ኣብ ዝሓለፈ ሰሙን፣ 10 ኤርትራውያን መንእሰያት ኣብ ኣስመራ ነብሰ-ቕትለት ከምዝፈጸሙ ምንጭታት ሓቢሮም።

ሓደ ካብቶም ግዳያት ዮሃንስ ዘሪሁን ዝተባህለ ወዲ 24 ዓመት ሕሳስ ልደ ስድራቤት ክኸውን ከሎ፣ ሓደ ካልእ ግዳይ ወዲ 17 ዓመት መንእሰይ ከኣ ወናኒ ፋርማሲ ዝኾነ ኣቦኡ ብመደብ ዕጥቂ ህግደፍ ንዝተዋህቡዋ ብረት ተጠቒሙ ህይወቱ ባዕሉ ከምዘሕለፈ እቲ ሓበሬታ የረድእ።

ኣብ ኤርትራ፣ ብሕልፊ ድማ ኣብ ኣብቲ ብመንሰያት ኣባላት ሃገራዊ ኣገልግሎት ተዓብሊሉ ዘሎ ሰራዊት ዓቕሊ ጽበትን ቅብጸትን ዝመበገሲኡ ነብሰቕትለት ልሙድ ዕለታዊ ተግባር ኮይኑ ከምዘሎ ብቐጻሊ ዝበጽሑና ሓበሬታታት የገንዝቡ። ነዚ ናይ ሎሚ ፍልይ ዘብሎ እንትልዩ ጃምላዊ ምዃኑ እዩ።

እዚ ጃምላዊ መቕዘፍቲ ናይዞም 10 መስኪን ኤርትራውያን ዕሸላት፣ ኣብቲ ምእንቲ ህዝቢ ኤርትራ ብዝያዳ ድማ ምእንቲ ሓደስቲ ወለዶ ኤርትራ ንዝተሰውኡ ጀጋኑ ሰማእታት እንዝክረሉ ቕነ ዝኽሪ ምኽሳቱ፣ ነቲ ጠንቂ ቅብጸትን ዓቕሊ ጽበትን መንእሰያት ኤርትራ ክንሱ ብተለቭዥንን ድራማታትን ብኣኽብሮት መብጽዓ ሰማእታትና ክማጻደቕ ዝፍትን ምልካዊ ስርዓት ህግደፍ ዝኸሽሕ ተርእዮ እዩ።

መርበብ ሓበሬታ ኣሰና በዚ ዘሕዝን ትራጀዲ ናይዞም መንእሰያት ኣሕዋት ንዝተተንከፉ ኤርትራውያን ስድራቤታት ጽንዓት ይሃብኩም ትብል።