገራት ምዝራብ ግን ገና ግዚኡ ከምዘይኣኸለ ምግላጹ እቲ ሓበሬታ የገንዝብ።

ሓደ ካብቶም ን መንግስቲ ኣመሪካ ዘሻቕሉዎ ምስ ሰበስልጣን ስርዓት ኢሳይያስ ዘልዓሎም ጉዳያት ናይቶም ብፖለቲካዊ ጠንቅታት ተኣሲሮም ዘለዉ ሰራሕተኛታት ኤምባሲ ኣመሪካ ኣብ ኤርትራ ምዃኑ `ውን እቲ ዜና ይጠቅስ።

ኣመሪካ ብዛዕባ`ቲ ምልካዊ ስርዓት ኢሳይያስ ካብ ሰሜን ኮርያ ዝገዝኦ ኣብ ጸብጻብ ውድብ ሕቡራት ሃገራት ተጠቒሱ ዘሎ ኣጽዋር ምሉእ መግለጺ ክህብ ከምእትደሊ እቲ ዲፕሎማት ምሕባሩ ድማ ተፈሊጡ።

ብዘይካ`ዚ፡ ማእሰርቲ ኣመንትን ናይ ፖለቲካ እሱራትን፡ ደረት ኣልቦ ሃገራዊ ኣገልግሎት፡ ከምኡ `ውን ምልካዊ ስርዓተ ምሕደራ ካብቶም ንኣመሪካ ዘሻቕሉዎ ጉዳያት ምዃኖም ዝጠቐሰ ዲፕሎማት ኣመሪካ፡ `ኤርትራ፡ ምስ ጎረባብቲ ርክባ ብምሕዳስን ጥዑም ጥዑም ቃላት ብዝምዝራብን ጥራይ ብኡንብኡ እገዳ ክለዓለላ ክትጽበ የብላን` ይብል።

ንሰበስልጣን ኤርትራ ባህ ይበሎም ኣይበሎም ብዘየገድስ፡ ጭቡጥ ስጉምታት ክሳብ ዝወስዱ ኣመሪካ ብዓውታ ብዛዕባ ሰብኣዊ መሰላትን ዲሞክራስን ምዝራብ ክትቅጽል ምዃና ድማ ኣረጋጊጹ።