ኣብ ዝሓለፈ ቀዳመ ሰንበት ኣብ ሓንቲ ንእሽቶ ከተማ ግዝያዊ መዕቆቢ ዝተዋህቦም 250 ስደተኛታት ናብቲ ቦታ ኣብ ዝበጽሑሉ ኣጋጣሚ፣ ሕሉፋት የማናውያን ድሕሪ ዘልዓሉዎ ናዕቢ ምስ ፖሊስ ምትፍናን ከምዝተኸስተን 30 ኣቢሎም ዝኾኑ ፖሊስ ከምዝተጎድኡን ይፍለጥ።

ቻንሰለር ጀርመን ኣንጀላ መርኸል ግን፣ ብደገፍቲ ናይቶም ሕሉፋት የማናውያን ዘጋጠማ ምሽባብን ምድሃልን ግዲ ከይገበረት ናብቲ ስደተኛታት ዝተዓቖቡሉ ቦታ ብምብጻሕ፣ ነቶም ጽጉማት ስደተኛታት ኣብ ምሕጋዝ ተዋፊሮም ዘለዉ ወለንተኛታት ኣመስጊና። ንሳ ኣብቲ ኣጋጣሚ፣ ‘ እዚ እንርእዮ ዘለና ኣንጻር ስደተኛታት ዝቐንዐ ጽልኢ ዘሕፍር እዩ፣ ተጸጊሙ ንዝመጽኣና ነፍሲ ወከፍ ሰብ ብኽብረት ምቕባል መግለጺ ሰብኣዊ ክብርናን ሃገርናን እዩ’ ድማ ኢላ።

ብዘይካ ‘ዚ ቻንስለር ኣንጀላ መርኸል፣ ብፍላይ ነቶም ብውግእ ሕድሕድ ተዘናቢሎም ናብ ጀርመን ዝመጽኡ ዘለዉ ሶርያውያን ስደተኛታት እቲ ናይ ዳብሊን ውዕል፣ ማለት ስደተኛታት ናብታ ፈለማ ዝረገጹዋ ኤሮጳዊት ሃገር ክምለሱ ዝቐስብ ስምምዕ ከምዘይምልከቶም ገሊጻ።

እዚ ተበግሶ እዚ፣ ሶርያውያን ናይ ዑቕባ ሕቶኦም ኣብ ጀርመን ብቐሊሉ ቅቡል ዝገብር እዩ። ነዚ ትስፉው ዜና ዝሰምዑ፣ ብሰብኣውነት መራሒት ጀርመን ዝተሓጎሱ ሶርያውያን ከኣ፣ ንሰብኣውዊ ርሕራሀኣን ሞራላዊ መትከላን ብምንኣድ፣ ኣብ ፈይስ ቡክን ካልኦት ማሕበራዊ መራኸቢታትን ናይ ፍቕሪ ደብደበ ይልእኩላ ኣለው።

ከም ብዓል ደቪድ ካምረን ናይ ዓዲ እንግሊዝ ዝኣመሰሉ መራሕቲ በቲ ኣብ ህዝቦም ዝቀላቐል ዝተወሰነ ስደተኛታት ናይ ምጽያን ሃዋህው ተሰናቢዶም፣ ኣብ ቴለቭዥናት ንስደተኛታት ከም ‘ዕስለ ሓሳኹ’ ኣነኣኢሶም ዘይሓላፍነታዊ መግለጺ ኣብ ዝህቡሉን ከም ብዓል ኢሳይያስ ምስ ዝኣመሰሉ ጠንቂ ናይቲ ሽግር ምስ ዝኾኑ ዕሉላት ውልቀመለኽቲ ሕሹኽሹኽ ኣብ ዝብሉሉን ዘለዉ እዋን ኣንጀላ መርኸል ከምዚ ዝኣመሰለ ርህራሀን ሰብኣውነትን ምርኣያ ካብ መዛኑኣ ክብ ዝበለት ኣብነታዊት መራሒት ምዃና ዝገልጽ እዩ።

ኣብዚ ዓመት ‘ዚ ጥራይ ፣ ጀርመን ብኣስታት 800 ሽሕ ሓደስቲ ስደተኛታት ተጎቢኣ፣ ዝያዳ ኩለን ሃገራት ኤውሮጳ በዚ ድሕሪ ካልኣይ ኵናት ዓለም ዝበኣሰ ሰብኣዊ ቅልውላው ምዃኑ ዝንገረሉ ዋሕዚ ስደተኛታት ተገዲዓ ክንሳ እያ፣ ከምዚ ዝኣመሰለ ተጻውሮን ዓቕልን እተርኢ ዘላ።