ኣብ ከተማ ለንደን ዓዲ እንግሊዝ ዝርከቡ ስእልታት እሱራት ፖለቲካን ጋዜጠኛታትን ኤርትራ ዝተለጠፎ ማልያ ዝወደዩ ግዱሳት ደለይቲ ፍትሒ፣ ሎሚ ንጉሆ 16 መስከረም፣ ንመበል 14 ዓመት ምሕዩር ግዳያት ምልካዊ ስርዓት ኢሳይያስ ምኽንያት ብምግባር ሃንደበት ኣብ ማዕጾን መናድቕን ኤምባሲ ምልካዊ ስርዓት ኢሳይያስ ስእልታት ግዳያት ብምጥቃዕ እቶም ናይ ፖለቲካ እሱራትን ጋዜጠኛታትን ክፍትሑ ጻውዒቶም ብዓውታ ኣቕሪቦም።

እቶም ኣስታት 10 ዝኾኑ ብምስጢር ዝተወዳደቡ ደለይቲ ፍትሒ፣ ቀንዲ ዕላምኦም ኣብ ውሽጢ ኤምባሲ ስርዓት ኢሳይያስ ኣቲኻ ስእሊ ናይቶም ግዳያት ብምጥቃዕ፣ እቶም እሱራት ክፍትሑ ምጽዋዕ ‘ኳ እንተነበረ፣ እቶም ኣብ ዝሓለፈ ሒደት ዓመታት ዝተኻየደ፣ ኣብ ውሽጢ ቤትጽሕፈቶም  ዝተሰቕለ ስእሊ ውልቀመላኺ ኢሳይያስ ዝተሰብረሉ ውርደት ዘሰክሞም ተመሳሳሊ ፍጻሜ መጠንቀቕታ ኮይኑዎም ስለዝጸንሐ ሰራሕተኛታት እቲ ምልካዊ ስርዓት ኢሳይያስ፣ እቶም ማዕጾ ንከኽፍቱ ዝመርሑ ክልተ መንእሰያት ጥራይ ንውሽጢ ምስ ኣተዉ ብመፍትሕ ስለዝዓጸዉዎ እቲ ናይ ደለይቲ ፍትሒ ጉጅለ ብምሉኡ ክኣቱ ኣይከኣለን።

ብድሕሪ ‘ዚ እቶም ደለይቲ ፍትሒ ኣብ ማዕጾን ፍኒስትራን ኤምባሲ ምልካዊ ስርዓት ኢሳይያስ ስእልታት ናይቶም ግዳያት ብምጥቃዕ፣ እቲ ውልቀምልካዊ ስርዓት ነቶም ብዘይፍርዲ ን14 ዓመት መመላእታ ዝኣሰሮም እሱራት ፖለቲካን ኩሎም ብዘይ ፍርዲ ተሓይሮም ደሃዮም ኣጥፊኦም ዘለዉ ኣሽሓት ኤርትራውያን እሱራትን ነጻ ክልቀቑ ብጭርሖታት ጻውዒቶም ኣቕሪቦም።

ፖሊስ ዓዲ እንግሊዝ ብኡ ንብኡ ናብቲ ቦታ ብምምጻእ ጸጥታ ከኽብሩ ‘ኳ እንተተንቀሳቐሱ፣ ነቲ ብሰላምን ልዙበነትን ዝካየድ ዝነበረ ዝኽርን ጻውዒትን ብህድኣት ካብ ምክትታል ዝሓልፍ ስራሕ ኣይነበሮምን።

ብዘይካ እቶም ኣብ ቤትጽሕፈቶም ዘጽቀጡ ኣምባሳደርን ሰራሕተኛታትን ምልካዊ ስርዓት ኢሳይያስ፣ ኣብቲ ከባቢ ኣብ ዝርከብ ኣብያተ ጽሕፈት ዝሰርሑ ሰራሕተኛታት ናብ ጎደና ብምውጻእ ነቲ ምንቅስቓስ ተዓዚቦሞ።

ምልካዊ ስርዓት ኢሳይያስ ነቶም ሓርበኛታት መራሕትን ጋዜጠኛታትን ካብ ኣእምሮ ህዝቢ ኤርትራ ከረስዖም ‘ኳ ኣብ ምስጢራዊ ማሕዩር ዳጕኑ የሕቅቖም እንተሎ፣ ወደብቲ ናይቲ ንምዝካሮም ዝተኻየደ ፍጻሜ፣ ኣብ ወጻኢ ተወሊደን ዝዓበያ ሰብ ሕልና ደቂ ኣንስትዮን ከምኡ ‘ውን ደቂ ተባዕትዮ መንእሰያት ምዃኖም፣ ብኣንጻር ሕልሚ ምልካዊ ስርዓት ኢሳይያስ ጀጋኑና ዘይምርስኦምን፣ ዝኽሮም ናብ ሓዱሽ ወለዶ ምትሕልላፉን ዘሐብን እዩ።

ብሕልፊ ኣብ ለንደንን ካልኦት ከተማታት ዓዲ እንግሊዝን እትርከቡ ኤርትራውያን ደለይቲ ፍትሒ፣ ከም መቐጸልታ ናይዚ ሎሚ ዝተኻየደ ናይ ዝኽሪ ፍጻሜ፣ ጽባሕ ዓርቢ 18 መስከረም ‘ውን ኣብ ፊት ኤምባሲ ምልካዊ ስርዓት ኢሳይያስ ካብኡ ዝሰፍሐ ግሁድ ሰልፊ ክካየድ ስለዝኾነ፣ ሰዓት 9፣00 ንጉሆ ኣብቲ ኣብ ከተማ ለንደን Angle ዝርከብ ቤትጽሕፈት ምልካዊ ስርዓት ኢሳይያስ ተረኺብኩም ነቶም ግዳያት ምልካዊ ስርዓት ኢሳይያስ ክትዝክሩ ነተሓሳስብ።

ኤምባሲ ምልካዊ ስርዓት ኢሳይያስ ኣብ ዝርከበን ካልኦት ሃገራት እትርከቡ እትርከቡ ደለይቲ ፍትሒ ተመሳሳሊ ምንቅስቓስ ብምግባር ነቶም ግዳያት ክትዝክሩ ድምጺ ክትኮኑዎምን ‘ውን ነዘኻኽር።