ምልካዊ ስርዓት ኢሳይያስ፣ ኣካያዲት ስራሕ ዞባ ደቡብ ማለት ከም ምኽትል ኣመሓዳሪ ዞባ ኮይና ተመዲባ ትሰርሕ ንዝነበረት ፋና ተስፋማርያም ኣብ ዝሓለፈ ቅንያት ከምዝኣሰራ ምንጭታት ሓቢሮም።

ብመሰረት ‘ቲ ሓበሬታ፣ እታ ኣብ ሓደ ካብ ዞብታታት ኣስመራ፣ ቀጺላ ኣመሓዳሪት ከተማ ባጽዕ፣ ሕጂ ኽኣ ከም ኣካኣዲት ስራሕ ኣብ ዞባ ደቡብ ኣብ መንደፈራ የማነይቲ ኢድ ምልካዊ ስርዓት ኢሳይያስ ኮይና ተገልግል ዝነበረት ፋና ተስፋማርያም፣ እቲ መጋበርያ ምልክን ዓመጽን ዝገበራ ስርዓት ብፍላይ ድማ እትኣምኖ ዝነበረት ኢሳይያስ ተገምጢሉዋ ኣብ 5ይ መደበር ፖሊስ ኣስመራ ተመቝሓ ‘ላ።

እቲ ስርዓት ኣስዒቡ ኣብ ፍሉይ ቤትፍርዲ ንዝዓዪ ዝነበረ ብዓል ቤታ ‘ውን ኣሲሩዎ ምህላዉ እቶም ምንጭታት ብተወሳኺ ኣገንዚቦም።

ንምኽንያት ማእሰርታ ብዝምልከት፣ ‘ኢሳይያስ ደቆም ንደገ ዝሰደዱ ኣባላት ላዕለዎት ሓለፍቲ መጽናዕቲ ይገበረሎም’ ኢሉ ድሕሪ ምእዛዙ እታ ሓደ ወዳ ካብ ኤርትራ ዘውጽአት ፋና ከም ዝተኣሰረት እቶም ምንጭታት ክሕብሩ ከለዉ፣ ከም ብዓል የማነ ቻርሊ (ሚኒስተር ዜና)፣ ጀንራል ፍሊጶስ ወልደዮሃንስ፣ ብሪጋደር ጀነራል ሓድሽ ኤፍሬም ዝርከቡዎም ብዙሓት ሚኒስተራትን ጀነራላትን ደቆም ኣብ ናብ ዝተፈላለያ ሃገራት ወጻኢ ልኢኹም ክንሶም ኢሳይያስ መን ኢኹም ዘይምባሉ ግን፣ እዚ ምኽንያት’ዚ መሸፈኒ ኢሳይያስ ናይ ዝኣለሞ ካልእ ጠንቂ ምዃኑ ተዓዘብቲ ይገልጹ።

ገለ ወገናት፣ ምስ ኣመሓዳሪ ዞባ ደቡብ ኤፍሬም ገብረክርስቶስ ምትህልላኽ ከምዝጸንሓ፣ ብፍላይ ኣብዚ ቀረባ እዋናት ኣብ ዝተገብረ ህዝባዊ ኣኼባ ህዝቢ ንዘልዓሎም እዋናውያን ሕቶታት ኣትሪራ ዘይምምላሳ መጠመቲ ኮይኑዋ ክኸውን ከምዝኽእል ‘ውን ኣሚቶም።

ብኻልእ ‘ወገን፣ ሓደ ካብ ቀንዲ ደገፍቲ ኢሳይያስ ኮይኑ መን ከም ኢሳይያስ ዝብል ዝነበረ ሜጀር ጀነራል ሃይለ ሳምኤል (ቻይና) ፡ ሎሚ  ኢሳይያስ ዓርኩ ጠሊሙዎ ንዕኡ ረሲዑ ንፍሊጶስ ምሉእ ጀነራል ምስ ሃቦ ምስ ኢሳይያስ ኣብ ምስሕሐብ ኣትዩ ፡ ኣደስኪሉ ኣብ ገዝኡ ኮፍ ካብ ዘብሎ ሓያለ ግዜ ኣሕሊፉ ‘ሎ።

እዚ፣ ‘ዝኣመነ ብሴፍ ዝኸሓደ ብሴፍ’ ዝብል ሓራዲ መትከል ኢሳይያስ፣ ሎሚ፣ ኣብቶም መጋድልቶም ገዳይም መራሕቲ ጉጅለ 15 ብሰንኪ ፖለቲካዊ ሕቶታት ብጅምላ እንክእሰሩ፣፣ ከምኡ ድማ መተዓብይቶምን ወዲ ከብዲ ዓዶምን ተጋዳላይ ቢተወደድ ኣብርሃ ኣብ ቤትማእሰርቲ ክሓቅቕ ከሎን ብስቕታን ተላኣኽነትን መጋበርያ ዝኾኑ ፋናን ቻይናን ‘ኢድ ሸናሒት ‘ ኮይኑ ግዜ ኣርኪቡዎም ምህላዉ፣ ነቶም ገና መሳርሒ ዓመጽ ኮይኖም ንውልቀመላኺ ኢሳይያስ ብምግልጋል ህዝቦም ዝውጽዑ ዘለዉ ሰበስልጣን ዓቢ ትምህርቲ እዩ።