ዳግመ- ርኽክብን ናይ`ቲ እዋን ነጸብረቕታን።

“ኣብ ተጋድሎ ሓርነት ኤርትራ፤ ንናጽነት ተቓለስቲ ናይ ዝነበሩ ዳግመ -ርኽክብን ናይ`ቲ እዋን ነጸብረቕታን“ ኣብ ትሕቲ ዝብል ቴማ፡ ንመበል ሳልሳይ ዓመት ኣብ ከተማ ኣትላንታ ሕቡራት መንግስታት ኣሜሪካ ንዝቃናዕ ዳግመ-ርኽክብ፡  ዘብርህ፡ ዝሕብርን ዘረድእን ድሕረ-ባይታን፡ ናይ ተሳታፍነት መጸዋዕታን።

“ተጋድሎ ሓርነት ኤርትራ፡ ኣብ ታሪኽ  ዕጥቃዊ ቃልሲ ህዝቢ ኤርትራ ዓቢ ምዕራፍ ሒዙ ዝርከብን ናይ ምሉእ ህዝቢ ኤርትራ ሓርበኛዊ ታሪኽን`ዩ። ስለዝኾነ፡ ከምዘይነበረ ክስረዝ ወይ ከም ሬሳ ኣብ ሓመድ  ንክበሊ ምግዳፉ፡  ናይ ኩሉ ሃገራዊ  ሕልና  ዘለዎ ዜጋ ኣይኮነን“ ኣብ ትሕቲ ዝብል ዕዙዝ  ጸዋዒት፡ ብስም ዳግመ-ርኽክብ ናይ ተጋድሎ ሓርነት ኤርትራ፣ ንናጽነት ተቓለስቲ ናይ ዝነበሩ ምትእስሳር፡  ካብ 27-29 ሓምለ፡ 2012 ዓ.ም.ፈ. ኣብ ደንቨር-ኮሎራዶ (ሕቡራት መንግስታት ኣሜሪካ) ከም ዝተጋበአ ዝዝከር እዩ።

• ታሪኽ ተጋድሎ ሓርነት ኤርትራ፡ ንናይ ብዙሓት ኣሽሓት ኤርትራውያን፡ ስነ-ኣእምራዊ፡ ስምዒታውን፡ ማሕበራውን ጥምረት ዓቂቡ ዝርከብ ናይ ታሪኽ ማህደር እዩ።
• ኣብ ተጋድሎ ሓርነት ኤርትራ፡  ኣብ ብረታዊ ዕጥቅን ካልእ ሃገራዊ መደባትን ተሰሊፎም፡  ናይ ሓባር ተዘክሮን ተመኩሮን ዘጥረዩ ሓርበኛታት ተጋደልቲ፡ ዳግም ክራኽቡ፣ ተራኺቦም ሓድ ሕድ ናፍቖቶም ከርውዩ፡ ማሕበራዊ ርኽክባቶም ከደልድሉ፡ ካብ ነዊሕ እዋን  ኣትሒዙ ዝጸንሐ ሃረርታ`ዩ፣ መሰል እዩ ድማ።

ተበግሶ ዳግመ-ርኽክብ ተ.ሓ.ኤ. ናይ ሓደ ዓመት ሓሳብን መደብን ኣይኮነን። ንነዊሕ ዓመታት፡ ኣብ ልብን ቀልብን ናይ ኩሎም ኣብ ተ.ሓ.ኤ. ዝተቓለሱ ኤርትራውያን ዝጸንሐ`ዩ። ስለምንታሲ፡ ንኣዝዩ ኣገዳሲ ሃገራዊ ታሪኽ፡ ከምዘይነበረ ኣብ ሓመድ ደቢኻዮ ምሕላፍ ንሃገራዊ ሓላፍነት ምዝንጋዕ`ዩ፣ ሓደገኛ`ውን`ዩ። ታሪኽ  ተ.ሓ.ኤ.ናይ ኣሽሓት ጀጋኑ መስዋእቲ፡ መቝሰልትን ስንክልናን ዝዓቀበ፡ እሞ ካብ መሉእ ህዝቢ ኤርትራን ኣብ መሉእ ቦታታት ኤርትራን ዝተፈጸመ ኢዩ። ሎሚ፡ ደቂ ትሕቲ 35 ዓመት ዘለዎም ኤርትራውያን ብግቡእ ዘይፈልጥዎ ታሪኽ ኢዩ። ስለዚ ታሪኽ ምስናድን ምዕቃብን ይጽናሓለይ ዘይብሃሎ ሓላፍነት`ዩ። ኣብ`ዚ ተጀሚሩ ዘሎ ምስናድ ታሪኽ ተ.ሓ.ኤ. ልዑል ኣበርክቶ ክገብሩ ዝኽእሉ ዝነበሩ ብዙሓት ኣሕዋትን ኣሓትን ብሞት ተፈልዮሙና እዮም። ስለዝኾነ፡  ዳግመ-ርኽክብ ተ.ሓ.ኤ. ካብ`ቲ ዝግበኦ ኣዝዩ ደንጉዩ ዝጀመረ ስለዝኾነ ዝሓለፈ ክሳራ ይኣክል።

