ህዝባዊማዕበልንድሕነትሃገር ዋሽንግተንዲሲንከባቢኡን

መእተዊ:

ድሕሪ መሪርን ነዊሕን ብረታዊ ቃልሲ ዝተረጋገጸ ሃገራዊ ነጻነትን ልዑላውነትን ኤርትራ ናብ ናይ መላእ ህዝቢ ሓርነትን ፍትሕን ሰላምን ራህዋን ኣብ ክንዲ ዝትርጎም። ብሰንኪ ዓምጣሪ ምልካዊ ስርዓት ህግደፍ መላእ ህዝብናን ሃገርናን ኣብ ከቢድ ሓደጋ ወዲቑ ይርከብ፣  መወዳእታ ዘይብሉ ባርነታዊ ኣገልግሎትን ሕሱም ጭኮናን። መንእሰያት ኤርትራ ንዝፈትውዋ ሃገሮም ገዲፎም ክስደዱን። ኣብ ዘይፈልጥዎ ምድረበዳን ባሕርን ኣደዳ መጭወይትን ዝምታ ኣካላትን። ዘስካሕክሕ ግፍዕታትን ሓደጋታት ህልቀትን ጅምላዊ ምጥሓልን የጓንፎም አሎ፣ ብ3 ጥቅምቲ 2013 ኣብ ገማግም ደሴት ላምፓዱስ ኢጣልያ ዘጓነፈ ህልቀት ናይ 360 ኤርትራውያን መንእሰያትን ቆልዑን ህጻናትን። ውጽኢትን ጽዑቕ መግለጽን ናይ እቲ ኣብ ኤርትራ ዝርከብ ጸልማት ምልካዊ መግዛእቲ እዩ፣

ሰፊሕ ህዝቢ ኤርትራን ተቓልስቲ ሓይልታቱ (ውድባት።ማሕበራት። ትካላት። ምኩራት። ምሁራት። ደቂኣንስትዮ። መንእሰያት። ነጻ ውልቀሰባት) ንሕሱም ምልካዊ ጭኮና ንምውጋድ  ዘይሕለል ቃልስታቶም ከካይዱ ጸኒሖምን የካይዱ አለውን፣ ንዝካየድ ዘሎ ዲሞክራስያው ቃልሲ ህዝቢ ኤርትራ ንምድልዳሉን። ነቲ ንሃገርናን ህዝብናን ናብ ዝኸፍአ ሓደጋ ዝነቁት ዘሎ ምልካዊ ስርዓት ብምልጋስ መሓውራት ምልካዊ ጭኮና ብምድምሳስ ኣብ ኤርትራ ፍትሓዊ ዲሞክራስያዊ ቅዋማዊ ስርዓት ንምትካል። መላእ ደለይቲ ፍትሒ ተቓለስቲ ኤርትራውያን በብቦትኡ ብምጥርናፍ ኣብ ስሙር ኣድማዒ ቃልሲ ንምእታው ጻዕርታት ይካየድ ኣሎ፣  ብ24 ሕዳር 2013  ኣብ ዝተኻየደ ህዝባዊ አኼባ ደለይቲ ፍትሒ ኤርትራውያን ዋሽንግተን ዲሲን ከባቢኡን ንምልካዊ ስርዓት ህግደፍ ኣብ ዋሽንግተን ዲሲን ከባቢኡን ንምስዓሩ ዝካየድ ንጥፈታት እትመርሕ ሽማግለ ቆይማ።

ኣቋቑማ:

ሽማግለ ህዝባዊ ማዕበል ንድሕነት ሃገር ዋሺንግተን ዲሲን ከባቢኡን ብመላእ ደለይቲ ፍትሒ ተቐማጦ ዋሺንግተን ዲሲን ከባቢኡን ዝተጋበአ ኣኼባ ብዲሞክራስያዊ መንገዲ ማለት ሓደ ሰብ ሓደ ድምጺ ብዘለዎ መንገዲ ትምረጽ፣

ዕላማ:

1. ህዝባዊ ማዕበል ንድሕነት ሃገርን ህዝብን ዋሽንግተን ዲሲን ከባቢኡን ብሰፊሕ ጥርናፈ ደለይቲ ፍትሒ ህዝቢ ዝተመስረተን። ኣብ ብዙሕነትን ሓድነትን። ምክብባርን ምትእምማንን ህዝቢ ኤርትራ ዝምርኮስን ኮይኑ። ህዝብናን ሃገርናን ንምድሓን ኩሉ ዝከኣል ዘበለ ንምግባር ንኩሎም ደለይቲ ፍትሒ ብምጥርናፍ ኣብ ስሙር ኣድማዒ ቃልሲ ኣንጻር ምላካዊ ስርዓት ብሓደነት ይሰርሕ፣

