መስራቲን ሓላፊን ኣሰና ፋውንዴሽን ጋዜጠኛ ኣማኑኤል ኢያሱ፡ ትማሊ ኣብ ህይስተን ሰፊሕ ኣኼባ ኣካይዱ።

ኣብ’ቲ ብሓይሊ ዕማም ህይስተን ዝተዳለወ ኣኼባ፡ ኣማኑኤል ናይ’ቲ ኣኼባ ቀንዲ ዕላማ፡ ሰፊሕ ህዝባዊ ሰረት ዘለዎ ህዝባዊ ምንቅስቓስ ንምምስራት ከምኡ’ውን መራኸቢ ብዙሓን ንምሕያል ምዃኑ ገሊጹ።” ህዝባዊ ሓይሊን፡ ሓይሊ ሜድያን ተደሚሩ፡ ለውጢ የረጋግጽ። ውሕስነት ለውጢ ይሕሉ’ዩ” ኢሉ።

ቀንዲ ባህጊ፡ ናይ’ቲ ብሓፋሽ ዝውነን ብመሰረታት ዝድፋእ ህዝባዊ ሓይሊ፡ ደሞክራስያዊ ለውጢ ንምርግጋጽ ምዃኑ ዝጠቐሰ ኣማኑኤል፡ ተሳተፍቱ ንስልጣን ዘይወዳደሩ፡ እቲ ሓላፍነት ካብ ሰረት ናብ ላዕሊ ከምኡ’ውን ንኹሎም ደለይቲ ፍትሒ ዝሓቁፍ ብሙዃኑ ፍሉያት ባህርያት ከምዘለውዎ ኣረዱኡ።

ንሱ፡ ንድኽመታት ናይ ከም’ዚ ዓይነት ህዝባዊ ምንቅስቓስ ኣመልኪቱ ኸኣ፡ ዘይስጡምን ዘይጽኑዕን መሪሕነት፡ ሓጺር ፍታሕ ዝጽበ፡ ንጭውያ ዝተቓልዐ ምዃኑ ኣብሪሁ። ካብ ድኻሙን ብልጭኡን ተማሂርካ ግና፡ ሓደ ሚዛኑ ዝሓለወ ምንቅስቓስ ምፍጣር ይከኣል እዩ ይብል ኣማኑኤል። “ ስምረት ምርግጋጽ፡ ጽፉፍ ኣወዳድባ (ትካላዊ ኣሰራርሓ)፡  ደሞርክራስያዊ ለውጢ (ግሉጽነት፡ ተሓታትነት፡ ናይ ሓላፍነት ምምቕራሕ) ምድልዳል ማሕበራዊ ዝምድናን ኣድለይቲ እዮም” ኢሉ።

ንሱ ኣብ ወጻኢ ኰይንካ ክዕመሙ ዝኽእሉ ንጥፈታት’ውን ሓደ ብሓደ ዘርዚሩ እዩ። ነቲ ስርዓት ብዲፕሎማስያዊ ምንጻል፡ ብመርኸቢ ብዙሓን ድምጺ ህዝቢ ከምዝቃላሕ ምግባር፡ ሰለማዊ ሰልፍታት ብምክያድ፡ ነቲ ኣብ ውሽጢ ዘሎ ህዝብና ከምዝበራበር ምግባር፡ ከም ኡ’ውን ነቲ ኣብ ውሽጢን ወጻኢን ዝካይድ ምንቅስቓሳት ብቑጠባ ምብርካት ክብል ኣረዲኡ።

ኣማኑኤል፡ ናይ ኤርትራ ውድባትን ሲቪካዊ ማሕበራት ንኸም’ዚ ዓይነት ምንቅስቓ፡ ከም ኣካለን ጌረን ክርእየኦ ይግብአን። ምኽናይቱ፡ ብመጀመርታ ሕጊ ክህሉ ኣለዎ ይብል። “ደሞርክራስያዊ ለውጢ ንምርግጋጽ፡ ብቐዳምነት ኣብ’ታ ሃገር ሕጊ ክህሉ ኣለዎ። ኣብ ኤርትራ ሰልፊ ክትምስርት ሕጊ ክትምስርት ኣሎካ” ኢሉ ኣማኑኤል። ምስ ውድባትን ሲቪካዊ ማሕበራት ምትፍናን ከምጽእ ስለዝኽእል ግን፡ ጥንቃቐ ከምዘድሊ ከይጠቐሶ ኣይሓለፈን።

