እቲ ንግስነት ስዑዲ ዓረብ ቅጥዒ ብዘይብሉ መንገዲ ወረቐት ዘይብሎም ኤርትራውያን ዜጋታት ክገፍፍ ከሎ ቅንጣብ ሓልዮት ዘየርኣየ ስሱዕ ምልካዊ ስርዓት ኢሳይያስ፣ ሃድን ንግስነት ስዑዲ ገና ዘንጸላልዎም ዘሎ ወረቐት ዘይብሎም ኤርትራውያን ናይ ጉልበት ሰራሕተኛታት ዝነብሩሉ ርሑቕ ሓውሲ ከተማታትን ከባቢታትን ኣለልዩ ኣብ ኤምባሲኡ ዝሰርሑ ሃሱሳቱ ብምውፋር፣ናብ ኤርትራ ክትምለሱ Less passé ከነውጽኣልኩም ብዝብል ምኽንያት ካብ ሓደ ሰብ ካብ 300-400 ርያል ስዑዲ ይምልጥጦም ከምዘሎ ምንጭታት ኣሰና ካብ ስዑዲ ዓረብ ሓቢሮም።

ብመሰረት’ቲ ሓበሬታ፣ እቶም ካብ መሳኪን ኤርትራውያን ገንዘብ ክምእርሩ ተላኢኾም ዘለዉ ሓሱሳት ተዋፊሮምሉ ዘለዉ ከባቢታት፣ዓሲር፣ ኣብሓ፣ ከሚስ ምሸት፣ ጀዛን ዝኣመሰሉ ከተማታትን ሓውሲ ከተማታትን እዮም።

መንግስቲ ስዑዲ ዓረብ “ዘይሕጋውያን ሰራሕተኛታት” ብዝብል ምኽንያት ግፋ ኣብ ዝጀመረሉ እዋን፣ ናብ ስዑዲ ደዊልና ብተለፎን ዘዛራረብናዮም ናይ ዓይኒ መሰኻኽር ከምዝሓበሩዎ፣ ኩሎም መንግስታት ናይቶም ታርጌት ኮይነን ዝነበራ ሃገራት ብዜጋታቶም ተገዲሶም ላዕልን ታሕትን ክብሉ ከለዉ፣ እቲ ሕጂ ገንዘብ ኣበራቢሩዎ ሃነፍነፍ ዝብል ዘሎ ምልካዊ ስርዓት ኢሳይያስ ነቶም ኣብ ጀዳ፣ ተርሒል ዝብሃል ግዝያዊ መእሰሪ ተዳጕኖም ዝነበሩ ኤርትራውያን ቁሊሕ ኣይበሎምን።