ክለብ ኩዕሶ እግሪ ለስስተር ሲቲ ናይዚ ዓመት እዚ ዋንጫ ፕረሜር እንግሊዝ ጨቢጣ:: እዛ ዓሚ ንድሕሪት ካብ ምምላስ ብቃልሳ ዝደሓነት ጋንታ ለብዘበን ዋንጫ ክትዓትር ዝሓለመ ኣፍቃሪ ኩዕሶ ኣይነበረን::ዋንጫ ናይ ምጭባጣ ምጣነ 5000 ብ 1 ከም ዝነበረ ጸብጻባት የመልክቱ:: ንምንጽጻር ክጥዕም ኣብ 60ታት ዝሞተ ኣሜሪካዊ ሙዚቀኛ ኢልቪስ ፕረስሊ ብሂወት ኣሎ ኢሎም ዝኣምኑ 2000 ብ 1 ከምዝኾነ ምስ እንምልከት ለስስተር ሲቲ ክትዕወት ሕልሚ ደርሆ ከምዝነበረ ኢዩ ዘረጋግጽ::

ኩዕሶ እግሪ ፕረሜር እንግሊዝ ኣብ ዝሓለፈ 21 ዓመት ብጋንታት ኣርሰናል: ማንቸስተር ሲቲ: ማንቸስተር ዩናይትድን ቸልሲን ተባሒቱ ጸኒሑ:: እዘን ጋንታታት ንተጻወቲ ኣብ ምግዛእ ዘውጽአኦ ገንዘብ ነቲ ግጥም ብዓብላልነት ክመርሓ ኣብቂዕወን ጥራይ ዘይኮነ: እንኮ መንገዲ ዓወት ቢልዮናት ዶላራት ምፍሳስ ከም ዝኾነ ኣብ ብዙሓት ሰዓብቲ ዝሰረተ እምነት ገበሮ::እንተኾነ ነዚ እምነት ኣብ ሑጻ ከም እተሰረተ ቤት ሃዶሽ ዘበለ ፍጻመ ለብዘበን ተኸሲቱ:: ለስስተር ሲቲ ንብዙሓት መልሓሶም ኣሐይኻ::

ናይ መላእ ጋንታ ለስስተር ሲቲ ዋጋ ማለት ናይቶም 23 ተጻወቲ 57 ሚሊዮን ፓውንድ ክኸውን ከሎ ማንቸስተር ሲቲ ንሓደ ተጻዋተይ ዝኸፈለቶ ዋጋ ግን ልዕሊኡ ኢዩ:: ድምር ዋጋ ክለብ ለስስተር ሲቲ 50 ሚልዮን ፖውንድ ምስ ናይ ማንቸስተር ሲቲ ልዕሊ 400 ሚልዮን ፓውንድ ምንጽጻሩ ኣብ መንጎ እዘን ጋንታታት ዘሎ ጋግ ርእሰ ማል ምግማት ይከኣል::ብዘይካዚ ኣብ ማሕበራዊ መራኸቢታት ምስ እንምልከት ለስስተር ሲቲ ፍርቂ ሚልዮን ሕሳባት ትዊተር ኣለዎም: ኣርሰናል ግን ሸውዓት ሚልዮንን ፈረቓን ማንቸስተር ሲቲ ድማ ልዕሊ ሰለስተ ሚልዮን ኣለዎም::

