ኣብ ደቡባዊ ምብራቕ ጫፍ ኤርትራ፣ ኣብ ራስ-ዱሜራ ብ 2008 ኣብ መንጎ ኤርትራን ጅቡትን ኣብ ዝተኻየደ ናይ ክልተ መዓልቲ ውግእ ብሰራዊት ጅቡቲ ተማሪኾም ኣብ ቤት ማእሰርቲ ዝርከቡ 19 ኣባላት ሓይልታት ምክልኻል ኤርትራ ነበር፣ ስርዓት ህግደፍ ስለዝኸሓዶም ንልዕሊ 5 ዓመታት ሰንፈላል ኮይኖም ይሳቐዩ ምህላዎም ብምጥቃስ፣ ዝምልከቶም ኣህጉራውያን ትካላት፣ ማሕበረሰብ ዓለም ብሓፈሻ፣ኣብ ድሕነቶም ክተሓባበር ኣብ ወጻኢ ዝርከቡ ኤርትራውያን ኣድላዪ ጻዕርታት ከካይዱሎም ምስ ድምጺ ኣሰና ኣብ ዝገበሩዎ ዝርርብ ተማሕጺኖም።

ንሳቶም፣ “ ‘እቲ ሃገራዊ ግቡእኩም ‘ዩ’ ኢሉ ኣብ ሰራዊት ኣሰሊፉ ዘዋግኣና መንግስቲ፣ ‘ምሩኻት የብለይን’ ኢሉ ጠሊሙና፣ ‘ኣባላት ሰራዊተይ ብምነግስትኹም ከም ምሩኻት ተታሒዞም ስለዘለዉ ኣይለቀኩምን እየ’ ዝበለ መንግስቲ ጅቡቲ ኸኣ ምሕረት ከሊኡና” ብምባል፣ ዋናን ደንጋጽን ዘይብሎም፣ ሓዲግ-መዲግ ኮይኖም ተስፋ ዘይብሉ ሃለዋት የሕልፉ ከምዘለዉ ኣገንዚቦም።

እቶም ኤርትራውያን ግዳያት፣ፈለማ ኣብ ዝተማረኹሉ እዋን፣ ብርቱዕ መውጋእቲ ዝነበሮ ሓደ ብጻዮም ኣብ ኢድ መንግስቲ ጅቡቲ ከምዝተሰውአ፣ ሓደ ካልእ ከኣ ንነዊሕ ዓመታት ብስነኣእሙርኣዊ ሕማም ይሳቐ ከምዘሎ ኣረዲኦም።

ኣህጉራዊ ቀይሕ መስቀል ካብ ፈለማ ኣትሒዙ ከምዝበጽሖምን ኩነታቶም ከምዝፈልጦምን ብምጥቃስ ከኣ፣ እቲ ጉዳይ ነቲ ኣብ ከምዚ ዝኣመሰለ ጉዳያት ዝተመኮረ ኣህጉራዊ ማሕበር ከይተረፈ ኣጊሙዎ ከምዘሎ ገሊጾም።  መብዛሕትኦም ተወጊኦም ከምዝተማረኹ ብምምልካት ከኣ፣ ደሞም ዝኸዓዉላ ሃገር እናሃለወት ሃገር ኣልቦ ኮይኖም ምህላዎም ካብ ኩሉ ንላዕሊ ምቕባሉ ሓርቢቱዎም ከምዘሎ ምስናይ ዓቕሊ ጽበት ኣገንዚቦም።

ምሉእ ትሕዝቶ ናይቲ እዞም መሳኪን ኤርትራውያን ግዳያት ምስ ራድዮ ኣሰና ዝገበሩዎ ዝርርብ ኣብ ናይ ሎሚ ሰኑይ መደብ ድምጺ ኣሰና ተኸታተሉ።

ስርዓት ህግደፍ፣ ኣብቲ ኣብ መንጎ ሰራዊት ኢትዮጵያን ኢስላሚክ ኮርትስን ብ2006 ኣብ ሶማል ዝተኸየደ ውግእ ተታሒዞም ኣብ ኢትዮጵያ ተኣሲሮም ንዝርከቡ ክልተ ኣባላት ሚኒስትሪ ዜና ጋዜጠኛታት ተስፋልደት ኪዳነን ሳልሕ ጋማን ብተመሳሳሊ መንገዲ ስለዝኸሓዶም ክሳብ ሎሚ ተኣሲሮም  ከምዘለዉ ይፍለጥ።