እቲ ውልቀመላኺ ኢሳይያስ ኣፈወርቂ ዘተኣታተዎ ፕሮጀክት ዕስክርና ሽማግለታትን ገዳይምን ተጋደልቲ ኣብቲ ብ “ህዝባዊ ሰራዊት” ዝፍለጥ ናይ ምልሻ መሳርዕ፡ ገለ ዓመታት ኣሕሊፉ `ኳ እንተሎ፡ ገና ኣከራኻሪ ኮይኑ ምህላዉን በቶም ተሳተፍቱ ይኹን ተዓዘብቱ ተቐባልነት ከምዘይረኸበን ምንጭታት ሓቢሮም።

በዚ ምኽንያት፡ ሓላፊ ናይቲ መደብ ዕስክርና ብሪጋደር ጀነራል ተኽለ ማንጁስ፡ ካብቶም ግዳይ ናይዚ ኢሳይያስ ዘበገሶ ግዱድ ዕጥቂ ኮይኖም ብቐጻሊ ጻውዒት ታዕሊምን ተሰለፍ- ተኣንጎትን ዝከላበቱን ካብ ስድራኦም ዝፈላለዩን ዘለዉ ዕድመ ዝደፍኡ ዜጋታት፡ `ኣድላይነት ናይዚ መደብ`ዚ እንታይ እዩ?` ዝብል ቀጻሊ ሕቶታት ስለዝዘነቦ፡ ናብ ኢሳይያስ ቀሪቡ፡ እንታይ መልሲ ክህቦም ከምዘለዎ ከምእተሸገረ ብምጥቃስ ምኽንያት ናይቲ መደብ `ኳ እንተሓተተ፡ ኢሳይያስ፡ `ብቐደሙስ መዓስ ምኽንያት መጋደሊኹም ፈሊጥኩም ተሰሊፍኩም` በሎም ኢሉ ብብድዐን ባጫን ምምላሱ፡ ነቲ ኩነታት መሊሱ ኣብኢሱዎ ከምዘሎ እቶም ምንጭታት ኣገንዚቦም።

ብዙሓት ካብቶም ኣብ ሓርነታዊ ቃልሲ ንእስነቶም ዘብለዩ፡ ኣብዚ እዋን`ዚ ህዱእ ሰላማዊ መነባብሮን ጥሮታን ዝግብኦም ተጋደልቲ ነበር፡ ንታዕሊም ብዝብል ምኽንያት ናብ ዓሳውን ሃሩርን፡ ግቡእ ሕክምናዊ ኣገልግሎት ዘይብሉን ቦታ እናተወስዱ ብሕማም ይጥቅዑን ይሞቱን ከምዘለዉን ይፍለጥ።

ንሳቶም ምእንቲ ናጽነት ኤርትራን ሓርነት ህዝባን ተጋዲሎም ክንሶም ኣብዚ እዋን `ዚ ኣብ ኤርትራ ምልካዊ መግዛእቲ ኢሳይያስ ነጊሱ ብምህላዉ፡ እቲ ናይ ኢሳይያስ ዘረባ ባጫ ዘይኮነ፡ ፖለቲካዊ ትርጉም ከምዘለዎ ንጹር እዩ። ስለዚ፡ እቶም ግዳያት፡ ካብ ኢሳይያስ ግዝያዊ ፍታሕ ክረኽቡ ኣብ ክንዲ ምዕዝምዛም፡ መሰረታዊ ፍታሕ ንምርካብ ብዕቱብነትን ልቦናን ክሓስቡን ክንቀሳቐሱን ኣለዎም ይብሉ ተዓዘብቲ።