ነታ ጋንታ ናብ ዓወት ዘብጽሓ ኢጣልያዊ ክላውድዮ ራኔሪ ኣብ ፕረሜር እንግሊዝ ዝና ዝነበሮ ሰብ ኣይኮነን:: ተጻወቲ እውን ገለ ካብ ታሕተዎት ክለባት ዝመጽኡ ገለ እውን ብዙሕ ዘይፍለጡ ዝነበሩ ኢዮም:: ቫርዲ ዝተባህለ እንግሊዛዊ ኣብ መስመር ምጥቃዕ ተሰሊፉ ዝበዝሐ ሸቶታት ብምምዝጋብ ዝፍለጥ ፈጣን ተጻዋታይ ንኣብነት ኣብ ጋንታታት ሊግ ዘይተጻወተ ተራ ሸቃላይ ፋብሪካ ነበረ:: ኣልጀርያዊ ማህረዝ እውን ካብ ሓንቲ ንእሽቶ ክለብ ፈረንሳ ብ 400,000 ፖውንድ ናብ ለስስተር ሲቲ ዝተሰጋገረ ኢዩ:: ንሱ ነቶም ብሚዛንን ኣካላዊ ብቕዓትን ንዝዕብልልዎ ተኸላኸልቲ ብጸጋማይ እግሩ ኩዕሶ እናፈተለ ብምፍንጣስ ንደቂ ጋንታኡ ብምቕባልን ባዕሉ ናብ ሰኪዐት ከምእትሰራሰር ዝገበረን ድንቂ ተጻዋታይ ኢዩ::እዚኦም ክልተ ተጻወቲ ናይዚ ዓመት እዚ ብሉጻት ተባሂሎም ዋንጫ ተሸሊሞም:: እንተኾነ እቲ ዓወት በዞም ክልቲኦም ጥራይ ክረጋገጽ ኣምበይምተኻእለን:: ሓለቃ ጋንታ ጃማይካዊ እንግሊዛዊ ሞርገን ንመስመር ምክልኻል ምስ ጀርመናዊ ሁት ብኣየርን ባይታን እንተዘይርግጥዎ: ሓላው ልደት ደንማርካዊ ሹማከል ከም ገበል ተወርዊሩ ጎላት  እንተዘይድሕን ዓወት ኣይምሃለወን:: እዚ ጥራይ እውን ኣይኮነን ኣብ የማንን ጸጋምን ክንፊ ምክልኻል ዝጻወቱ: ከምኡ እውን ኣብ ማእከል ሜዳ ትንፋሱ ከይነከየ ሓደሰዓትን ፈረቓን ዝጎይይን ኣንፈት ንፋስ ተገንዚቡ ኩዕሶ ዝምንጥልን ዘከፋፍልን ወዲ ማሊ ዜጋ ፈረንሳ ካንተ እንተዘይህሉ እቲ ውጽኢት ኣይምተሓፍሰን::

ምስጢር ዓወት ክለብ ለስስተር ሲቲ ግን በቶም ኣብ ሜዳ ተሰሊፎም ዘርኣይዎ ብቕዓት ዝድረት ኣይኮነን:: ኣሰልጣኒኦም ኢጣልያዊ ክላውድዮ ራኔሪ ንግጥማት ጥራይ ዘይኮነ ንስነኣእምሮኣዊ ኩነታት ተጻወቲ ናይ ምንባብን ሞራል ናይ ምሃብን ፍሉይ ክእለት ኣለዎ:: ጸወታ ክዛዘም ሒደት ደቓይቕ ክተርፎ ከሎ እውን እንተኾነ ኣብ ገጹ ዝርአ መንፈስ ጭንቀት የልቦን:: ጋዜጣዊ መግለጺ ኣብ ዝህበሉ ጊዘ ብርጉእን ፍሕሽውን ፍሱህን ገጽ ክቐርብን ኣብ ሓደ እዋን ንኩሎም እቶም ጋዚጠኛታት ብኢዱ ሰላምታ ብምሃብ መንበሩ ክሕዝ ተራእዩ:: ብዘይካዚ እታ ጋንታ ኣብ መላእ እቲ ዘካየደቶ 18 ግጥም ሰለስተ ጊዜ ጥራይ ኢያ ተሳዒራ:: ድሕሪ እቲ ምስ ኣርሰናል ኣብ ዘካየደቶ ግጥም ዘጋጠመ ስዕረት ድማ ራኔሪ ነቶም ተጻወቲ ክዘናግዑን ዝማእመኦም ክገብሩን ናይ ሓደ ሰሙን ዕረፍቲ ምሃቡ ካብቲ ዝምስገነሉ ባህርያት ከም ዝኾነ ይጥቀስ::

