ብኣወልኼር ዓ/ሓፊዝ

ኣዚዩ ሰላማዊ ኮይኑ ዝጀመረ ፤ ዳሓር ብምድፍፋእ ስርዓት ኣሰድን ሸለልትነት ሕብረተ- ሰብ ዓለምን ናብ ጎንጻዊ ዝተሰጋገረ ሰውራ ህዝቢ ሶርያ፤ ንዓለምና ዕርቃና ዝቀለዔ፤ ጸማም ክሰምዕ፤ ዕዉር ክርእይ ዝገበረ፤ ኣብ ሳሕራ ጭርጭር ዓበደ  ምጽዋት ከም ዘይምችእ ዘርየና ሰውራ`ዩ።

ኣብ`ዚ 6 ዓመት`ዚ ንህዝቢ ሶርያ ዝወረዶ መከራ ሰድት፤ ዕንወትን ምብትታን ስድራን ታሪኽን ………  ድሕሪ 2ይ ውግእ ኣለም እቲ ዝኸፈኤ`ዩ  ክበሃል ይከኣል።

ኣሜሪካ ክሳብ ሕጂ ህዝቢ ሶርያ  ብነፈርቲ ሩስያ ሃገሩን ህዝቡን ክበርስ እንኮሎ ፤ መልሻታት ማእከላይ ምብራቅ ከኣ ንህዝቢ ሶርያ ብጥምየት፡ ብምልቃቅ፡ ብምጽናት፡ ክሃስየኦ  እንኮለዋ፤ ኣበይ`ያ ጸኒሓ ?!

ቱርክያ ህዝቢ ሶርያ ዝዕቆቦሉ  እገዳ ነፈርቲ ዘለዎ ዞና ክፍጠር ክትሓትት እንኮላ፤ እቲ ንዝበዝሔ ከተማታት ተቆጻጺሩ ንስርዓት ኣሰድ  ቱርጉም ዘይብሉ ጌሩ፤ኣብ ዋና ከተማ  ከይተረፈ  ኣብ ውሱን ቦታ ሓጺሩዎ ዝነበረ ስውራ፤  ብጠገለ ዘይብሉ ድብደባ ሩስያ  ከተማታት ንኣሰድ ኣረኪቡ  ክወጽእ ክግበር እንኮሎ፤  ኣሜሪካ ስቅ ኢላ  ትዕዘብ ዝነበረት ስለምንታይ`ዩ ? እቲ ሩስያ ትፍጽሞ  ዝጸነሔት  ዕንወት ንሳ`ውን ትደልዮ ዝነበረት ዕንወት ስለ ዝነበረ ድዩ ?

እቲ ኣብ ሶርያ ሃሊቁ ዘሎ ሰብ፤ እቲ ካብ ንብረቱ ካብ ዓዱ ክርሕቅ ተገዲዱ ዘሎ መላይን፤ እቲ መዓስ ይትካእ ኢልካ ንምግማት ዘሸግር ዕንወት ትሕተ ቅርጻ ………………. ንተጋደልቲ ውሱን ጸሬ ነፈርቲ ብምዕጣቅ ክግታእ ዝኽእል ዝነበረ ክነሱ ብዓል ኣሜሪካ ኣብ ኢድ ኣሸበርቲ / ሕንጉጉ ከይበጽሕ ብዝብል ምስምስ  ጸሬ ነፈርቲ  ከይህልዎም ምግባር ናይቲ ሰውራ ዓወት ይድለ ስለ ዘይነበረ`ዩ።

ኣብ ሳሕራ ጭርጭር ዓበደ ምጽዋት  ዘይ ምችእ ካብ ኮነ፤ ዓይነት ጸወታ ክቅየር ኣለዎ። ስለዚ ኣብ ጎላጉል ሶርያ በዓል ሩስያ፡ ኢራን ፡ሕዝቢ ኣላህ፡ ካለኦት ናሽቱ መልሻታት፡ ዳዕሽ  ቁልጭ ኢሎም ክረኣዩኻ`ዮም። እቲ ቁልጭ ኢሉ ዘይረኣየካ ካብ ናይ ኩሎም`ቶም ዝዘከርናዮም ዝዓበየ ህላዌ፤ ህላዌ እስራኤል`ዩ ።

ስለ`ዚ መርገጽ ወይ ስጉምቲ ኣሜሪካ ካብዚ ናይ እስራኤል ህላዌ ዝበልናዮ ፈሊኻ ምርኣይ ፖለትካዊ ግርህና`ዩ። ብሓጺሩ እቲ ካብ ሓለብን ካልእ ከተማታትን ብጽሉል ሩስያዊ ድብደባ ዝተባረረ፤ እስራኤል ብዝኾነ ይኹን መንገዲ ኣብ ምምራሕ ሶርያ ክበጽሕ  ዘይትደልዮ  ሸነኽ`ዩ ፤ ኣብ ምጥፋእ ናይ`ዚ ትንፋስ ዝረኸበ ስርዓት ኣሰድ ከኣ ብኢራን ዝዝወር`ዩ።

ኢራን ማለት ከኣ ንእስራኤል እንታይ ማለት ምዃኑ ፍሉጥ`ዩ። ስለዚ  ስርዓት ኣሰድ ሎሚ ብትራምፒ ኣሜሪካ ዝተሃርመ ስለ`ቶም  ኣብ ካን ሸኹን ብስሚ ዝተቀትሉ ህጻናት`ዩ  ኢልኩም ትኣምኑ ኸኣ ዳሓን ሕደሩ።

AAHafiz (215) 7/4/2017

、、、、、、、、、、、、、、