ምልካዊ ስርዓት ኢሳይያስ ቅድሚ 8 ዓመት ንፓትርያርክ ኦርቶዶክሳዊ ቤተክርስትያን ኣቡነ እንጠንዮስ ብኢደወነኑ ብሓሊ ወጊዙ ኣብ ክንድኦም ኣብ መንበረ ጵጵስና ኣቐሚጡዎም ዝነበረ ኣቡነ ዲስቆሮስ ብሕማም ሎሚ 21 ታሕሳስ ከዝዓረፉ ምንጭታት ሓቢሮም።

ኣቡነ ዲስቆሮስ ኣብ ዝሓለፈ ክልተ ዓመት ብወቕዒ ፍርቂ ኣካላቶም ለሚሱ ኣብ ሱዳን ኣብ ሕክምና ተዓቝቦም ድሕሪ ምጽንሖም ናብ ኤርትራ ካብ ዝምለሱ ኣብ ንጡፍ ስራሕ ‘ኳ እንተዘይጸንሑ እቲ ስርዓት ንጥዕናዊ ኩነታቶም ከዊሉ ብስሞም ክጥቀም ከዝጸንሐ ይፈልጥ።

ምልካዊ ስርዓት ኢሳይያስ፣ ንፓትርያርክ ኣቡነ እንጠንዮስ ንልዕሊ 8 ዓመታት ኣብ ናይ ገዛ ማሕዩር ዳጕኑ ንይፍታሀ ዲሜጥሮስ ከም መጋበርያ ፖለቲካኡ ኣብ ጎኒ ኣቡነ ዲስቆሮስ ብምጽጋዕ ንኦርቶዶክሳዊት ቤተክርስትያን ኣደዳ ሕድሕድ ምትፍናን ምክፍፋልን ከምእትኸውን ብምግባር ኣብ ታሪኻ ኣጋጢሙዋ ናብ ዘይፈልጥ ውድቀት ከዘብጽሓ መራሕቲ ሃይማኖትን መእመናንን ነዚ ዝሓለፈ ሓያለ ዓመታት ከማርሩ ጽኒሖም እዮም።

ኣቡነ እንጠንዮስ ናይ ፓትርያርክ ስልጣኖም ክምለሰሎም ብምምሕጻን ቀጻሊ ጎስጓስ ከምዘካይዱ ‘ውን ይፍለጥ።