ሚኒስተር ውሽጣዊ ጉዳያት ስጳኛ ሃገሩ ከም ናይ መጀመርያ ስጉምቲ፣ ማእከላይ ባሕሪ ሰጊቶም ኤውሮጳ ዝኣተዉ ልዕሊ 1400 ኤርትራውያንን ሶርያውያንን ስደተኛታት ንምጥያስ ተቐሪባ ምህላዋ ምግላጹ ኣሾሼትድ ፕረስ (AP) ሓቢሩ።

ንሱ ስጳኛ ነቲ ሕብረት ኤውሮጳ ነቶም ድሮ ኣብ መሬት ኤውሮጳ ኣትዮም ዘለዉ ስደተኛታት ናብ ኩለን ሃገራት ንምምሳሕ ንዝወሰዶ ውሳነ ኣብ ግብሪ ናይ ምውዓል ኣብነት ንምዃን ስጉምቲ ድሮ 19 ስደተኛታት ትማሊ ሰንበት ከምዘጣየሰቶም ኣገንዚቡ።

ሽወደን ኣቐዲማ ኣብ ዓዲ ጥልያን ንዝርከቡ ኤርትራውያን ስደተኛታት ንምጥያስ ቅሩብነት ብምርኣይ ድሮ ነቲ መስርሕ ጀሚራቶ እያ።

ሕብረት ኤውሮጳ ንጽዕነት ጻዕቂ ስደተኛታት ናይተን ብ ቅድመ ግንባር ዝርከባ ከም ጥልያንን ግሪኽን ዝኣመሰላ ሃገራት ንምፍኳስ ነቲ ስርዓተ ኮታ ከምዘተኣታተወ ይፍለጥ።