1. ብህዝቢ ዝቖመን። ምሉእ ተሓታትነቱ ንመላእ ደለይቲ ፍትሒ ህዝቢ ዝኾነን ናይ ዲሞክራስያዊ ለውጢ ሓይሊን ማዕበልን ብምፍጣር ኣብ ባይታ ተጨባጢ ለውጢ ንምምጻእ ኣብ ዋሺንግተን ዲሲን ከባቢኡን ዝቕመጡ ኤርትራውያን ኣብ ደምበ ፍትሒ ንኽዓስሉ ብዕቱብ ምስራሕን ደምበ ፍትሕን ሓርነትን ዲሞክራስን ኤርትራ ብምድልዳል ንዓምጣሪ ምልካዊ ስርዓት ምስዓርን መሓውራት ምልካዊ ጭኮና ምድምሳስን። ኣብ ሃገርና ኤርትራ ንመላእ ህዝብናን ዜጋታትናን ሙሉእ ሓርነትን ማዕርነትን ክብርን ዘጎናጽፍ ቅዋማዊ ዲሞክራስያዊ ፍትሓዊ ስርዓት ንምቛም እጃምና ምግባር፣

መዝነትሽማግለ:

1. ውሽጣዊ ሓድነት ኣባላታ ኣርኣያ ኮይኑ። ደምበ ፍትሒ ኤርትራውያን ንምስፋሕን ንምሕያልን ኣበርቲዓ ትሰርሕ፣
2. ኣብ ዋሽንግተን ዲሲን ከባቢኡን ዝካየድ ናይ ደለይቲ ፍትሒ መደባትን ንጥፈታትን ትመርሕን ናይ ደለይቲ ፍትሒ ውደባታት ተካይድን፣ ሓደነት ህዝብና ንምሕብሓብ። ንዳያስፖራ ኤርትራውያን ብሓፈሻ። ኣብ ዳያስፖራ ንዝዓብዩ መንእሰያት ከኣ ብፍላይ ዝከኣል መደባት ትሰርዕን ትትግብርን፣
3. ንመሰረታዊ ዕላማ ህዝባዊ ማዕበል ንድሕነት ሃገር ዘንጸባርቕ ትምህርታዊ  ሓበሬታታትን መደባትን ትዝርግሕን። ናይ ደለይቲ ፍትሒ ዲሞክራስያዊ ብቕዓታት ንምዕባይ ትሰርሕ፣
4. ህዝባዊ ሰሚናራትን። ዋዕላታትን። ተግባራዊ ንጥፈታትን ከከም ኣድላይነቶም ትውድብን ትመርሕን፣
5. ምስ ኣህጉራውን። መንግስታውን። ዘይመንግስታውን ትካላትን ኣካላታን ብምርኻብ። ናይ ህዝቢ ኤርትራ ዲሞክራስያዊ ቃልሲ ተላልን። ንምዕዋቱ ዝድለ ናይ ግዳም ምትሕብባርን ደገፋትን ንምርግጋጽ ትጽዕር፣
6. ንዝተፈላልዩ ንጥፈታት መሳለጢ ዘድሊ ገንዘብን ነገራትን። ብንጹርን ሓላፍነታውን ዘመናውን ኣገባባት ካብ ህዝቢን ደገፍትን ብምውጻእ ናይ ህዝባዊ ማዕበል ንድሕነት ሃገር ባጀት ተጽድቕ። ተሓታትነትን ግሉጽነትን ብዘለዎ መንገዲ ትዕቅብን ኣብ መዓላ ተውዕልን ምሉእ ጸብጻባት ተቕርብን፣
7. አብ ሰሜን አሜሪካ ምስ ዝቖሙ ህዝባዊ ሽማግለታት ብስምረት ትሰርሕ፣
8. ኣብ ዓበይቲ ጉዳያት ውሳኔታት ብ2/3 ይጸድቕ። ኣብ መዓልታዊ ጉድያት ብተራ ብዝሒ ድምጺ ይጸድቕ፣
9. ኣብ ዋሽንግተን ዲሲን ከባቢኡን ዝካየድ። ኣንጻር ምልካዊ ስርዓት ህግደፍ ዝቐንዐ ንጥፈታት ዝተፈላለዩ ኣካላት (ውድባት። ማሕበራት። ትካላት። ውልቀሰባት) ኣድላዪ ምትሕብባር ምግባር፣

10. ቋንቋ ኣኼባ ከከም ኣድላይነቱ ብትግርኛ። ዓረብኛ ከምኡ እውን እንግሊዝኛ ምጥቃም፣