ምልካዊ ስርዓት ኢሳይያስ ኣብ ከረን፣ መጋርሕ፣ ናይ ኮርያ ኩባንያ ኣብ ዝሃነጾ ኣባይቲ ንዝቕመጡ ዝነበሩ ዓይነ ስዉራን ቆራጻትን ተጋደልቲ ዝርከቡዎም ውጹዓት ኤርትራውያን ካብ ኣባይቶም ብሓይሊ ኣውጺኡ ንብረቶምን ሰቦምን ኣብ ጎደና ከምዝዛሕዝሖ ምንጭታት ሓቢሮም።

እቶም ኣብቲ ዞባ ንነዊሕ ዓመታ ዝተቐመጡ ግዳያት ኣማራጺ ከምዘይብሎም ብምሕባር ተቓውሞ ኳ እንተስምዑ ሰማዒ ኣይረኸቡን።

ካብቲ ኣባይቲ ክወጹ ዝተሰማምዑ ገለ ግዳያት መፍትሖም ከረክቡ ናይ ክልተ መዓልቲ ዕድል ኳ እንተሃቡዎም፣ እቶም ኣማራጺ ዘይብሎም ግን ምስናይ ብስጭትን ሕርቃንን ብኽያትን ኣብ ጎደና ተሰጢጦም ከምዝወዓሉ እቶም ምንጭታት ኣገንዚቦም።

እቲ ኣብ ጽባሕ መበል 25 ዓመት ናጽነት ዝጀመረ ቅልውላው ስድራቤታት ክሳብ ሕጂ መዕረፊ ከምዘይረኸበ ብተወሳኺ ተፈሊጡ።