ንተራ ኣሰና፡ ከም መራኸቢ ብዙሓ ኣመልኪቱ ኸኣ፡ ኣሰና፡ ብግብሪ፡ ምስ ህዝባዊ ሰረት ዘለዎ ህዝባዊ ምንቅስቓስ ናይ ሓባር ረቓሒ ኣለዋ ይብል። “ኣሰና፡ ድምጺ ዕቡሳት ወይ ህዝቢ ተቃልሕ፡ ስምረት ኤርትራ ንምሕያል ትዓዪ፡ ኣብ ኤርትራ ነጻ ማዕከን ሓበሬታን ግሉጽነትን ከምኡ’ውን መሰረታዊ ለውጢ ንኽመጽእ ንሕጊን ፍትሒን ክህሉ ብመትከል ትኣምን” ክብል ኣረዲኡ። ኣሰና፡ ካብ ህዝቢ ትጽበዮ ክጠቅስ ከሎ ኸኣ፡ ቀጻሊ ዜናዊ ሓበሬታ፡ ምኽሪን ስሩዕን ቀጻልነትን ዘለዎ ገንዘባዊ ደገፍ ከምዘድሊ ኣረዲኡ።

ኣብ’ቲ ኣኼባ፡ ካብ ሳን-ኣንቶንዮን ዳላስን ዝመጹ ደለይቲ ፍትሒ ዝተሳተፍዎ ክዀኑ ከለዉ፡ በቲ ኣጋጣሚ፡ ኣማኑኤል ከም ጋዜጠኛን ንጡፍ ተጣባቒ ሰብኣዊ መሰላትን ዘካይዶ ዘሎ ቃልሲ፡ ብምንኣድ ንኸተባብዕዎ፡ ገንዘባዊ ሓገዝ ኣበርኪተሙሉ። ተሳተፍቲ ኣኼባ፡ ንኣማኑኤል፡ ንልዕሊ ኣርባዕተ ሰዓታታ ዝኣክል ብጽሞና ዝተኸታተልሉ፡ ብስነ ስርዓት ርእይትኦምን ሕቶታቶምን ዘቕረብሉ ምርድዳእ ዝሰፈኖ ኣኼባ እዩ ነይሩ።

ኣብ ህይስተን ዝነብሩ ደለይቲ ፍትሒ ብሓፈሻ ንጥፈታቶም ካብ ዘሰላስሉ ሓያሎ ዓመታት ኰይኑ ኣሎ። ካብ ጥሪ 2013 ንድሓር ግና፡ ሓደ ንኹሎም ማሕበራትን ውድባትን ዝጥርንፍ ሓይሊ ዕማም መስሪቶም፡ ዝተፈላለየ ኣኼባታትን ሰለማዊ ሰልፍታትን የካይዱ ኣለዉ። ከም ኣብነት፡ ብምኽንያት ዓለምለኻዊ ሰብኣዊ መሰላት ሰለማዊ ሰልፊ ኣካይዶም። ኣብ ላምፓዱሳ ንዝሃለቑ ኤርትራውያን ኣሕዋትና ህዝቢ ኣኪቦም ከም ዘልቅስን ኣብ ነንሕድሕዱ ከም ዝጸናናዕን ጌሮም። ኣፍልጦ ህዝቢን ምልዕዓልን ሓፍ ንምባል፡ ኣብ ዝተፈላልያ ኣብያተ ቤተክርስትያናት ወረቓቕትን ብሮሽራትን ዘርጊሖም። በዚ ናይ ትማሊ ዝተኻየደ ኣኼባ ዕላማ መሰረት ዝገበረ ኸኣ፡ ኣብ’ዚ ቀረባ እዋን ሓደ ህዝባዊ ኣኼባ ከካይዱን ዳግም ክወዳደቡን ምዃኖም ተፈሊጡ ኣሎ።

እዚ ከም’ዚ እንከሎ፡ ቅድሚ ክልተ ሰሙናት፡ ናይ ኤርትራውያን ኣሜሪካውያን ኮሙኒቲ ኣብ ህይስተን፡ ንዮውሃንስ ትካቦ (ወዲ ትካቦ) ዓዲሞም፡ ከባቢ 3 ሚእቲ ኤርትራውያን ዝተረኽብሉ ዓቢ ናይ ሓድነት ለይታዊ ትልሂ ከምዘካየዱ ዝዝከር እዩ።

ኣማኑኤል፡ ብ 8 መጋቢት ኣብ ደንቭር ዝጀመሮ ኣኼባ፡ ኣብ ኢንድያናፖሊስ፡ ቦስቶን፡ ቺጋጐ፡ ቶሮንቶን ህይስተን ህዝባዊ ኣኼባታት ዛዚሙ፡ ጽባሕ ሰኑይ 31 መጋቢት ናብ ሎንደን ዓዱ እንግሊዝ ክምለስ እዩ።

ቴድሮስ

03/30/2014።