ጭቡጥ ሓቂታት፡

1. ኣብ ተጋድሎ ሓርነት ኤርትራ ዝተጋደልና ኤርትራውያን፡ እተን ኣብ ቃልሲ ዘሕለፍናየን ዕድመ፡ ምስቲ ሎሚ ወሲኽናዮ ዘለና ዕድመ ክወዳደራ ከለዋ ኣዝየን ውሑዳት ዓመታት እየን። ኣብ ቀጻሊ ህይወትና ግን እቲ ኣብ ተ.ሓ.ኤ. ዘጥረናዮን ዝተገንዘብናዮን ብፖለቲካዊ ሰርጸት ይኹን፡ ፖለቲካ መንነት ኣዝየን ወሰንቲ ኮይነን ንረኽበን።  ኣብ 1983 ካብ ተጋድሎ ሓርነት ኤርትራ ናብ ህዝባዊ ግንባር ዝተሓወሱ ተጋደልቲ`ውን ከይተረፈ ክሳብ ሎሚ ብናይ ጀብሃዊ  መንነት`ዮም ዝግለጹ ዘለዉ።  ስለዝኾነ፡ ናብ ዘበልካ ኣብል፡ ኣብ ዝሃለኻ ሃሉ፡  ንጹርን ነባርን ሕላገት ኮይኑ ዝቕጽል`ዩ።
2. ንሕና ኣብ ተ.ሓ.ኤ. ዝነበርና ተጋደልቲ፡ ተመኩሮታትና ዳግመ ክንዋሳኣሉን፡ ንመጻኢ ትውልዲ ከነውርሶን ግቡእናን መሰልናን ኢዩ።
3. ንሕና ብህይወትና ተሪፍና ዘለና፡ ነቶም ኣብ ቃልሲ ኣብ ጎድንና እናተዋግኡን እናተቓለሱን ናይ ዝወደቑ ብጾትና ታሪኽ፡ ክነግርን ክንስንድን፡ ብውሕዱ ሕድሪ መስዋቶም ምፍጻም`ዩ።
4. ታሪኽ ተጋድሎ ሓርነት ኤርትራ፡ ኣብ ብረታዊ ተጋድሎ ህዝቢ ኤርትራ ኣዝዩ ሰፊሕን ክቡርን ስለዝኾነ፡  ታሪኽ ሙሉእ ህዝቢ ኤርትራ ኢዩ። ክስነድን ክውረሰን ድማ ግቡእን ግድነትን`ዩ።
5. ኣብ ተ.ሓ.ኤ. ተቓለስቲ ዝነበርና፡  ዋላ ሎሚ ብግዝያዊ ፖለቲካዊ ፍልልይ ተፋላሊና ንሃሉ ድኣ`ምበር፡ እቲ ጀብሃዊ ፍቕርን ናፍቖትን ጌና ብሓዲሹ ኢዩ ዘሎ። እዚ ዘይሃስስን ወትሩ ሓዱሽን ዝኾነ ምትእስሳስርን ምዝማድን`ዚ፡ ኣብ ሰፊሕ ህዝቢ ኤርትራ ጽልዋታት ክገብር  ዘኽእሎ መደብ ኣውጺእና  ንምትግባሩ  ምውሳእ፡  ኣብ ሓድነትን ምትእስሳርን ህዝቢ ኤርትራ እወንታዊ ኣበርክቶ ምግባር`ዩ። ስለዚ ዳግመ-ርኽክብ ተ.ሓ.ኤ. ኣዝዩ ኣገዳሲ ሃገራዊ ቁምነገር ዘለዎን ታሪኻውን ርኽክብ`ዩ።
6. ዳግመ-ርኽክብ፡ ንተጋድሎ ሓርነት ኤርትራ ዳግም ሂወት ሰዂዕካ፡ ብቐጥታ ወይ ብተመሳሳሊ፡ ፖለቲካዊ ውድብ ንምምስራት ኣይኮነን።

