ሕብረት ኤውሮጳ ንህግደፍ 200 ሚልዮን ኤውሮ ክህብ መዲቡ:: እቲ ሕብረት ነዚ ካብ 2016-2020 ኣብ ሓሙሽተ ዓመት ዝህቦ ሓገዝ ኣብ ምምሕዳርን ጸዓትን ዝውዕል ከምዝኾነ ተገሊጹ:: ሕብረት ኤውሮጳ ምስ ዝኾነት ሃገር ቁጠባዊ:ፖለቲካውን ባህላውን ሽርክነት ንምግባር ቅድመ ኩነት ገይሩ ዘቐምጦ ነጥብታት ምስ እንምልከት ኣንጻር ዕላማታቱን መትከላቱን ይሰርሕ ከምዘሎ ንጹር ኢዩ::

ሕብረት ኤውሮጳ ዝምርሓሉ መትከላት ምትሕግጋዝ:-

-መሰል ደቀንስትዮ: ቆልዑ: ንኡሳን ክፍልታት ሕብረተሰባትን ካብ መነባብርኦም ዝተመዛበሉ ሰባትን ምሕላው::

-ብሞት ዝወሃብ ብይን ምቅዋም: ንሰብ ምስቓይ: መሸጣ ሰብ(human trafficking): ኣድልዎን ምቅዋም

-ንሲቪላዊ: ፖለቲካዊ: ቁጠባዊ: ማሕበራውን ባህላውን መሰል ምጥባቕ::

ንኣድማሳዊን ዘይንጸልን ባህርይ ሰብኣዊ መሰል ምጥባቕ:: እዚ  ብንጡፍ ሽርክነት ምስ ሃገራት: ኣህጉራዊን ዞባውን ውድባት ከምኡ እውን ጉጅለታትን ማሕበራትን ይፍጸም::

ነዚ ንምፍጻም ሕብረት ኤውሮጳ ካብ 2014-2020 ንመሰረታዊ ናጽነት: ዲሞክራሲን ግዝኣተ ሕግን ምስ ዝጣበቐ ማሕበራት: ጉጅለታትን ውልቀሰባትን ንምስራሕ 1.3 ቢልዮን ኢውሮ መዲቡ ከምዘሎን እቲ ቅድመ ኩነት ዘቐመጦ ድማ ምኽባር ሰብኣዊ መሰል ከምዝኾነ ኣብ ዕላዊ መግለጺኡ ኣስፊርዎ ኣሎ::

ሕብረት ኤውሮጳ ዘርዚርዎ ንዘሎ ብጹእ ዕላማታት ህግደፍ ሓምቲሉ ኣብ ጎድፍ ደርብዮዎ ኢዩ::

መሰል ደቀንስትዮ- ኤርትራውያን ደቀንስትዮ ኣብ ሰዊት ዕድመአን ኣብ ግዱድ ኣገልግሎት ኣዘዝቲ ሰራዊት ተቖሪነን ከቢድ ስነ ኣእምሮኣውን ኣካላውን ጉድኣት ይበጽሐን::እተን ዕድመአን ንሓዳርን ውላድን ዝበጽሐ እውን ብሰንኪ ቁጠባዊ ጸገም ኣብ ኣነዋሪ ስራሕ ክኣትዋ ተገዲደን::ዓቕለን ዝጸበበን ድማ ነብሰንን ደቀንን ለኪመን ኣብ ዘስካሕክሕ መጻወድያ ጨካናት ነጋዶ ሰብ ይወድቃን ሂወተን ይስእናን ኣለዋ::

እቶም መዓንጣ ዘይቆጸሩ ቆልዑት ቀንዲ ግዳያት ናይ እዚ ህግደፍ ዝፍጽሞ ዘሎ ንስድራቤት ዝበታትን ኣካያዳ ኢዮም:: ኣብ መደበራት ስደተኛታት ኢትዮጵያ መግቢ: ክዳን ክወሃቦም ተሰሪዖም እንርእዮም ቆልዑ: ኣብ ሱዳን: ሊብያን ስግር ባሕሪ ኤውሮጳን ኣላይ ስኢኖም መዛረቢ ማዕከናት ዜና ዓለም ኮይኖም ዘለው ኤርትራውያን ቆልዑ ኢዮም::

ንኡሳን ክፍልታት ሕብረተሰባት:- ኣብ ኤርትራ ኩሉ ህዝቢ ብኩርማጅ ህግደፍ ተገሪፉ:: ካብኡ ናብኡ ግን ኩናማ ኣብ ጋሽ ባርካ: ዓፈር ኣብ ደንካልያ መሪር ሂወት የሕልፉ ኣለው:: ኩናማ እቲ ንዘመናት ሓሪሶም ዝበልዑሉ ለሰታት ጋሽ ብህግደፍ ተመንዚዖም:ኣብ ገዛእ መረበቶም ቀሲኖም ክነብሩ ኣይከኣሉን:: ዓፈር ዓሳ ገፊፎም ነብሶም ከይክእሉን ናብ ኣብቲ ባህርይ ዝለገሰሎም  ባሕሪ ጀሊቦም ነጊዶም ነብሶም ከይጥውሩ ተኣጊዶም ብደርቂን ወተሃደራዊ መግዛእቲ ተለብሊቦም ኣለው::

ብሞት ምቕጻዕ:ምስቓይ: መሸጣ ሰብን ኣድልዎን:- ኣብ ኤርትራ ኣብ ቤት ፍርዲ ከይቀረቡ ዝሞቱ ብዙሓት ኢዮም::እተን ኣስታት 360 ማእሰርቲ ዓቑረንኦ ዘለዋ ስቅያት ኤርትራውያን ንምፍላጥ ዘረባ ናይ እቲ ንብዓት ስዒርዎ” መን ዶ ርእይዎም ዩ ኣብ ኣብያተ ማእሰርቲ ነብሶም ጻዕዳ ተቐይሩ ዘሎ” ብምባል ዝገለጸ ኮለነል ተወልደ ሚኪኤል               ምዝካር ኣኻሊ ኢዩ::መርማሪ ኮሚሽን ሰብኣዊ መሰላት ኣብ ኣብያተ ማእሰርቲ ዝፍጸም ግፍዕታት ናይ ዓይኒ መሰኻኽር ምርኩስ ብምግባር ኣብ ዘቕረቦ ጸብጻብ ገበናት ኣንጻር ሰብኣውነት ተፈጺሙ ክኸውን ከም ዝኽእል ገሊጹ ኢዩ::

መሸጣ ሰብ- ኣብ ዶባት ዘለው ኣዘዝቲ ሰራዊት ኣብዚ ዕሙር ዕዳጋ ኮይኑሎም ዘሎ መሸጣ ሰብ ምስ ራሻይዳን በደዊንን ብምትሕብባር ንፍቕዲ ዘጸገም ገንዘብ ከምዘኻዕበቱ ውድብ ሕቡራት ሃገራት ኣብ ጸብጻቡ መዝጊብዎ ኣሎ::

ሕብረተ ኤውሮጳ ምስ ሃገራት ዝገብሮ ምትሕግጋዝ ሰብኣዊ መሰል ብቐዳምነት ዝሰርዕ እንተኾይኑ: ነዚ መባእታዊ መሰል ሰብ ረጊጹ ዝኸይድ ሕጊ ኣልቦ ጉጅለ ንጸዓት: ንምምሕዳር ብምባል 40 ሚልዮን ኤውሮ ንዓመት ምምዳቡ ንምንታይ ዕላማ ኢዩ::

1. ሚኒስተር ቁጠባን ምትሕብባርን ጀርመን ኣብ ዚ ሰሙንዚ ምስ ኢሳያስ ተራኺቡ:ብዛዕባ ፖለቲካዊ ዲሞክራሲ: ሰብኣዊ መሰል:ቁጠባውን ባህላውን ሽርክነት ከም እተዘራረበ ማዕከናት ዜና ህግደፍ ገሊጸን::ኢሳያስ ብዛዕባ ሰብኣዊ መሰልን ዲሞክራሲን ክዘራረብ ዘለዎ ናይ መወዳእታ ሰብ ኢዩ:: እዚ ዜና እዚ ዘመልክቶ ነገር ህግደፍ ፖለቲካ ክኢልዎ ደሓን እቲ ገንዘብ ይሃቡና ምበር ንዘረባ እንታይ ከይንዓድየሉ ብምባል ዘቀናበሮ ከምዝኾነ ናይ ቀረባ ተዓዘብቲ ይገልጹ::
2. ኣብ ዝሓለፈ ሰሙን ብተመሳሳሊ: እቲ ሰብኣዊ መሰል ዝብል ኣምር እፉፋ ዝገብረሉ ጉጅለ: ኣብ መበል 67 ዓመት ምኽባር ሰብኣዊ መሰል ውድብ ሕቡራት ሃገራት ኣብ ኣብ ኣስመራ ሰበስልጣን ህግደፍ ተሳቲፎም:: ዑስማን ሳልሕ ሚኒስተር ጉዳያት ወጻኢ ህግደፍ: ኣብ ኤርትራ ሰብኣዊ መሰል ከም ዝኽበርን: መርማሪ ኮሚሽን ስብኣዊ መሰል ኤርትራ ዘቕረቦ ጸብጻብ ንኤርትራ ንምጽላም ዝተሃንደሰ ውዲት ጸላእቲ ከምዝኾነ መዲሩ::

