ኤርትራውያን ነበርቲ ኖርወይ ናብ ሱዳን

ይኹን ናብ ኤርትራ ከይገሹ ተኣጊዶም።

ኣብ ኖርወይ ኢዶም ዝሃቡ መንእሰያት፡ መንግስቲ ኖርወይ ምስ ተቐበሎም፡ ናብ ቤትጽሕፈታት ናይቲ ዓኽ ኢሎም ጡፍ ዝበሉሉ ህግደፍ እናኸዱ ናይ ጣዕሳ ፎርም ብምምላእ ተሓቢኦም ናብ ኤርትራ ክገሹ ጸኒሖም። ናብ ኤርትራ ዝገሹሉ ሓደ ኣገባብ ድማ ብመንገዲ ሱዳን ኮይኑ፡ ኣብ ኤርትራ ምስ ኣተዉ ድማ መንግስቲ ኖርወይ ናበይ ገይሾም ከም ዝነበሩ መታን ከይፈልጥ ክፍሊ ኢሚግረሽን ጭፍራ ህግደፍ፡ ኣብ ክንዲ ከምቲ ሕጊ ዝእዝዞ ኣብ ፓስፖርቶም ክታም ዝገብረሎም ኣብ ጻዕዳ ወረቐት ጥራይ ይፍርመሎም። እዚ ነቶም ደገፍቱ ንምሕጋዝ ኢሉ ዝገብሮ ካብ ነዊሕ ዓመታት ክኽተሎ ዝጸንሐ ዘይሕጋዊ ተግባር ምዃኑ ክፍለጥ ኣለዎ። እዚ ጕዳይ እዚ ክፍሊ ኢሚግረሽን ኖርወይ ይኹን ተጣባቒ ስደተኛታት ኖርወይ (ኖኣስ) ስለ ዘረጋገጹዎ ኣብ ማዕከናት ዜና ክዝረበሉን መጠንቀቕታ ክወሃብን ጸኒሑ ነይሩ። ሕጂ ድማ ክፍሊ ኢሚግረሽን መንግስቲ ኖርወይ (ኡደኢ) ብዕለት 19.05.2014 ሓደ መምርሒ ኣውጺኡ ኣሎ። እቲ መምርሒ፡ ዝኾነ ኣብ ኖርወይ ዕቝባ ዝተዋህቦ ኤርትራዊ ናብ ኤርትራ ጥራይ ዘይኮነ፡ ናብ ሱዳንን ኢትዮጵያን ከይተረፈ ከይገይሽ ዝኽልክል እዩ። እዚ ሕጊ’ዚ ነቶም መንግስቲ ኖርወይ ሕጂ ዝተቐበሎም ጥራይ ዘይኮነ ወላ ነቶም ቅድሚ ሕጂ ቀዋሚ መንበሪ ዘለዎም’ውን ከም ዝምልከት ይፍለጥ። እዚ ዝኾነሉ ምኽንያት ኤርትራውያን ብመንገዲ ኢትዮጵያን ሱዳንን ናብ ኤርትራ በጺሖ ይምለሱ ከም ዘለዉ ስለ ዝተፈልተ እዩ ይብል። እዚ ከምዚ ኮይኑ ገለ ተዓዘብቲ ኣብ መንጎ ኤርትራን ኢትዮጵያን ናይ ኣየር በረራ ይኹን ናይ ምድሪ ይኹን ወይ ናይ ባሕሪ ርክብ ዘየሎ ክነሱ ናብ ኢትዮጵያ ምጋሽ’ውን ዝተኸልከለሉ ምኽንያት፡ ኢትዮጵያውያን ብፍላይ ድማ ተጋሩ ኤርትራውያን ኢና እናበሉ ኢዶም ድሕሪ ምሃብ፡ ዕቝባ ምስ ረኸቡ ከም ድላዮም ናብ ሃገሮም ኢትዮጵያ ከም ዝኸዱ ስለ ዝተፈልጠ ከም ዝኾነ ይብሉ።

ጭፍራ ህግደፍ ካብ ሃገር ንዝተሰዱ መንእሰያት ንናይ 2% ውጽኢትን ካልእ ገንዘባዊ ውጽኢትን ይኹን ከም ፖለቲካዊ መሳርሒ ክጥቀመሎም ስለ ዝደሊ፡ ዕቝባ ድሕሪ ምርካቦም ኣብ ሓደ ገበን ከም ዝፈጸሙ ዘእምን ናይ ጣዕሳ ፎርም እናበለ ዝጽውዖ ቅጺ ከም ዘፈርሞም ይፍለጥ። ሓደ ሰብ ኣብ ሃገረይ ሓሲሙኒ፡ መሰለይ ተጋሂሱ፡ ተሳቕየ፡ ናብ ሃገረይ እንተ ተመሊሰ በቲ ጨካንን ኣራዊታዊ ባህሪ ዘለዎን ጭፍራ ህግደፍ ክቕተል’የ፡ ክግረፍን ክሳቐን’የ ኢሉ ቃሉ ድሕሪ ምሃብ፡ መሰል ዕቍባ ምስ ተዋህቦ ናይ ጣዕሳ ፎርም ክመልእ ምፍታን፡ ተምላስካ ምስ ምብላዕ ዝዳረግ ምዃኑ ክፍለጥ ይግብኦ። ከምዚ ክገብር ዝፍትን ሰብ ድማ ድሕረይ ሳዕሪ ኣይትብቈላ ዝብል ሕልና ዘይብሉ ሰብ ምዃኑ ዝሰሓት ኣይኮነን። ደለይቲ ፍትሒ ነቶም ኣንጻር ሕጊ ስደተኛታት ኖርወይ ብምጥሓስ ተዃሊሎም ናብ ኤርትራ ክኸዱ ንዝፍትኑ ጸረ ፍትሒ ዝኾኑ ሰባት ከቃልዑዎም ከም ዘለዎም ለበዋ ዘድልዮ ጕዳይ ኣይኮነን።