ስርዓት ህግደፍ፡ 22 መጋቢት 2018 ኣብ ዘውጽኦ ጋዜጣዊ መግለጺ፡ ቀጠርን ሱዳንን ስርዓቱ ንምጽባእ ይንቀሳቐሳ ምህላወን ድሕሪ ምግላጹ፡ ስርዓት ሱዳን ትማሊ 24 መጋቢት ተመሳሳሊ መግለጺ ብምውጻእ ኣሉታዊ ግብረ መልሲ ሂቡ።

እቲ፡ ሱዳን ኣብ ወተሃደራዊ መዓስከር ሳዋ ብሓሓዝ ግብጻውያን ኣማኸርቲ ተቓወምቲ ሱዳን ትዕልም ከምዘላ ብምጥቃስ ቅድሚ ኣስታት ክልተ ወርሒ ንዘካየደቶ ዶባት ናይ መዕጻው ስጉምቲ ስዒቡ፡ ስርዓት ህግደፍ ብማዕከናት ዜናኡ ዝዘርግሖ ሓጺር መግለጺ ቃል ንቓሉ ከምዚ ይብል።

እቲ ናይ ህግደፍ መግለጺ ከሕልፎ ዝተደለየ መረዳእታ እስላማዊ ጥሩፍነት ናብ ኤርትራ ንምትእትታው ይሰርሓ ኣለዋ ማለት ምዃኑ ዝእመት ኳ እንተኾነ፡ ብቐጥታ ኣይገለጾን። በንጻሩ ንመግለጺኡ ብሕቶ እዩ ዛዚሙዎ።

ከም ግብረ መልሲ ናይዚ ክሲ`ዚ ስርዓት ሱዳን ትማሊ 24 መጋቢት 2018 ብመንገዲ ሚኒስትሪ ጉዳያውት ወጻኢኡ ኣብ ዘውጽኦ መግለጺ ነቲ ናይ ምጽባእ ስጉምቲ ኳ እንተኸሓዶ፡ ንህላወ ናይቶም ህግደፍ ኣብ ከሰላ ኣለዉ ዝብሎም ዘሎ ባእታታት ምንጻጉን ምእማኑን ግን ካብ መግለጺኡ ንጹር ኣይኮነን።

ነዚ ኣመልኪቱ ሱዳን ትሪቡን ከምዝሓበሮ፡ ኣፈኛ ሚኒስተሪ ጉዳያት ወጻኢ ሱዳን ጋፍር ሱሚ ቱቱ ኣብ መግለጺኡ፡ ` እቲ ብሚኒስትሪ ዜና ኤርትራ ዝተዘርግሐ ክሲ ጭቡጥ ኣይኮነን። ከሰላ፡ እንተላይ ነቶም ኣብ ሱዳን ክነጥፉ ዝተፈቕደሎም ንናይ ወጻኢ ዲፕሎማስያዊ ልኡኻት፡ ንኹሉ፡ ክፍቲ ከምዝኾነት የዘኻኽር።` ኢሉ።

መንግስቲ ሱዳን፡ ምስ ጎረባብቱን መሓዙት ሃገራትን፡ ጽቡቕ ጉርብትናን ኣብ ውሽጣዊ ጉዳያት ሕድሕድ ጣልቃ ናይ ዘይምትእትታውን ፖሊሲ ከምዘለዎ ከምዘዘኻኸረ `ውን እቲ መርበብ ሓበሬታ ይጠቅስ።

ስርዓት ህግደፍ ኣብ መግለጺኡ፡ `ብሱዳንን ቀጠርን ዝድገፍ፡ ኣብ ከባቢ ከሰላ ሰዓብቱ ዝስልጥኑ ዘለዉ እስላማዊ ሰባኺ` ክብል ብሽፉኑ ዝጠቐሶ መሓመድ ጁምዓ፡ ኤርትራዊ ምዃኑ ኸኣ እቲ ናይ ሱዳን ትሪቡን ዜና ይእምት።

ቅድሚ ሎሚ ስርዓት ህግደፍ ነዚ መሓመድ ጁምዓ ዝብሃል እስላማዊ ሰባኺ ቀጠር ንንጥፈታቱ ብመንገዲ ቴለቭዥን ኣጀዚራ ተዋዓውዓሉ ከምዘላ ወቒሱ ኳ እንተነበረ፡ ሱዳንን ቀጠርን ተወሃሂደን ኣንጻር ስርዓቱ ይንቀሳቐሳ ምህላወን ብኸምዚ ዝኣመሰለ መልክዕ ምግላጹ ናይ መጀመርያ ምዃኑ ሱዳን ትሪቡን የገንዝብ።

ኣብ ዝሓለፈ ጥሪ ብምስግሳግ ኤርትራ ግብጽን ቀጨውጨው ዝበሎ ስርዓት ካርቱም ክልቲኤን ሃገራት ስሙ ብወግዒ ዘይተገልጸ ተቓዋሚ ሱዳን ኣብ ሳዋ የሰልጥና ምህላወን ብምኽሳስ፡ ኣሽሓት ሰራዊት ሱዳን ናብ ዶባት ኣዋፊሩ ምስ ኤርትራ ዘዋስኖ ዶባት ዓጽዩዎ ከምዝነበረ ይዝከር።

እቲ ምስ ኢትዮጵያ ኣብ ናይ ኲናት ሃዋህው ዝርከብ፡ ካብ ዓለም ውን ተነጺሉ ዘሎ ስርዓት ኢሳይያስ፡ ኣብ ሰነ 2017 ምስ ቀጠር ዝነበሮ ጥቡቕ ዝምድና ገዲፉ፡ ምስተን ኣንጻር ቀጠር ደው ዝበላ ስዑዲ ዓረብ፡ ግብጺ፡ ሕቡራት ኢማራት ዓረብን ባሕሬንን ከምዝወገነ ይፍለጥ።

መንግስቲ ሱዳን በንጻሩ፡ ነታ እዘን ኣርባዕተ ሃገራት ማእከላይ ምብራቕ ንእስላማውያን ባእታታትን ኢራንን ከምእትሕግዝ ብቐጻሊ ዝኸሳኣ ቀጠር ጥቡቕ ዝምድና ኣለዎ።

Subscribe ASSENNA YouTube to get Radio Assenna shows on time: