መኒኻ ኣብ መቃብር ስዉኣት ትስዕስዕ ዘለኻ

መኒኻ ግዱዓት ወለዲ ተንብዕ ዘለኻ

መኒኻ ብዕድል ህጻናት ትላገጽ ዘለኻ

መኒኻ ብደም ኣሕዋትካ ትስውድ ዘለኻ፡ እምበር’ዶ-ኤርትራዊ ኢኻ!!

 

መኒኻ ኣደ ሓርበኛ ተሕዝን ዘለኻ

መኒኻ ኣቦ ጅግና ተቋሽሽ ዘለኻ

መኒኻ ብህይወት ንጹሃት ትጣላዕ ዘለኻ

መኒኻ ብኽቱር ስስዐ ዓዊርካ ዘለኻ፡ እምበር’ዶ ብዓል ሕልና ኢኻ!!

 

መኒኻ ወገንካ እናተረግጸ ኣስቂጥካ ዘለኻ

መኒኻ ሃገርካ እናበረሰት ኣእዳውካ ኣጣሚርካ ዘለኻ

መኒኻ ጎረቤትካ ጾሙ እናሓደረ ተቃይሕ ዘለኻ

መኒኻ ሕሰም ህዝብና ተናውሕ ዘለኻ፡ ጸገም ሓላፊ ምዃኑ ትፈልጥ ዲኻ።

 

መኒኻ ምስ ጨካን ስርዓት ህግደፍ ወጊንካ ዘለኻ

መኒኻ ዜጋታት ትኣስር ትቀትል ተጋፍዕ ዘለኻ

መሬት ምስ ወግሐ ኣበይ’ዩ መእተዊኻ

ኣብ ፍርዲ ምስ ቀረብካ እንታይ’ዩ መልስኻ፡ ኣይትሓስብን ዲኻ መጻኢኻ።

 

መኒኻ ኣብ መርዛም ከስዐ ህግደፍ ደቂስካ ዘለኻ

እንታይ’ዩ ዓሚቱካ ህዝብኻ ክድፈር እናርኣኻ

እንታይ ዓኒዱካ ደም ወገንካ ክወሕዝ እናሰማዕካ

ንመሰል ውጹዓት ዓገብ ኣይትብልን ዲኻ፡ ሞት ፈሪሕካ ኣበይ ክትኣቱ ኢኻ።

 

መኒኻ ጸሊምን ጻዕዳን ምፍላይ ስኢንካ ዘለኻ

መኒኻ ንሓጥያት ህግደፍ ትሓብእ ዘለኻ

መኒኻ ኤርትራ ዓዲ ሰላም’ያ ኢልካ ትማጎት ዘለኻ

መኒኻ መሬት ክባድም ክበታተን ህዝብኻ ትድሰት ዘለኻ፡ ኣብ መጻኢት ኤርትራ ኣበይ’ዩ መእተዊ።

 

መኒኻ ምስ በላዕቲ ሰብ ትመሓዞ ዘለኻ

ህግደፍ እናኣረገ’ምበር እናጎበዘ ይኸይድ ከምዘሎ ኣይትግንዘብን ዲኻ

መኒኻ ዕሸል ቀቲልካ ትህብትም ዘለኻ

መኒኻ ጸሊም ታሪኽ ጽሒፍካ ትጠፍእ ዘለኻ፡ ሕልናኻ ኣይተስርሖን ዲኻ።

 

ኣንታ! ቁሩብ እባ ካብ ኣፍንጫኻ ኣርሒቅካ ሕሰብ

እምበርዶ ደም ኣለካ ምስ ኤርትራዊ ዝዋሰብ

ምስ ሓራዲ ስድራቤትካ ከመይ’ሉ ይወርደልካ ንኸብድኻ ክትዕሰብ

ካን ወሲንካ ብህይወትካ ክትቅበር ክትሸይጥ መንነትካ ንገንዘብ።

 

በጃኻ ደረት ግበረሉ ንሰናይ ተዓጠቅ ልዋም ለይቲ ክትድቅስ

ግዜ’ለካ ብልቢ ክትናዘዝ ካብ ጸድፊ ደልሃመት ክትምለስ

ታሪኽ ክትሰርሕ መልክዕካ ከተሕድስ ህዝብኻ ክትክሕስ

ሕዱር ሕማም ሃገርካ ክትፍውስ ንሱ’ዩ ነባሪ ዋሕስ፡ ንመዋእል ዘየጣዕስ።

 

ጽላል ካብ ሕቡራት መንግስታት ኣመሪካ (ሕዳር 28 2015)