ሕብረት ኤውሮጳ በዚ ጸወታ ሰበስልጣን ህግደፍ ተመሲጡ ክኸውን ይኽእል ወይ  ዓቕሎም ኣጽቢቡሎም ዘሎ ዋሕዚ ስደተይናታት ንምግታእ ክሕግዝዎ ስለዝደልዩ  ዝብሉ ወገናት ኣይተሳእኑን:: እቶም ዝበዝሑ ግን ካብ እዚ ጸቢብ ዓንኪል ወጺኦም ብዞባውን ኣህጉራዊን ደረጃ ይጥምትዎ:: ኢሳያስ ገባርን ሓዳግን ኮይኑ: ንስትራተጅያዊ ማያት ቀይሕ ባሕሪ ከም እቲ ንሕቡራት ኢማራት ዓረብን ስዑድያን ኣንጻር ሑቲ ናይ የመን ዘካየደኦ መጥቃዕቲ ንወደብ ዓሰብ ዘፍቀደለን ንዝደለዮ ወገን ከፍቅድን ክኽልክልን ስለዝኽእል: ሃገራት ምዕራብ ነቲ ኣብ ጽልዋ መወዳድርቲ ቻይና ከይወድቕ ዝሰግኣሉ ዞባ  ንኢሳያስ ኣቀባጢረን ክቆጻጸርኦ ስለዝደለያ ኢዩ ዝብል ርእይቶ የቐምጡ:: ብዘይካዚ ኤርትራ ዘይተዳህሰሰ ዕቑር ሃብቲ ማዕድንን ባሕርን ስለዘለዋ ብኩባንያታቶም ሕሱር ጉልበት ሰብን ብሉጽ ሃብትን ንምግባት እቲ ዝቐለለ መገዲ ስለዝኾነዩ ይበሃል::

ካብዚ ዝተፈለየ ርእይቶ ዘለዎም ወገናት ነዚ ሕብረት ኤውሮጳ ምስ ህግደፍ ዝገብሮ ዘሎ ሕግብግብ ምስ ድኻም ተቓወምቲ ወገናት ብምንጽጻር ይመዝንዎ:: ኣብ ውሽጢ ኤርትራ ዘሎ ህዝቢ ብከቢድ ናይ ስለያን መሓውራት ተቐፊዱ መተንፈሲ የብሉን:: እቲ በብመዓልቱ ካብ ግዱድ ኣገልግሎትን ጭቆናን ህግደፍ ዝወጽእ ኣሽሓት መንእሰይ ኣብ ውሕስ ቦታ ምስ በጽሐ ጠርኒፉ ንመሰሉ ዘቃልሶ ኣይረኸበን:: እተን ንልዕሊ 20 ዓመት ብዝተፈላለየ መልክዕ ተወዲበን ዝቃለሳ ውድባት ተቓውሞ ሓደ ናይ ሓባር መሪሕነት መስሪተን ንህግደፍ ክብድሀኦ ኣይበቕዓን:: በዚ ድማ መተካእታ ህግደፍ ዝኸውን ዘተኣማምን ሓይሊ ክሳብ ዘይተረኽበ: ሕብረት ኤውሮጳ ምስ ህግደፍ ብምጽማድ ፖሊሲኡ ክቕይር ምድፋእ ዝሓሸ ኮይኑ ረኺብዎ ዝብሉ ወገናት ኣለው::

በዚ ይኹን በቲ ኤውሮጳ ኣዒንታ ጸቒጣ ንህግደፍ ቁጠባዊ ሓገዝ ትህቦ ኣላ::  ከም እቲ ነብሪ ቆርበቱ ዘይቅይር: ህግደፍ እውን ድሕሪ እቲ ቅዋም ምቕባሩን:ሂወት ኣሽሓት ኤርትራውያን ብኣሊፍ ምቕጣፉን: ኣብ ዓዲ ሃሎ ወይ ዓዲ ራእሲ ማጨሎት ተሓጺቡ ክነጽህ ኣይኮነን::እንኮ ፍታሕ ኤርትራ ጽፉፍ ወዳበ ብቅኑዕ መሪሕነት ንመሰረታዊ ለውጢ::

ደጎል ድራር