ምስቲ ብ21 ጥሪ ኣብ ፎርቶ ዝተኻየደ ምንቅስቓስ ሰራዊት ብዝተኣሳሰረ ምኽንያት ብምልካዊ ስርዓት ህግደፍ ተሓይሩ ዝነበረ ኣመሓዳሪ ዞባ ደቡብ ነበር ኣቶ ምስጦፋ ኑርሕሸን ድሕሪ 4 ሰሙን ማእሰርቱ ከምዝዓረፈ ምንጭታት ካብ ኣስመራ ሓቢሮም።

ንሱ፡ ብሕማም ሽኮርያ ጥቑዕ ስለዝነበረ ኣመሓዳሪ ኣብ ዝነበረሉ ግዜ ክልተ-ሰለስተ ግዜ ኢንሱሊን ተወጊኡ እዩ ዝንቀሳቐስ ነይሩ።  ነዚ ኣዳዕዲዖም ዝፈልጡ ሰበስልጣን ህግደፍ፡ መድሃኒት ከልኪሎም ሕክምናዊ ክንክንን ስለዝተነፈጉዎ ከኣ እዩ ኣብ ሸልኡ ብስቅያት ሕማም ሽኮርያ ዓሪፉ።

እዚ ከምዚ ኢሉ ኸሎ፡ ኣብ ድባርዋ፡ ፋብሪካ ማይ ስሓ (Mineral Water) ፋብሪካ ብሽኮቲ፡ ፋብሪካ ስፑኞን ፍርናሽን፡ ፋብሪካ ዚንጎ ዝኣመሰሉ ዝተፈላለዩ ፋብሪካታት ዝውነን፡ ኣብ ኣስመራ ዝመደበሩ ፍሉጥ ኤርትራዊ ብዓል ንብረት፡ ኣቶ ሳልሕ፡ ምስ ጉዳይ ኣመሓዳሪ ዞባ ደቡብ ነበር ኣቶ ምስጦፋ ኑር ሕሸን ብዝተኣሳሰረ ምኽንያት ብስርዓት ህግደፍ ከምዝተኣሰረ እቶም ምንጭታት ኣገንዚቦም።

ንሳቶም፡ ብዙሓት ሰብ ዋኒን ዞባ ደቡብ ንምስጦፋ ጉቦ ብምሃብ መሬት ረኺብኩም ብዝብል ክሲ ይሕተቱን ይኽሰሱን ከምዘለዉ ብምምልካት፡ ቀንዲ ምኽንያት ማእሰርቲ ኣቶ ሳልሕ፡ ኣቶ ንምስጦፋ ብብልሽውና ዝተቛማጠዐ ብዓል ስልጣን ኣምሲልካ ብምርኣይ፡ ነቲ ብፖለቲካዊ ጉዳይ ዝወረዶ ማእሰርትን ሞትን ህዝባዊ ምድንጋጽ ተገዳስነትን ከምዝሕረም ብምግባር ንኽብደት ናይቲ ኣብ ልዕሊ ወዲ ሰብ ፈጺሞሞ ዘለዉ ናይ ህይወት ጥፍኣት ንምቅላል ኢሳይያስን ሰዓብቱን ዝመሃዙዎ ሜላ ምዃኑ ኣረዲኦም።

ኣብታ ኣብ ዞባ ደቡብ እትርከብ ንእሽቶ ከተማ ድባርዋ፡ መሬት ንኣውፈርቲ ተዓዲሉ ብብዝሒ ፋብርካታት ኣብ ዘስፋሕፍሓሉ እዋን፡ ኣቶ ምስጦፋ ኣመሓዳሪ ዞባ ጋሽ ባርካ እዩ ነይሩ።