እቲ ካብ ዝተፈላለያ  ስቴትስ ሕቡራት መንግስታት ኣመሪካን ዝተፈላለያ ከተማታት ካናዳን፡ ኣሽሓት ኪሎሜተራት ተጓዒዞም ናብ ዋሺንግተን ዲሲ ብምምጻእ፡ ብምኽንያት መበል 22 ዕለተ ናጽነት ኤርትራ ካብ 24-25 ግንቦት “ህዝባዊ ማዕበን ንድሕነት ሃገር” ብዝብል ቴማ ኣብ ዋሺንግተን ዲሲ ከካይዱዎ ዝቐነዩ፡ ሰላማዊ ሰልፍን ዋዕላን ዘጠቓለለ መደብ ኤርትራውያን ደለይቲ ፍትሕን ዲሞክራስያዊ ለውጥን  ብድሙቕ ተሳታፍነትን ምዕሩግ ሰሚናራትን ብዓወት ተዛዚሙ።

ደድሕሪ’ቲ ከም ኣካል ናይዚ መደብ’ዚ ብ24 ግንቦት ኣብ ዋሺንግተን ዲሲ ዝተኻየደ 2 ሽሕ (2000) ኤርትራውያን ደለይቲ ለውጢ ዝተሳተፉዎ ውዕዉዕ ሰላማዊ ሰልፊ፡ ብ25 ግንቦት፡ ኣብ ሂልተን ሆቴል፡ ተሳተፍቲ “መሪሕነትን ኣፈታትሓ ግርጭትን” ኣብ ትሕቲ ዝብል ኣርእስቲ፡  ብዶር ኣንገሶም ኣጽብሃ፡ ኣቶ ዓብደላ ሱሌማን ከማኡ ‘ውን ድር ገብረመስቀል ገብረማሪኣም ዝቐረቡ መግለጺታት ተኸታቲሎም።

ካብኡ ቐጺሉ ዶር ማሕሙድ በሽር ንዕድላትን ብድሆታትን ድሕሕሪ ውድቀት ኢሳይያስ ዝስዕብ መድረኽ ዝድህስስ ወረቐት ኣቕሪቡ። ንምልላይ ፍልልያት ደምበ ተቓውሞን ዕንቅፋታት ኣሊኻ ኣብ መኸተ ውልቀምልካዊ ስርዓት ህግደፍ ንቕድሚት ምስጓም  ዝርኢ ብኣማኑኤል ኢያሱ፡ ንደምበ ተቓውሞ፡ ቃልሲ ኣንጻር ህግደፍን ምንቅስቓስ መንእሰያትን ዝምልከት ካልእ ብከራር ህያቡ ዝተመርሐ ሓባራዊ ዘተ ድሕሪ ‘ውን ተኻይዱ።

ብዘይካዚ፡ ዶር ኣልጋነሽ ፍስሃ ጋንዲ ከምኡ ውን ምስተር ጆን ስታፈር ንዘይሕጋዊ ምስግጋር ስደተኛታት ኤርትራውያንን ኣብ ሲናይ ዚወርዶም ዘሎ ስቅያትን ዝምልከት መብርሂ ንተሳተፍቲ ሂቦም።

ዓርኪ ኤርትራን፡ ጋዜጠኛን ናይ ዩኒቨርስቲቲ መምህርን ዳን ኮኔል ንደምበ ተቓውሞ ኤርትራ ከምኡ ‘ውን ንኤርትራ ኣብ ዓለማዊ መድረኽ ዝድህስስ ሰፊሕ ጽሑፍ ኣቕሪቡ።

መንእሰይ ኣድያም ሃይለ ‘ውን ንተሳተፍነት ደቀንስትዮ ኣብ ምንቅስቓስ ዲሞክራስያዊ ለውጢ ዝጠቅስ ምግለጺ ኣቕሪባ።

ኣብ መወዳእታ ኸኣ ኣቶ ተስፋይ ተምነዎ፡ ንምንቅስቓስ መንእሰያት፡ ደምበ ተቓውሞ መኸተ ምልካዊ ስርዓት ህግደፍን ዝብርህ ሰፊሕ ጽሑፍ ኣቕሪቡ።

ኣብቲ ርሱን ክትዓት ዘጠቓለለ ዋዕላ፡ ተሳተፍትን ኣቕረብትን፡ ንምልካዊ ስርዓት ህግደፍ ንምምካት ኣብ ዝካየድ ቃልሲ፡ ስምረት ኩሎም ተቓወምቲ ኤርትራውያን ወሳኒ ምዃኑ ኣስሚሮምሉ።

ኣብ ክልቲኡ ምሸታት ማለት 24ን 25ን ግንቦት ኣሮን፡ ንያት፡ ዮናታትን፡ ኣማኑኤል ዘሚኪኤል፡ ዓብዱ ዝርከቡዎም ደረፍቲ፡ ከምኡ ድማ፡ ኬኒ ሳልሓዲን፡ ዳዊት ተስፋማርያም፡ ዳዊት ረዘነ ዝርከቡዎም ሙዚቀኛታት ንተሳተፍቲ ብድሙቕ ጓይላ ከላህዩዎም ኣምስዮም።