ኤርትራ ሓደ ሰብኣይ ይሸነላ’ሎ

ውልቀ መላኺ ኢሳያስ፡ ካብ ጽፍሪ እግሩ ክሳብ ጸጉሪ ርእሱ ብትዕቢት፡ ብተንኮል፡ ብጃህራ፡ ብሓድሕድ ምንቋት፡ ብምስልባጥ፡ ብህርፋን ሽመት፡ ብጭካነን ብሕነ ምፍዳይን ዝተመልአ’ዩ። እዞም ባህርያትን ጠባያትን መታዓብይቲ ኢሳያስ’ኳ እንተኾኑ፡ ድሕሪ ናጽነት ኤርትራ’ዮም ዝያዳ ኣብ ቃልዕ ወጺኦምን ህዝብና ፈሊጥዎምን። ካብ ጽባሕ ናጽነት ኤርትራ፡ ኢሳያስ፡ መራሒ ውድብ ሓድነት ኣፍሪቃ፡ ዋና ጸሓፊ ውድብ ሕቡራት ሃገራትን በሓቲ ዞባዊ ውድባትን ክኽውን ሃነፍነፍ በለ። ኩሉ ሕልምታቱ ምስበርዓነ ግን ከም ኣንጭዋ ክልተ ዓንዴል፡ ንኻልኦት መራሕትን ሃገራትን ክውንጅል ከነኣእስን ከምኡ’ውን ኣብ ኤርትራ ልዕሊኡ ህቡባት ዝኾኑ ዜጋታት ክሃድን ስርሐይ ኢሉ ተተሓሓዞ። ኢሳያስ፡ እቲ መን ከማይ ሕማሙ እናሻዕ ስለዝደግሶ ድማ፡ ንዕኡ ንምሽፋን ካብ ዝጥቀመሉ ሽጣራታት ሓደ፡ ሰንሰለታዊ ወይ ምእኩል ኣሰራርሓ ብምጥሓስ፡ ርክባትን ኣኼባታትን ብምክያድ ንኻልኦት ምንጻልን ምድኻምን’ዩ። ንኣብነት ኢሳያስ ፎቆዶ ዓድታ፡ ቁሸታትን ኣሃዱታትን እናዞረ፡ ዝያዳ’ቶም ባዕሉ ዝመደቦም ኣማሓደርትን ኣዘዝትን ተቆርቛሪ ንምምሳል ናይ ኣለኹኹምን ኣምሰሉን መግለጺ የቅርብ። ይኹን እምበር፡ እቲ ኢሳያስ ዝጥቀመሉ ኣሰራርሓ ሽሕጣን ምዃኑ ንተራ ህዝቢ’ውን ስዉር ስለዘይኮነ፡ ማዕረ-ማዕረ’ቲ ንኢሳያስ ኣብ ዑደቱ ዝግበረሉ ውዳሰን ናይ ደስደስ ኣቀባብላን፡ ጸርፍን ምልጋጽን’ውን ይሰንቅ ኣሎ። ኣብ ናይ ሎሚ ጽሑፈይ፡ ገለ ካብቲ ውልቀ መላኺ ኢሳያስ ኣብ ዙሮቱ ብህዝቢ ዝተዋህቦ ንእንታይነቱ ዘንጸባርቅ ነቀፌታን ኣሽሙርን ከካፍለኩም።

“ዓዲ ተበላሽያ፡ ሓደ ሰብኣይ ይሸነላ’ሎ”