 

ዕማም ዳግመ-ርኽክብ ተ.ሓ.ኤ.

1. ታሪኽ ተጋድሎ ሓርነት ኤርትራ፡ ብቓል፡ ብጽሑፍን፡ ብስእልን ምስናድ፣
2.  ዳግም ንምርኻብን ንሕሉፍ ናይ ሓባር ተዘክሮታትና ምውህላልን፣
3. ቅያ ሰራዊት ሓርነት ኤርትራ፡  ተደርብዩን ተረሲዑን ንከይተረፍ፣
4.  ተመክሮና ኣብ ተ.ሓ.ኤ. ምድህሳስን ናብ ሓቂ ዝቐረበ መኣዝን ናይ`ቲ ታሪኽ ምሓዝን፣
5. ዳግመ-ርኽክብና፡ ብመንጽር ዝተፋለለየ ፖለቲካዊ ኣረኣእያን ኣተራጓጉማን ምግንጻል (ንምድህሳስ) እምበር ኣብ ሓደ ናይ ሓባር መደምደምታ ንምብጻሕ ኣይኮነን፡
6. ዳግመ-ርኽክብ፡ ከም ገዳይም ተጋደልቲ/veteran፡ ናይ ታሪኽና ድኹም ጎድኒታትን ሓያል ኣበርክቶን ምምዝጋብ።
7. ታሪኽ ተ.ሓ.ኤ. ታሪኽ ህዝቢ ኤርትራ ስለዝኾነ ናብ ወለዶታት መሊኡ ንክሰጋገር ምጽዓር። ነዚ ክዉን ንምግባር፡ ሰፊሕ ተሳትፎን ናይ ኣዝዮም ብዙሓት ኣበርክቶን ንክረጋገጽ ምጽዓር።

ፈለማዊ ዳግመ-ርኽክብ

ርኽክብ ደነቨር፡ ካብ 27- 29 ሓምለ 2012 ተቓኒዑ።

• ንተዘክሮታት ተሳተፍቲ ብልዑል መንፈስ ዘበራበረ፡  ናይ ልዕሊ 200 ዝኾኑ ስእልታት ናይ ስዉኣትን ህልዋት ተጋደልቲ ተሳናዲኡ ኣብ ዓቢ ስክሪን ቀሪቡ።
• (1) ወተሃደራዊ ስርሒታት፡ (2) ሕብረተሰብኣዊ፡- ናብራ ዕብየት፡ ምጥፋእ ድንቁርና፡ ህዝባዊ ሕክምና (3)ፖለቲካዊ ቤት ጽሕፈት፡ ቤት ትምህርቲ ካድራት፡ ህዝባዊ ስርዒት፡ ህዝባዊ ማሕበራት ዓይነ-ምስክራዊ ተዘክሮታትን ፍጻሜታትን ብቓል ተተሪኹ።

መኣዳዊ ዘተ፡

1.  እንታይ ኢዩ ተ.ሓ.ኤ. ንክትወድቕ ዝገበረ ቀንዲ ጌጋታት?
2. ስለንምታይ`ከ ንሕና  ካብ ውድቀትና ተማሂርና ብሓባር ክሰርሕን ክንቃለስን ዘይከኣልና? … ኣብ ትሕቲ ዝብል ቴማ ብሸውዓተ ሰባት ፐናሊስትስ( panelists) ብመልክዕ መኣዳዊ-ዘተ ቀሪቡን ካብ ተሳተፍቲ ሕቶታትን ተወሰኽቲ ሓሳባትን ቀሪቡ።

