መርማሪ ኮምሽን ሰብኣዊ መሰላት ኣብ ኤርትራ፣ ምልካዊ ስርዓት ኢሳይያስ ገበናት ኣንጻር ሰብኣውነት ከምዝፈጸመ ምስክርነት ድሕሪ ምሃቡ ክሳብ ትማሊ 1 ሓመለ ብቤትምኽሪ ሰብኣዊ መሰላት ውድብ ሕቡራት ኣብ ጀኔቫ ክዝተየሉ ዝቐነየ ጉዳይ ሰብኣዊ መሰላት ኤርትራ፣ እቲ ብስም ሶማልን ጅቡትን ንውሳኔ ዘቕረቦ ንድፊ ተቐጢኑ ድሕሪ ምድኻሙ ኣብ ክንዲ ናብቲ ዝለዓለ ኣካል ውድብ ሕቡራት ሃገራት ዝኾነ ባይቶ ጸጥታ፣ ናብ ሕብረት ኣፍሪቃ ተመሓላሊፉ።

እቲ ብቤትምኽሪ ሰብኣዊ መሰላት ውድብ ሕቡራት ሃገራት ዝቖመ መርማሪ ኮምሽን ኣብ ዝሓለፈ ወርሒ ኣብ ዘቕረቦ ጸብጻብ መራሕቲ ኤርትራ፣ ግፍዕታት፣ ጊላነት ናይ ኣሽሓት ኤርትራውያን፣ ጾታዊ ዓመጽን ቅትለትን ዘጠቓለሉ ገበናት ኣንጻር ሰብኣውነት ከምዝፈጸሙ ብምስካር ኣብ ኣህጉራዊ ገበናዊ ቤትፍርዲ (ICC) ክቐርብ ኳ ለበዋ እንተመሓላለፈ፣ እቲ ትማሊ 1 ሓመለ ዝሓለፈ ውሳኔ ግን፣ እቲ ኣብ ኒውዮርክ ዝመደበሩ ሓፈሻዊ ዋዕላ ውድብ ሕቡራት ሃገራት፣ ነቲ ናይ መርማሪ ኮምሽን ስራሕ “ ዝምልከቶም ኣካላት ውድብ ሕቡራት ሃገራት ንህጹጽ ስጉምቲ ኣብ ግምት ከእትዉዎ መእንቲ ከቕርበሎም” ክብል ሽፈፍ ኢሉዎ ሓሊፉ።

እቲ ፈለማ ዝቐረበ ንድፊ ሓፈሻዊ ባይቶ ውድብ ሕቡራት ሃገራት ብተሳታፍነት ባይቶ ጸጥታ ነቶም ገበነኛታት ብመንገዲ ኣህጉራውን ዞባውን ስርዓተ ፍርዲታት ተሓተቲ ክገብሮም ዝብል ብተዛማዲ ትርር ዝበለ ቋንቋ ‘ኳ እንተነበሮ ኣመሪካ ከይተረፈት ክፈኵስ ከምዘለዎ ድሕሪ ምጽውዓ እቲ ጉዳይ ብዝያዳ ብሕብረት ኣፍሪቃ ክምርመርን ተሓተቲ ናብ ፍርዲ ከቕርቦምን ዘተባብዕ ውሳኔ ኣሕሊፉ።

እቲ ድሮ ተቓውሞታቱ ክገልጽ ዝጸንሐ ምልካዊ ስርዓት ኢሳይያስ ነቲ ውሳኔ፣ ብኣመሪካን ሕብረት ኤውሮጳን ዝተሃንደሰ እዩ ክብል ነጺጉዎ።

ከም ብዓል ራሻ፣ ቻይና፣ ኩባ፣ ቦሊቭያ፣ ኤኳዶር ዝኣመሰላ ሃገራት ከምዘይሰማማዓሉ ብምግላጽ ካብቲ ውሳኔ ክስሕባ ከለዋ፣ እተን ዝበዝሓ ካልኦት ሃገራት ግን ብስምምዕ ‘የን ነቲ ውሳኔ ኣሕሊፈናኦ።