ፖሊስ ጀርመንን ጥልያንን፣ ሊብያ መዋፈሪኦም ገይሮም፣ ክሳብ 3 ሽሕ ዶላር ንሓደ እናኣኽፈሉ ልዕሊ 20 ስደተኛታት ዝሓዛ ጀላቡ ብማእከላይ ባሕሪ ናብ ዓዲ ጥልያን ከሰጋግሩ ምጽንሖም ዝኸሰሱዎም፣ 29 ዓመት ዝዕድሚኡ ኣብ ጀርመን ዝምቕማጡ መዓሾ ተስፋማርያም ዝተባህለ ኤርትራዊ ዝርከቦም 11 ዘይሕጋውያን መሰጋገርቲ ስደተኛታት ከምዝኣሰሩ ማዕከናት ዜና ኢጣልያ ሓቢረን።

እዞም ኣብ ትሕቲ ቀይዲ ውዒሎም ዘለዉ ዘይሕጋውያን መሰጋገርቲ፣ ኣብ ምፍናው ናይታ ብ27-28 ሰነ ናይዚ ዓመት’ዚ 244 ስደተኛታት ጽዒና ካብ ሊብያ ድሕሪ ምብጋሳ፣ ሃለዋታ ጠፊኡዎም ስድራቤት ናይቶም ዝበዝሑ ኤርትራውያን ዝኾኑ ተሳፈርቲ ክጭነቑ ዝጸንሑ፣ እንተኾነ ብመሰረት እዚ ሓበሬታ ‘ዚ ኣብ ወሽመጥ ሲሲልያ ምጥሓላ ዝንገረላ ዘሎ ጃልባ ኢድ ከምዘለዎም ከምዝጥርጠሩ እቲ ዜና የመልክት።

ብመሰረት እቲ ሓበሬታ፣ መዓሾ ተስፋማርያም ካብ ሊብያ ናብ ኤውሮጳ ምስ ሰገረ ኣብ ጀርመን ተታሒዙ ብመርመርቲ ፖሊስ ድሕሪ ምልፍላፉ፣ ኣብ ዓዲ ጥልያን፣ ካብ ሲሲልያ ክሳብ ሮማ ኣብ ዝተፈላለዩ ቦታታት ብፖሊስ ተታሒዞም ዘለዉ ብዕድመ ኩሎም መንእሰያት ምዃኖም ዝእመነሎም ኤርትራውያን ጥርጡራት ዘይሕጋውያን መሰጋገርቲ እዞም ዝስዕቡ እዮም።

ዓብደለጢፍ መሓመድ

ማሓመድ ስዒድ ማሓመድ ካር

ክብሮም ካሕሳይ

ዑመር ኢብራሂም

ማርሳላ ክብሮም ካሕሳይ

ፍሊጶስ ኣብርሃ

ዓሊ ዓብደላ ማሓመድ

ኤፍሬም ጎይቶኦም

ሓደ ንገዝኡ መጽንሒ ናይቶም ናብ ሰሜን ኤውሮጳ ዝሰግሩ ስደተኛታት ገይሩ ዝጥቀመሉ ዝነበረ ዓንደብርሃን የማነ ዝተባህለ ኣብ ዓዲ ጥልያን ዝነበር ሰብ ‘ውን ብተመሳሳሊ ኣብ ትሕቲ ቀይዲ ኣትዩ ‘ሎ።

እዚ ሓበሬታ እዚ ርጉጽ እንተደኣ ኮይኑ፣ እዚ ዜና ‘ዚ፣ እታ ብ 27/28 ሰነ ካብ ሊብያ ምስ ተበገሰት ኣበይ ከምዝኣተወት ሃለዋታ ኣጥፊኣ ዝጸንሐት ዝበዝሑ ካብቶም 244 ተሳፈርታ ኤርትራውያን ምዃኖም ዝእመነሎም ስደተኛታት ሒዛ ዝነበረት ጃልባ ከምዝጠሓለት ዝእምት ናይ መጀመርያ ወግዓዊ መርድእ እዩ።

ድሕሪ ህልቂት ናይቲ ኣብ ላምፐዱዛ ዘጋጠመ 367 ኤርትራውያን ኣብ ሓደ እዋን ዘህለቐ ትራጀዲ፣ በብጉጅለ ይኹን ብውልቂ ብዙሓት ኤርትራውያን ኣብ ማእከላይ ባሕሪ ክጠፍኡ ‘ኳ እንተጸንሑ፣ እዚ ድሕሪ ፍጻሜ ላምፐዱዛ ዝዓበየ ጃምላዊ ቅዝፈት ኤርትራውያን ምዃኑ ድማ ይእመን።