ኣብ መደምደምታ፡

ንፈለማዊ ዳግመ-ርኽክብ ሓያልን ድኹምን ጎኑ መዚኑ። ካብ እዚ`ኸ ናበይ? ዝብል ሕቶ ኣልዒሉ ብዛዕባ ቀጻነትን ከመይነትን ዳግመ-ርኽክብ ተ.ሓ.ኤ. ዘትዩ ኣብ ውሳኔታት በጺሑ። ካልኣይ ርኽክብ ዳግመ-ርኽክብ ኣብ ኣትላንታ ኣብ ሓምለ 12-14 2013 ዳግም ክጋባእ ተሰማሚዑ።

ሓፈሻዊ ሚዛን፡

ፈለማዊ ዳግመ-ርኽክብ ተ.ሓ.ኤ. ደንቨር ኮሎራዶ፡ ኣብ ተመኩሮ ተ.ሓ.ኤ. ዝተፋላለየ ሚዛናትን ተጋራጫዊ ዝመስል ተመኩሮታትን ነይሩዎም ዝባሃሉ ተቓለስቲ፡ ብምክብባር ኣብ ሓደ መድረኽ ዘትዮም።  ኣብ መንጎ ናይ ትማሊ ናይ ዕጥቂ ተቓለስቲ ብጻይነት፡ ዘይሃሰሰን፡ ከም ናይ ቀዳሙ ህያው ምዃኑን ኣረጋጊጹ።

 

 

ኣትላንታ፡ መበል ካልኣይ ዳግመ-ርኽክብ ተ.ሓ.ኤ.  ሓምለ 12-14 2013

ኣብ ኣትላንታ ሕቡራት መንግስታት ኣሜሪካ፡ ንመበል ካልኣይ ጊዜ፡ ዳግመ-ርኽክብ ተ.ሓ.ኤ. ክቃናዕ ኢዩ። እዚ ርኽክብ`ዚ “ተጋድሎ ሓርነት ኤርትራ፣ ንናጽነት ተቓለስቲ ናይ ዝነበሩ ዳግመ-ርኽክብን ናይ`ቲ እዋን ነጸብረቕታን“  ዝብል ቴማ ዳግም ተጋቢኡ።

ቅርጽን መሰናድኦን መደብ ኣትላንታ 2013፡ ልክዕ ከም`ቲ ኣብ ደንቨር (2012) ኮይኑ እዩ ተሳላሲሉ። ብመጠን ተሳተፍትን ብዕምቆት ትሕዝቶን ግን ካብ ናይ ደንቨር ክብ ዝበለ ነይሩ።

ዳግመ ርኽክብ ኣትላንታ 2013 ብዕምቆት ካብ ዝዝተየሎም ጉዳያት፡

1. መሰረታ ዊ ዕላማታት ዳግመ-ርኽክብ ተ.ሓ.ኤ.፡  ናይ ሓባር ተመኩሮ  ንምዝካርን ንምኽባርን ምዃኑ፣
2. ኣገዳስነት ናይ ሓባር ተመኩሮታትናን ማሕበራውን ባህላውን ርብሓታት ንምዕቃብን ምምዕባልን፣
3.  ነዚ ሽቶታት`ዚ ንምዕዋት፡ ንፍልልያት ዝለዓለ ክብረት ምሃብ ግድን ምዃኑ፣
4. ኣድላይነት ክፉት ኣተሓሳስባ ኣብ መንጎ ተሳተፍቲ ምትብባዕ፣
5. ተመኩሮ ተ.ሓ.ኤ. ኣብ ኣእምሮ ናይ`ቲ ንዕስራታት ዓመታት ካብ ባዕዲ ከተናግፎ ዝተቓለሰትሉ ህዝብን፡ ሓርበኛታት ተቓለስትን ህያው ኮይኑ ዝጸንሐ ኢዩ። ስለዝኾነ፡ እዚ ታሪኽ `ዚ ብሓበን ክዝከርን ብግቡእ ተሰኒዱ ንትውልዲ ክመሓላለፍ ናይ ዳግመ-ርኽክብ ዝዓበየ ዕማም ምዃኑ፣
6. ወተሃደራዊ ግጥሚያታት ሰሜናዊ ምብራቕ ሳሕል፡ ብበራጊድ 97ን 44ን ዝተኻየደ ጅግናዊ ውግእ፡ ብዝርዝርን ስእሊ (መኣዳዊ ሑጻ) ቀሪቡ፣
7. ምጥዋር ውጉኣት ሓርነት ሓላፍነታዊ ምዃኑ፣
8. ካብ ስክፍታታት ንዝነቕሉ  ሕቶታት`ውን መሊሱ።

 

ዘትዩ ዝበጽሖም ሓበራዊ ስምምዓት፡

ዕላማታት ዳግመ-ርኽክብ ዝያዳ ክሰፍሕ፡ ንኡስ ወለዶ ክሳተፎ ዘኽእል መደባት ይጸናዕ፣  ምስናድ ታሪኽ ቀንድን መሰረታውን ዕላማ ይኹን፣ ናይ ዳግመ-ርኽክብ ሽማግለታት ኣብ ኩሉ ከተማታት ይቑማ፣ ብኣህጉራዊ ደረጃ፡ ናይ መራኸቢ መርበብ ይሃሉ፣ ምጥዋር ውግኣት ሓርነት ሓላፍነት ምውሳድ፣ ብማዕረ ማዕረ ምስናድ ታሪኽ ተ.ሓ.ኤ. ክኸዱ ዝግበኦም መደባት ክህልዉ ይተሓሰቦ፡ ንዝብሉ ሓሳባት- ዕዘት፡ ርዝነትን፡ ኣኽብሮትን ብዝመልኣ  ዘትዩሉ ኣብ ናይ ሓባር ተረድኦታት በጺሑ።

ዳግመ-ርኽክብ ተ.ሓ.ኤ.፡ ኣበጊስዎ ንዘሎ ዕላማታትን ክትዓትን ንኽቕጽል፡ ኣብ ሳልሳይ ርኽክብ እንደገና ኣብ ከተማ ኣትላንታ ንኽራኸብ ተሰማሚዑ።

ምስጋናን፡

ተቐማጦ ከተማ ኣትላንታ፡ ነዚ ካልኣይ ዳግመ ርኽክብ ክዉን ንምግባር ዝፈጸምዎ ልዑል ምቅርራብን ልግስን ዝለዓለ ሞጎስ ቀሪብሎም። ሳልሳይ ርኽክብ፡ ኣብ ኣትላንታ ንኽድገም ዘቕረብዎ ተባዕን ሰናይን ሓሳብ`ውን፡ ንህርኩት ተወፋይነቶም ዘንጸባርቕን ምዃኑ ኣረጋጊጹ።

ለበዋን መተሓሳሰብን፡

ኩሎም እቶም ክሳብ ሕጂ ዘይተሳተፍዎ ኣብ ተ.ሓ.ኤ. ዝተቓለሱ  ኣሕዋት ኤርትራውያንን፡  ኣብ ዝመጽእ ዘሎ ዓመት ክሳተፍዎን፡ ኩሉ ዝክኣል ኣበርክቶ ክገብሩን፡ ብኣኽብሮት ልባዊ ዕድመ ተገይሩሎም።

መደምደምታ፡

ታሪኽ ተ.ሓ.ኤ. ናብ ወለዶታት መሊኡ መታን ክሰጋገር-  ክስራሕን ክሰላሰልን፡ ዝወዓሉን ዝተዓዘቡን ይኹኑ ብዛዕባ እዚ ታሪኽ እዚ ዝግደሱ ኩሎም ኣብ ምዕቃብን ምዝርጋሕን ዝተጸንዐን ዝተማልአን፡ ኣፋውን ዝተሓትመን ሰነዳዊ ታሪኽ  ኣብ ምስናድ፡ ኩሉ ዝክኣሎም ክገብሩ ኣማሕጺኑ።

ንመበል ሳልሳይ ዳግመ-ርኽክብ ተ.ሓ.ኤ. ኣብ ሰነ 27-29 2014 ኣብ ከተማ ኣትላንታ የራኽበና።