ጥሪ 18, 2016,

መግለጺ መሪር ሓዘን ብምኽንያት ሞት

ኣቦና ቀሺ ሓይልኣብ ቀሺ ካሕሳይ ፣

ክቡር ኣቦና ቀሺ ሓይልኣብ ብዕለት 14 ጥሪ, 2016 ብዘጋጠሞም ናይ መኪና ሓደጋ ካብዛ ዓለም ብሞት ተፈልዮሙና።  ብሃንደበታዊ ሞት ናይ ቀሺ ሓይልኣብ ኣዝዩ ከቢድ ስንባደን መሪር ሓዘንን ተሰሚዑና፤ ሞት ናይ ኣቦና ቀሺ ሓይልኣብ ብዝያዳ ነቶም ክቡራት ስድራ ቤቶም ብፍላይ ብጣዕሚ መሪር እኳ እንተዀነ ፣ ብሓፈሻ ድማ ንኹሎም ሓቀኛ ኣመንቲ ኦርቶዶክሳዊት ቤተ ክርስትያንን ደለይቲ ፍትሕን ብጣዕሚ ዓቢ ጥፍኣት እዩ።

ኣቦና ቀሺ ሓይልኣብ ካብቶም ብጽንዓትን ጸሎትን ነቲ ዘይሕጋውን ዘይንቡርን ምልጋስን ምእሳርን መራሒ ጳጳስ ናይ ኦርቶዶክስ ኣትሪሮም ክቃወሙ ዝጸንሑ ተባዕ መንፈሳዊ መራሒ’ዮም። ብሰንኩውን ኣብ ሂወቶም ብዙሕ ፈተነታት ሽግርን ከጋጥሞም ጸኒሑ’ዩ። ንጉጅለ ህግደፍ ስለ ዘይተማእዘዙ  ካብ ዘገልግልዎ ዝነበሩ ቤተ ክርስትያን ኣብ ከተማ ኦታዋ ኣባሪረሞም። ካብ ህልኽን ህውከትን ንምድሓን ድማ ሰላም ክረኽቡ ስድራ ቤቶም ሒዞም ናብ ኣልበርታ -ፎርት-ማክመሪ ዝብሃል ከተማ ጉዒዞም። ጽቡቕ መነባብሮ ሰሪቶም ሂወቶም ብሰላም ክመርሑ ድሕሪ ምጽናሕ እዚ ሃንደበታዊ ሞት ኣጋጢምዎም።

ቀሺ ሓይልኣብ ኩሉ ጊዜ ፍቕርን ስኒትን ዝሰብኩ ብናይ ህዝቦም ስቓይ ዝሓሙ ደላይ ፍትሕን ሰላምን እዮም ኔሮም። ኣብ መንፈሳዊ እምነቶም ጽኑዕ ከምቶም ስቓይ ህዝቦምን ግህሰት ሃይማኖቶምን ረሲዖም ብዓለማዊ ረብሓ ዝሰዓዱ መንፈሳዊ ጥልመት ዝፍጽሙ ኣገልገልቲ ጨካን ጉጅለ ህግደፍ ኣይነበሩን።

ንኣቦና ቀሺ ሓይልኣብ መንግስተ ሰማያት የዋርሶም ፣ ንስድራቤቶም ድማ ጽንዓት ይሃቦም ጠሊ ይሕደጉሎም ብምባል ናይ ሓዘኖም ተኻፈልቲ ምዃና ንገልጽ።

ካብ ደለይቲ ፍትሒ( ከተማ ኦታዋ)