ኣብዚ ቀረባ ኣዋርሕ ከምሓላዪ ሰራዊት ተመሲሉ “ካብ ዝሓለፈ ዓመት ብውህሉል ዝሕሰብ ናይ ሰራዊት ደሞዝ ምውሳኽ ክግበር ኢዩ” ኢሉ ዝተመባጽዐ ውልቀመላኺ ኢሳይያስ፣ ከምቲ ንልዕሊ 15 ዓመታት ብተደጋጋሚ ዘታለሎ፣ ሕጂ ‘ውን ‘ ገንዘብ ኣጽዋር ኣብ ምግዛእ ኢና ነውዕሎ ዘለና’ ብምባል መብጽዕኡ ከምዝጠለመ ምንጭታት ሓቢሮም።

ንሱ ኣብ መወዳእታ ናይዚ ዝሓለፈ ወርሒ ሰነ ኣብ ደንጎሎ ብጠለብ ላዕለዎት ኣዘዝቲ ሰራዊት ኣብ ዝገበሮ ብሕታዊ ርክብ እዩ ከምዚ ክብል ኣመኽንዩ።

እቶም ክልተ ላዕለዎት ጀነራላት፣ ኣብቲ ርክብ ኩነታት ሰራዊት ፍታሕ ክግበረሉ ኣለዎ፣ ብሕልፊ ድማ ጉዳይ ደሞዝ ክትግበር ኣለዎ’ ክብሉ ሓቲቶሞ። ውልቀመላኺ ኢሳይያስ፣ እዚ ሕቶ ‘ዚ ናይ ውልቅኹም ዲዩ ዋላ ናይ ሓባር ክብል ንዘቕረበሎም ሕቶ ናይ ሓባር ምዃኑ ምስ ኣረጋገጹሉ ኸኣ፣ ነዚ ዝቐነየ ወተሃደራዊ ኩነታት መመኽኔታ ገይሩ “ብዛዕባ ደሞዝ ምዝራብ ተራእዩኩም፣ ኣጽዋር ኢና ንገዝእ ዘለና” ክብል ደሞዝ ናይ ምውሳኽ መደብ ተስፋ ከምዘይብሉ ከምዝገለጸሎም ተፈሊጡ።

ኣጽዋር ብዘይ ሞራል ዘለዎ ሰራዊት ትርጉም ከምዘይብሉ ፍሉጥ ብምዃኑ ሕቶ ናይቶም ኣዘዝቲ ሰራዊት ሕቶ እዋናዊ ‘ኳ እንተኾነ፣ ኢሳይያስ ከምዚ ኢሉ ነቲ ጉዳይ ከቍሻሹ ብዛዕባ ምሕደራ ሰራዊት እንዶ ከምዘይብሉ ዘመልክት ምዃኑ እቶም ምንጭታት ኣገንዚቦም።

እቲ ርከብ ብቐንዱ፣ እቲ ናይ መርማሪ ኮምሽን ሰብኣዊ መሰላት ጸብጻብ ብዝፈጠሮ ምስንባድ ተደፋፊኡ ዝተኻየደ እዩ።