መዘኻኸሪ፣ ስእሊ ናይቲ ባሕሪ ዝገፍዖ ሶርያዊ ህጻን ኣብ ታሕቲ ስለዘሎ ምርኣዩ ዝኸብደኩም ኣንበብቲ ክሳብ መወዳእታ ናይዚ ዜና ምንባብ ኣይትቐጽሉ። 

ኣብ ማዕከናት ዜና ዓለም ዝተዘርግሐ ስእሊ ናይ ሓደ ካብ ቱርኪ ናብ ግሪኽ ብባሕሪ ክሰግር ከሎ ጥሒሉ፣ ትማሊ ረቡዕ ምስ ካልኦት 12 ሬሳታት ኣብ ገምገም ባሕሪ ግሪኽ   ተገፊዑ ዝተረኽበ ቆልዓ መርኣያ ናይቲ ንስደተኛታት ዝገጥሞም ዘሎ ዘስካሕክሕ ትራጀዲ ኮይኑ ውዒሉ።

እቶም ሶርያውያን ስደተኛታት፣ ካብ ቱርኪ ናብብ ኮስ ዝተባህለት ደሴት ግሪኽ ክሰግሩ ክብሉ እዮም ሓደጋ ባሕሪ ኣጋጢሙዎም።

እቲ ግዳይ ወዲ ሰለስተ ዓመት ሶርያዊ ምዃኑ ዝጠቐሱ ማዕከናት ዜና ቱርኪ፣ ወዲ 5 ዓመት ምዕባዩ ሓዉ ‘ውን ኣብቲ ሓደጋ ባሕሪ ከምዝሞተ ገሊጾም።

ኣብ ወርሒ ጥቅምቲ 2013 ኣብ ከባቢ ላምፐዱዛ 367 ኤርትራውያን ብጅምላ ኣብ ባሕሪ ኣብ ዝጠሓሉሉ እዋን፣ ሓንቲ ኤርትራዊት ኣደ ምስ ሰለስተ ዕሸላት ደቃ ኣብ ዝጠሓለትሉ እዋን እቲ ትራጀዲ ተመሳሳሊ ነውጺ ፈጢሩ እዩ።

እዚ ከምዚ ኢሉ ኸሎ፣ መንግስታት ኤውሮጳ፣ ነቲ ካብ ቁጽጽር ወጻኢ ኮይኑ ዘሎ ሰብኣዊ ቅልውላው ስደተኛታት ምፍታሕ ሓርቢቱዎም ኣብ ፖለቲካዊ ቁርቍስ ይርከቡ ኣለዉ።

ጀርመን ኣብ ልዕሊ ስደተኛታት ብተርእዮ ዘላ ሰብኣዊ ሓልዮት ብኣውንታ ክትጥቀስ ከላ፣ በንጻሩ ዓዲ እንግሊዝ ነቲ ንኤውሮጳ ሃዊጹዋ ዘሎ ቅልውላው ብጎቦ ዓይና ትርእዮ ምህላዋ፣ ካብ ናይ ወጻእን ናይታ ሃገር ፖለቲከኛታትን ተደጋጋሚ ወቐሳ ይበጽሓ ኣሎ።

ሓደ ካብቶም ንመግስቶም ዝነቐፉ፣ ሰልፊ ዕዮ ዓዲ እንግሊዝ ኣብ ስልጣን ኣብ ዝነበረሉ ግዜ ሚኒስተር ጉዳያት ወጻኢ ኮይኑ ዘገልገለ ደቪድ ሚሊባንድ፣ ዓባይ ብሪጣንያ ናይ ስደተኛታት ብጽሒታ ከተልዕል ቅሩብነት ዘይምርኣያ ካብቲ ናይ ሃገርና ሰብኣዊ ያታ ተድሓርሕር ምህላዋ ዘርኢ እዩ ክብል ቅሬታኡ ገሊጹ።