ኣብ ዓባይ ብሪጣንያ ከተማ ከተማ ለንደን ዝርከቡ ኤርትራውያን ብ 5 ነሓሰ፣ ኣብ ለንደን ኣዳራሽ Initiatives for Change ብክብ ዝበለ ወግዒ መዓልቲ ሓርበኛታት ኤርትራ ኣኽቢሮም።

ኣብቲ ንቓልሲ ናጽነት ኤርትራ ብኣካል ዘርከቡሉን ዝወዓሉዎ ድሕሪ ናጽነት ዝተወልዱ ሓደሽቲ ወለዶን ከምኡ ‘ውን ወጻእተኛታት ፈተውትን ኣዕሩኽን ኤርትራ ዝተረኽቡሉ ኣጋጣሚ፣ ንታሪኽ ሓርበኝነት ኤርትራውያን ዝገልጹ ዝተፈላልዩ ንጥፈታት ቀሪቦም።

ኣብ መኽፈቲ ናይቲ ኣጋጣሚ ኣብ ቃልሲ ንናጽነት ኣካሉ ዝጎደለ ሓደ ካብ ኣባላት ኮሚተ መዓልቲ ሓርበኛታት ኤርትራ ተጋዳላይ ዮሃንስ ጸጋይ ከምኡ ‘ውን ወ/ት በኺታ መሓመድ ኑር ንኣድላይነት መዓልቲ ሓርበኛታት ኤርትራ ዝምልከት መእተዊ ኣቕሪቦም።

ተጋዳላይ ዮሃንስ ኣብ መግለጺኡ፣ “ኤርትራዊ ፣ ድማ ብፍላይ መንእሰይ ወለዶ፡ ነቲ ዘዅርዕን ዘሐብንን ታሪኽ ጅግንነት ኣያታቱን ኣቦታቱን ክምርምሮን ክመሃረሉን ከምዘለዎ ኣገንዚቡ።  “እቲ ሓርበኝነት ብቐሊሉ ዘይዝንጠል ክቡር ታሪኽ ህዝብና ስለዝኾነ ከይብለል ክንከላኸለሉን ክንዕቅቦን ሓላፍነት ናይ ኩልና ኢዩ” ድማ ኢሉ።

ቀጺሉ፣ ሓደ ካብ ኣባላት Initiatives for Change Mr Peter Riddell፣ “ኪኖ ይቕረ” ዘርእስታ፣ ይቕረ ምባል ከም መርሓዊ መስርሕ ሰላም ዘለዎ ኣበርክቶ እንተንጸባርቕ ናይ ደቡብ ኣፍሪቃ ሓጻር ፊልም ተሳተፍቲ ከምዝዕዘቡ ብምግባር፣ ትርጉሙ ንኤርትራውያን እንታይ ምዃኑ ንምድህሳስ ዘተ መሪሑ።

ድሕሪ ናይ ምሳሕ እንግዶት ከኣ፣ ኣብ ካልኣይ ገጽ መደብ መዓልቲ ሓርበኛታት ኤርትራ ተሳተፍቲ በብወገኖም ኣብ ቃልሲ ንናጽነት ካብ ዘለዎም ተመክሮ ብርቂ ንዝብሉዎ ፍጻሜታት እናልዓሉ ንተሳተፍቲ ዛንትኦም ኣካፊሎም።

ንሳቶም፣ ከምዚ ዝኣመሰለ ውርሻ ናይ ምትሕላፍ ኣጋጣሚ ንመዓልቲ ሓርበኛታት ኤርትራ ተጸቢና ሓንሳብ ኣብ ዓመት ዘይኮነ ንቐጻሊ ክንገብሮ ዝግብኣና ዕማም እዩ ብምባል ሓላፍነቶም ንምስካም ዘለዎም ቅሩብነት ኣረጋጊጾም።

ኣብቲ ኣጋጣሚ ዝተረኽቡ መንእሰያት ከኣ፣ ብዘይስሩዕ ተራ ዕላላት እንተዘይኮይኑ፣ ብመደብ ታሪኽ ሓርበኛታት ኣቦታቶምን ኣዴታቶምን ዝወርሰሉ መድረኽ ዘይምህላዉ ታሪኾም ብዕምቆት ከይፈልጡ ኣንቂጹዎም ምህላዉ ብምግላጽ፣ መንእሰያት ዝጥቀሙሉ እዋናዊ መራኸቢታት ኣብ ግምት ዘእተወ ቀጻልነት ዘለዎ ታሪኽ ናይ ምስናድን ምውርራስን መስርሕ ከምዘድሊ ለበዋኦም ኣመሓላሊፎም።

ኣብ መዛዘሚ ዝኽሪ መዓልቲ ሓርበኛታት ኤርትራ ሓንቲ ካብ ኣወሃሃድቲ ናይቲ መደብ ዶር ልኡል ስዩም፣ ንኹሎም ነቲ መዓልቲ ዕዉት ዝገበሩ ኣበርከትን ተሳተፍትን ዕዱማት ኣጋይሽን ከምኡ ‘ውን ነቶም ኣዳራሽን መሳለጥያታትን ኣብ ምቕራብ ዝተሓባበሩ Initiatives for Change ኣመስጊና።

ነቲ ኣጋጣሚ ዘንጸባርቕ ትሕዝቶ ኣብ ዝቕጽል እዋን ብቪድዮ ክቐርብ እዩ።