ምልካዊ ስርዓት ኢሳይያስ ነቶም ዕጡቓት ሲቪል ናብ ታዕሊም ብዝብል ምኽንያት ንምኽታቶም ትማሊ ቀዳም ኣብ ኣስመራ ከባቢ ዕዳጋ ሓሙስ ዝገበሮ ብተቓውሞ ህዝቢ ፈሺሉ።

እቶም ጻውዒት ዝተገብረሎም ዕጡቓት ሲቪል በብዘለዉዎ ጠፊኦም ኣብቲ ናይ ቆጸራ ቦታ ምምጻእ ክኣብዩ ከለዉ፣ ትሕቲ ዕድመ መንእሰያትን ቆልዑን ነቶም መኻይን ኣኸቲሎም ዝመጽኡ ዕጡቓት ወተሃደራት ኣእማን ብምድርባይ ተቓውሞኦም ገሊጾም። እቶም ወተሃደራት ከኣ ንመፈራርሒ ንሰማይ እናተሱ ናብ ዝመጽኡዎ ተመሊሶም።

ብቕድሚ ትማሊ ናብ ታዕሊም ክብገሱ ዝነበሮም፣ ምልካዊ ስርዓት ኢሳይያስ ብግዴታ ዘዕጠቖም ኣብ ካልእ ከባቢታት ኣስመራ ዝቕመጡ ሲቪል ኤርትራውያን ናብቲ ህግደፍ ዘዳለዉሎም ናይ ቆጸራ ቦታ ሰለዘይመጹ ‘ውን እቲ መደብ ፈሺሉ።

በቲ ልዑል መጠን ናይቲ ኣብያ ዝሰንበዱ ልኡኻት ምልካዊ ስርዓት ኢሳይያስ ከኣ ነቶም ኣብቲ ቦታ ዝተረኽቡ ሓደ ክልተ ዕጡቓት መዓልቲ ተቐይሩ እዩ ብምባል ኣፋንዮሞም።

ነቶም ኣብ መንደፈራን ደቀምሓረን ኣቐዲሞም ጻውዒቶም ዝነጸጉዎም፣ ንሰብ ልቸንሳ ድኳናቶም ዓጽዮሞም፣ ነቶም ልቸንሳ ዘይብሎም እሞ ክረኽቡዎም ዘይከኣሉ ድማ ድማ ኣስንቶም ይኣስሩወን ኣለዉ።