ብሰንኪ እቲ ሎሚ ቕነ ኣብ ሽወደን ዝተፈጸመ ቅትለት ኣደን ወዳን ኣብ ልዕሊ ስደተኛታት ምፍዳይ ሕነ ከይፍጸም ኣብ ዝፍርሓሉ ዘሎ ግዜ፣ በቲ ቅትለት ዝተጠርጠሩ ክልተ ኤርትራውያን ኣብ ዝቕመጡሉ ዝነበሩ ማእከል ስደተኛታት  ንዝተኻየደ ዘይሕጋዊ ሰላማዊ ስለፊ ፖሊስ ሽወደን ከምዝበተኑዎ The Local ዝተባህለ መርበብ ሓበሬታ ሓቢሩ።

ዝሓለፈ ሓሙስ ምሸት ካብ 18 ክሳብ 30 ዝዕድሚኦም ነበርቲ ስቶክሆልም ዝኾኑ መንእሰያት ናብቲ ካብ ስቶክሆልም 50 ኪሎሜተር ርሒቑ ዝርከብ ማእከል ስደተኛታት ብምጕዓዝ፣ ታቤላታት ሒዞም ከምዝጨደሩን ናብቲ መዓስከር እንቋቝሖታት ብምድርባይ ሕርቃኖም ከምዝገለጹን፣ ናብ ፖሊስ ዘመልከቱ ሰራሕተኛታት ናይቲ ማእከል ምሕባሮም እቲ ጋዜጣ ይጠቅስ።

ኣብቲ ኣይክያ ዝብሃል ቤት መሸጣ ብሓደ ኤርትራዊ ኣብ ልዕሊ እታ ኣደን ወዳን ቅትለት ድሕሪ ምፍጻሙ፣ ኣብ ልዕሊ ስደተኛታት ናይ ሕነ መጥቃዕቲ ከየጋጥም ጸጥታዊ ጥንቃቐ ክገብሩ ከምዝቐነዩ ጋዜጣታት ሽወደን ሓቢረን እየን።

ትማሊ ሓሙስ ኣብ ዝተኻየደ መጋብኣያ ቤትፍርዲ፣ እቲ ተታሒዙ ዝቐነየ ወዲ 36 ዓመት ኤርትራዊ ስደተኛ ነቲ ድርብ ቅትለት ከምዝፈጸሞ ክእመን ከሎ፣ እቲ ኣብቲ ከባቢ ዝጸንሐ ወዲ 23 ኤርትራዊ ጥርጡር ግን ኣብቲ ገበን ኢድ ከምዘይነበሮ ድሕሪ ምርግጋጹ ነጻ ተለቒቑ።

እንተኾነ እቲ ኣብ ኢንተርነት ምፍርራሕ ከጋጥሞ ዝቐነየ ነጻ ዝተለቐቐ ኤርትራዊ መንእሰይ ንድሕነቱ ናይ ፖሊስ ተወሳኺ ሓለዋ ክግበረሉ ምዃኑ ጠበቕኡ ንመራኸቢ ብዙሓን ሽወደን ሓቢሩ።

ኣብ ዝሓለፈ ዓመት 11,500 ኤርትራውያን ኣብ ሽወደን ዑቕባ ከምዝሓተቱ ይፍለጥ። ሎሚ ዘበን ‘ውን 4,200 ኤርትራውያን ኣብታ ሃገር ዑቕባ ብምሕታት ብብዝሖም ድሕሪ ሶርያውያን ካልኣይ ደረጃ ሒዞም ለዉ።