ወነንቲ እታ ጋንታ ታይላንዳውያን ብወገኖም ኣብ ዓወት ዓቢ እጃም ነይርዎም::ኣብ ታይላንድ ንዝርከቡ መነኮሳት ቡድሃ ብጸሎት ክድግፍዎምን ክባርኽዎምን ለሚኖም:: ሓደ ካብቶም መነኮሳት” እቲ ዓወት ብቀንዱ ናይቶም ተጻወቲ ኢዩ:: ስታፋት ኣሰልጠንቲ: ደገፍቲ እውን ዓቢ ተራ ኣለዎም:: ንሕና እውን ብምሉእ ልብና ደጊፍናዮምን ባሪኽናዮም ኢና” ክብል ገሊጹ::

ዓወት ለስስተር ሲቲ ንዓወት ኣብ ስፖርት ጥራይ ዝምልከት ኣይኮነን:: ሰባት ኣብ መዓልታዊ ሂወቶም: ኣብ ፖለቲካ: ቁጠባን ማሕበራዊ ሂወትን ክመሃሩሉ ዝኽእሉ ኢዩ:: ጽንዓት ክሳብ መወዳእታ: እታ ሓደ ዘጉደሎ እቲ ካልእ ከም ዝምልኦ ምግባር: እምነት ኣብ ዓወት: ሓድነት ኣብ መንጎ ተጻወቲን ኣካይድትን ወነንትን: ርእይቶ ምስማዕን ኣብ ተግባር ምውዓልን ጎሊሖም ካብ ዝተራእዩ ብልጫታት ለስስተር ሲቲ ኢዮም::መሰረት እንተደልዲሉን ምትእምማን እንተሰፊኑን እቲ ዘይክኣል ዝመስል ወይ ብገለ ከም ጽውጽዋይ ዝመስል ክጭበጥ ከም ዝከኣል ለስስተር ሲቲ ድሕሪ 132 ዓመት ኣብ ታሪኻ ብዘመዝገበቶ ዓወት ኣረጋጊጻቶ::ለስስተር ሲቲ: እንግሊዛውያን: ኣውስትርያዊ: ስዊትዘርላንዊ: ደንማርካዊ: ጀርመናዊ: ኣልጀርያዊ: ጋናዊ: ኣርጀንቲናዊ: ጃፓናዊ ዝሓቖፈት ተኣምር ዝሰርሐት ጋንታ ኢያ:: እታ ጋንታ ዋንጫ ኣብ ዝጨበጠትሉ ደገፍቲ ብዝገበርዎ ምንቅስቓስን ጭፈራን ከተማ ለስስተር ሲቲ 0.4 ስይስሞመተር ተመዝጊብዋ ዳርጋ ናብ ምንቅጥቃጥ መሬት ዝተጸገዕዩ ይብሉ ተመራመርቲ: ነውጺ ቫርዲ ድማ ኢሎሞ ብስም እቲ ህቡብ ኣጥቃዓይ:: ተመሳሳሊ ታሪኽ ክድገም ጊዘ ክወስድ ኢዩ::

ዕውት ኩሉ ይፈትዎ:- እነሆ ድማ እቶም ነታ ጋንታ ናብ ዓወት ዘብጽሕዎ ገዚፍ ጠለብ ረኺቦም::

ኣሰልጣኒ ራኔሪ ንሃገራዊት ጋንታ ኢጣልያ ኣብ ዋንጫ ዓለም ክመርሕ ብፈደረሽን ኩዕሶ እግሪ ሃገሩ ተዓዲሙ:: ንኣልጀርያዊ ማህረዝ ዝድግፉ ደቂ ዓዱ ፍርቂ ሚልዮን ናይ ትዊተር ኣካውንት ከፊቶም:: ኣብታ ኩዕሶ እግሪ ብዙሕ ዘይፍለጠላ ታይላንድ ስእሊ እንግሊዛዊ ቫርዲ ዝተረከሞም ማልያታት ብሚልዮናት ተሸይጡ:: ክልቲኦም ተጻወቲ ድማ ዝናኦምን ዋጋኦምን ብ100% ዓብዩ::ራኔሪ ንምስጢር ዓወት ብሓንቲ ግን ገላጺ ቃል ኣቐሚጥዎ::

ጽምኣት: ጽምኣት: ጽምኣት ንዓወት::hungry… hungry… hungry