መንግስቲ ዓዲ እንግሊዝ፣ ቁጽሪ ስደተኛታት ንምውሓድ ዘዋደዶ ታርጌት ንምውቃዕ ክብል ብሰንኪ ‘ቲ ብገበናት ኣንጻር ሰብኣውነት ዝኽሰስ ዘሎ ውልቀመላኺ ስርዓት ሃገሮም ገዲፎም ንዝስደዱ ዘለዉ ኤርትራውያን ዑቕባ ይነፍጎም ምህላዉ ይውቀስ ከምዘሎ ጋዜጣ ዘ ኢንደፐንደንት ኣብ ገጻቱ ኣስፊሩ።

በዚ ምኽንያት፣ ኣብ ፈለማ ርብዒ ናይዚ ዓመት’ዚ 73 ሚእታዊት ኣንውታዊ ምላሽ ዝረኸበ ሕቶ ዑቕባ ኤርትራውያን፣ መንግስቲ ዓዲ እንግሊዝ፣ ኣብ ወርሒ መጋቢት ኤርትራውያን ስደተኛታት ናብ ኤርትራ ምስ ዝምለሱ ዘጋጠሞም ሓደጋ የልቦን ኣብ ዝብል ካብ ሰበስልጣን ናይቲ ጨፍላቒ ስርዓት ንዝረኸቦ ኣጉል ውሕስነት ተመርኵሱ ጉዳይ ኤርትራውያን ስደተኛታት ኣብ ምውሳን ሰራሕተኛታት ውሽጣዊ ጉዳያት እንግሊዝ ንዝውከሱሉ መምርሒ ድሕሪ ምኽላሱ፣ ኣብቲ ዝቐጸለ ርብዒ ዓመት ኣውንታዊ ምላሽ ሕቶ ዑቕባ ኤርትራውያን ናብ 34 ሚእታዊት ኣዝዩ ለጠቕ ከምዝበለ እቲ ሓበሬታ የረድእ።

ኣብ ዝሓለፈ 12 ኣዋርሕ ክሳብ ወርሒ ሰነ፣ 3568 ኤርትራውያን ኣብ ዓዲ እንግሊዝ ሕቶ ዑቕባ ከቕርቡ ከለዉ፣ ካብታ ብኵናት ተሓሚሳ 4 ሚልዮን ህዝባ ተሰዲዱ ዘሎ ሶርያ 2204 ኣብ ዓዲ እንግሊዝ ዑቕባ ከምዝሓተቱ  ዘ ኢንደፐንደት ይጠቅስ።

ይኹን ‘ምበር ውድብ ሕቡራት ሃገራት፣ ንስርዓት ኢሳይያስ ኣብ ልዕሊ ኤርትራውያን ብዘውርዶ ዘሎ መዳርጊ ዘይብሉ ግፍዕታት ማዕረ ብገበናት ኣንጻር ሰብኣውነት እናኸሰሶ ኸሎ፣ መንግስቲ እንግሊዝ ከምዚ ዝኣመሰለ ዝንቡዕ ስጉምቲ ብምውሳዱ ኣብ ቀጻሊ ወቐሳን ነቐፌታን ይወርዶ ኣሎ።

መንግስቲ እንግሊዝ ኣብ ምርጫ ንተደጋጋሚ ግዜ ቁጽሪ ስደተኛታት ንዓመት ትሕቲ 100 ሽሕ ከውርዶ ምዃኑ ኳ እንተተማጽዐ ሎሚ ዘበን ልዕሊ 300 ሽሕ ንሂሩ ከምዘሎ ጸብጻባት የመልክቱ። ይኹን እምበር፣ እቲ ዝበጽሐ ቁጽሪ ስደተኛታት ካብተን ምስ እንግሊዝ ነጻ ናይ ምንቅስቓስ ስምምዕ ዘለወን ሃገራት ኤውሮጳ ዝመንጨወ እዩ።