ኣብ ታሪኽ ኣህጉር ኣፍሪቃ፡ ምዕላው መንግስቲ፡ ብስም ዲሞክራሲ፡ መሰልን ናጽነትን ምሒልካን ጥሒልካን ህዝቢ ኣሰሊፍካ ሰውራ ወይ ለውጢ ምክያድ፡ ስልጣን ምስጨበጥካ ዝኣተኻዮ መብጽዓ ምጥላምን ኣብ ኮረሻ ስልጣን ንዘደየበካ ሓፋሽ ምርጋጽን ልሙድ’ዩ። እዚ ኣብ ኤርትራ፡ ዚምባብወ፡ ኡጋንዳ፡ ደቡብ ሱዳን፡ ዲሞክራስያዊት ሪፓብሊክ ኮንጎን ኢትዮጵያን ዘሎ ግዕዙይ ምምሕዳርን ህዝቢ ዝደኸመሉን ህይወቱ ዝኸፈለሉን ስልጣን ምጭዋይን ድማ ከም ኣብነት ክጥቀስ ይከኣል። ኣብዚ እዋን’ዚ ዓለም ዘርከበቶን ን37 ዓመታት ዝተኾደጫ ዙፋን ተሓዲጉ ዘሎን ሮበርት ሙጋቨ፡  ሰውራ መሪሑ ንህዝቢ ዚምባብወ ካብ ምንጋጋ ባዕዳዊ መግዛእቲ ስለዝገላገሎን ኣብ ፈለማ ዓመታት ጽቡቅ ነገራት ስለዝገበረን ብዝበዝሕ ህዝቢ ዚምባብወ ፍትዉ’ዩ ነይሩ። ነዊሕ ከይጸንሐ ግን ብስልጣን ስለዝዓወረን መብጽዓ ህዝቡ ረሲዑን፡ ናብ ዲቅ ዝበለ ውልቀ መላኽን ገባቲ ሃብትን ተሰጋጊሩን ብህዝቢ ዚምባብወ ተፈንፊኑን። ኣብ መወዳእታኡ ድማ ናብ ታሪኽ ጉሓፍ ተደርብዩን ነበር ኮይኑን። ስሙ ካብ ሓርበኛ ተጋዳላይ ናብ መላኽን ገፋዒ ህዝቡን ተቀይሩ። ሰብን እዝግን ክሳብ ዝጸልኣካ ዕድመን ስልጣንን ኣይሃብካ። መራሒ ስርዓት ህግደፍ ውልቀ መላኺ ኢሳያስን ሮበርት ሙጋቨን፡ ብዙሕ ዘመሳስል ታሪኽን ጽዩፍ ተግባራትን ኣለዎም። ሰውራ ምምራሕ፡ ንነዊሕ ዓመታት ምግባት ስልጣን፡ ንተቃወምትኻ ምእሳርን ካብ ስልጣን ምብራርን፡ ንብረት ሃገርን ህዝብን ኣብ ውልቃዊ ረብሓኻ ምውዓል ክጥቀስ ይኽእል። እንተኾነ መላኺ ኢሳያስ፡ ካብ ሙጋቨ ኣዝዩ ዝኸፍአን ዝሰይጠነን ጠባይ ስለዘለዎ፡ ክሳብ ለይቲ ሎሚ ንኢሳያስ ዝወዳደር ዲያብሎስ መራሒ ኣይተወልደን።

“ጭሕሚ ብጻይካ ክላጸ ጭሕምኻ ማይ ልኸ” ወይ “ድሕሪ ኣቦኻ ሞት ግዴኻ” ከምዝብሃል፡ ስርዓት ህግደፍ ለባምን ወስተውዓልን እንተኾይኑ፡ እዚ ንሮበርት ሙጋቨ ኣጋጢምዎ ዘሎ ውርደትን ስዕረትን ኣብ ዝባኑ ከይዓለበ ወይ ኣብ ድርኩኺት ቤት ጽሕፈቱ ደበኽ ክይበለ እንከሎ፡ ብኣታሃድማ ዕቡያት ስልጣኑ ንህዝቢ ኤርትራ ከረክብ፡ ህዝቢ ኤርትራ ዝምእምኦ መራሕን መንግስትን ክመርጽ ከፍቅድን ሕድሪ ስዉኣት ከኽብርን ይሕተት ኣሎ። መላኺ ኢሳያስን ተሓባበርቱን ላዕለዎት ካድራቱን ጀነራላቱን፡ ስቃይ፡ መረረን ምግሃስ ሰብኣዊ መሰል ህዝቢ ኤርትራ ዕሽሽ ምባል እንተመሪጾም ግን፡ እቲ ብ31 ጥቅምቲ ዝተወልዐ ንጣር ቁልዒ ተደጉሉ’ምበር ከምዘይጠፍአ ክግንዘቡ ኣለዎም። ምልካዊ ስርዓት ህግደፍ ንመዋእል ንህዝቢ ኤርትራ ከደናግር፡ ከፈራርሕ፡ ምስ ሓይሉ ክነብር ከምዘይክእልን ንጭቡጥ ኩነታት ኤርትራ ብግቡእ ክግምግምን ክርዳእን ግዚኡ ኣኺሉ’ዩ። ህቡቡነትን ጽቡቅ ሞያን ህዝባዊ ግንባር፡ ኣብ ሰብዓታት. ሰማንያታት ተስዓታት ኣይኮነን ዘሎ። ድሕሪ ናጽነት ብፍላይ ድማ ኣብ ዝሓለፈ 15 ዓመታት ስርዓት ህግደፍ፡ ኩሉ ተግባራቱ ናብ ጨካን ኣራዊት፡ ነብሰይ ይጥዓመኒ፡ ምዕናው ሃገርን ህዝብን ስለዝተቀየረ፡ ክብርታቱ ክንቲት ደርሆ’ዩ ኮይኑ።