ሓደ መዓልቲ፡ ኢሳያስ ካብታ ተሓቢኡ ዝዝምወላ፡ ዝሰኽረላን ተንኮላት ዝኣልመላን ዘይወግዓዊት ቤተመንግስቱ፡ ዓዲ ሃሎ  ናብ ኣስመራ እናተመልሰ እንከሎ፡ ሓደ ብዕድመ ዝደፍኡ ኣቦ ብእግሮም ዘጓሕ እናበሉ ቀቅድሚኡ ክጓዓዙ ተዓዘበ። ኢሳያስ ኣብ ጥቃ’ቶም ኣቦ ምስ በጽሐ፡ ንመራሒ መኪናኡ ጠጠው ከብላን ነቶም ኣቦ ክሰቅሎምን ሓበሮ። እቶም ኣቦ፡ ኣብታ ማኪና መንከምዘሎ ኣፍልጦ ኣይነበሮምን ነቲ ዝተገብረሎም ሕያውነት ግን ዕዙዝ ምስጋናኦም ኣቅረቡ። ኢሳያስ ከምቲ ኩሉ ግዜ ብህዝቢ እንታይ ይብሃል ከምዘሎ ንምፍላጥ ናይ ጎደና ወረታት ንምእካብ ሰለይቲ ዘዋፍርን ባዕሉ ወልደፍደፍ ዝብሎን፡ ነቶም ኣብ ማኪናኡ ዘጓራበቶም ሰብኣይ፡ “ኣቦ ዓዲ ከመይ ኣሎ” ኢሉ ሓተቶም። እቶም ኣቦ ትቅብል ኣቢሎም፡ “ወይለ’ቦኻ ዓዲ ተበላሽያ ሓደ ሰብኣይ ይሸነላ ኣሎ” ኢሎም መለሱ። ኢሳያስ፡ መራሒ መኪናኡን ሓለውቱን ብመልሲ’ቶም ኣቦ ተገሪሞም ቱዋሕ ኢሉም ስሓቁ። ተጓዓዝቲ፡ ኣስመራ ክሳብ ዝኣትዉ ነታ “ዓዲ ተበላሽያ ሓደ ሰብኣይ ይሸነላ’ሎ” ትብል፡ ውስጠዘ ሓሳብን ኤርትራ ብሓደ መላኺ ውልቀ ሰብ ትግዛእ ከምዘላ እትገልጽ ሓያል ዘረባ ደጋገምዋ። ኢሳያስ ከምቲ ኣጥቢቁ ዝጠየቀ ሞት ኣዱ ተረድአ ዝብሃል፡ መልሲ ናይቶም ኣቦ ንዕኡ ከምትሃርም እናፈለጠ ጥርቅም በለን በሽካዕላል “ሓደ ሰብኣይ እምበኣር ይሸነላ’ሎ” በለ። መን ይፈልጥ ግን እቶም ኣቦ ሓቂ ስለዝደርጉሑ ኢሳያስ ኣጸናትዩ ይኣስሮም ይኸውን።

“ንሕና ዝተመነና ክንስለም ወርቂ ቢሻ ኢሳያስ ዝሃበና ካላሽን ራሻ” 

ኤርትራ፡ ኣብ ከርሲ መሬታ ዘሎ ባህርያዊ ጸጋታት፡ ሃብታምን ጽሩይን ገማግም ባሕሪ፡ ጆኦግራፍያዊ ኣቀማምጣን ምቹእ ኩነታት ኣየርን፡ ጠምዩ ዝሓደር፡ ትምህርቲ ዝሓርሞ፡ ብሕማም ዝሳቀ፡ ናብ ስደት ዘምርሕ ዜጋ ኣይምተረኽበን። እንተኾነ ብዘይ ቅርዑይ ስርዓተ ምምሕዳርን ፍትሕን፡ ኩሉ ከም ኣብ ከውሒ ዝተዘርአ እኽሊ’ዩ ዝቁጸር። ስርዓት ህግደፍ ወግሐ ጸብሐ፡ “ኣብ ኤርትራ ማዕድን ይድህሰስን ይኳዓትን ኣሎ፡ ኣብ ኤርትራ ኩባንያታት ወጻኢ ርእሰማለን የፍስሳ ኣለዋ፡ ኤርትራ መስሕብ በጻሕትን ማእከል ወፍርን ክትክወን’ያ” ዝብሉ ዘተሃራርፉን መሰጥትን ቃላት የኮማስዕ። ብግዱድ ጉልበት መንእሰያትና ማዕድናት ተሓፊሱን ቢልዮናት መኽሰብ ተረኺብዎን ከብቅዕ፡ ኣብ መነባብሮ ህዝብና ቅንጣብ ለውጢ እንተዘይኣምጺኡን ህዝቢ ኤርትራ ወናኒ ሃብቱ እንተዘይኮኑን፡ እቲ ኣብ ጁባ ውልቀ መላኺ ኢሳያስን ኮራኩሩን ዝኣቱን ከምኡ’ውን ብኩባንያታት ወጻኢ ዝገሓጥን ሽያጥ ጸጋታት መሬትና ንህዝብና ኣይንታዩን’ዩ። ነዚ ኩነታት’ዚ ዝተገንዘበ ህዝብና’ዩ ድማ፡ “ንሕና ዝተመነና ክንስለም ወርቂ ቢሻ ኢሳያስ ዝሃበና ካላሽን ናይ ራሻ” ኢሉ ብደርፊ መረርኡን ክውንነትን ዝገለጸ። ህዝብና፡ ኣምሳያ ናይቲ ዝኳዓት ወርቅን ዝሕፈስ እቶትን፡ ካላሽን ናይ ራሻ ክስከምን ብስም ሃገራዊ ኣገልግሎት ካብ መነባብርኡ ተመዛቢሎ ኣብ በረኻ ክሰፍርን’ዩ ዝግደድ ዘሎ። ኤርትራ ብሓደ ሰብኣይ ከይትውነንን ጸጋታታ ከይትሕደግን ኤርትራውያን ክንቃለስን ክንሰምርን ኣለና።

ጽላል፡ ካብ ሕቡራት መንግስታት ኣመሪካ (08 ነሓሰ 2016)