መጻኢ ዕድል ህዝቢ ኤርትራ፡ ኣብ ኢድ ህዝብን ሰራዊትን ኤርትራ ስለዘሎ፡ ነቲ ከም ቁርዲድ ደሙ ዝመጽዮ ዘሎ ስርዓት ህግደፍ ብስሙር ቅልጽም “ይኣኽለካ ካብ ርእስና ውረድ” ክብሎ ኣለዎ። ሰራዊት ኤርትራ’ውን ሕጊ ክነግስ፡ ድሕነት ህዝቢ ክረጋገጽ፡ ጉሓላሉን ገበነኛታትን ኣብ ፍርዲ ክቀርቡ ታሪኻዊ ሓላፍነት ኣለዎ። ህዝብን ሰራዊትን ኤርትራ፡ በትሪ ኣብ ኢድካ ተመን ኣብ እግርኻ ስለዘሎ፡ ብቀጻሊ ትርገጸሉ፡ ትእሰረሉ፡ ከም ካልኣይ ዜጋ ትቁጸረሉ፡ ናብ ስደት ተምርሓሉ፡ ንብረትካ ትዝመተሉ፡ መቅዘፍቲ ደቅኻ ትርድኣሉ፡ ብሓለንጊ ጥሜት ትግረፈሉን ብሕጽረት ማሕበራዊ ኣገልግሎት ትሳቀየሉን መዋእል ከብቅዕ ይግባእ። ህዝቢ ኤርትራ፡ ቅድሚ ሰብ ተፈጢርካን ብጽቡቅ ተሰሚኻን ከተብቅዕ፡ ድሕሪ ሰብ ትተርፈሉን  ብሕማቅ ትፍለጠሉን ግዜ መኸተምታ የድልዮ’ሎ። ክሳብ መኣስ ስርዓት ህግደፍ፡ “ማሕበረሰብ ዓለም እገዳ ገይሩልና፡ ልኡላውነትና ብኢትዮጵያ ተደፊሩ” እናበለ ከታልለካ። እዚ ተሕልፎ ዘለኻ መዋእል ኣካሒዳ፡ ምረት፡ ጓህን ምስትምሳልን ተውዲኡ መስተርሆት ከተንግስ ዓቅሚ ከምዘለካ ብግብሪ ከተረጋግጽ ኣለካ። ንጉዳይካ ልዕሊ ንስኻ ካልእ ኣካል ክፈትሓልካን ብጸሎትን ክትረኽቦን ክትጽበ የብልካን። ውልቀ መላኺ ስርዓት ህግደፍ፡ ሕሹኽታ ናይ ኣኽርያን ሮበርት ሙጋቨን ኣብ ኣእዛኑ ኣትየን ኣለዋ። ነየንአን ይመርጽ፡ እቲ ውሳነ ንመላኺ ኢሳያስ ዝግደፍ’ዩ። “መውረድ ጻሕሊ ቀያይርካ ጽብሒ ኣይምቅርን” ከምዝብሃል ግን፡ መላኺ ኢሳያስ መሻርኽቱን ንይምሰል ኢሉ ቅዳሕ ናቱ ኣብ ሰልጣን ኣደይቡ፡ ብድሕሪ መጋረጃ እከይ ተግባራቱ ከይቅጽል ጥንቃቀ የድልዮ። መሰረታውያን ጠለባት ህዝቢ ኤርትራ፡ መሰል ሰብ ይከበር፡ ብዘይ ፍርዲ ምእሳርን ምቅታልን ጠጠው ይበል፡ ህዝቢ ወከልቱ ክመርጽ ዕድል ይወሃቦ፡ ናጽነት ምዝራብን ምጽሓፍን እምነትን ክህሉ፡ ሕግን ፍትሕን ክነግስ፡ ሰብ ሰሪሑ ክንብር፡ መንእሰይ መኣዲ ፍልጠት ክረክብን ተሓታትነት ዘለዎ መንግስቲ ክምስረት ጥራሕ’ዩ። ስርዓት ህግደፍ፡ እዚ ዝተጠቅሰ መሰረታዊ መሰላት ህዝቢ ኤርትራ ምስዘማልእ ጥራሕ’ዩ ሓልዮት ህዝቢ ኤርትራ ከምዘለዎ ዝምስከረሉ።

ጽላል ካብ ሕቡራት መንግስታት ኣመሪካ 25 ሕዳር 2017
Subscribe ASSENNA YouTube to get Radio Assenna shows on time: