ፕረዚደንት ደቡብ ሱዳን ሳልቫ ኬር፣ እሙናት ወተሃደራት ናይቲ ኣቐዲሙ ካብ ስልጣን ዘባረሮ ምኽትል ፕረዚደንት ነበር ሪክ ማቻር ናብ ሎሚ ኣብ ዝወግሐ ለይቲ ዘካየዱሉ ፈተነ ዕልዋ ከምዘፍሸሎ ቢቢሲ ንጋዜጣዊ መግለጺኡ ብምጥቃስ ሓቢራ።

ንሱ፣ ኣብ ዋና ከተማ ደቡብ ሱዳን፣ ጁባ፣ ከቢድ ናይ ቶኽሲ ምልውዋጥ ከምዝሓደረ ብዝተፈላለያ ማዕከናት ዜና ዓለም ድሕሪ ምቅልሑ እዩ ጋዜጣዊ መግለጺ ሂቡ።

ፕረዚደንት ሳልቫ ኬር፣ መንግስቱ ነቲ ኩነታት ምሉእ ብምሉእ ተቖጻጺሩዎ ከምዘሎ ብምርግጋጽ፣ ንበርጌስ ህዝቢ ዝምልከት ሰዓት እቶእቶ ካብ ኣጋ ምሸት ሰዓት 6፣00 ኣትሒዙ ክሳብ ሰዓት 6፣00 ወጋሕታ ክጸንዕ ምዃኑ ኣዊጁ ‘ሎ።

ኣብቲ ናይ ቶኽሲ ልውውጥ ሓያለ ሰባት ከምዝቖሰሉ፣ ብኣማኢት ዝቑጸሩ ‘ውን ኣብ ጁባ ኣብ ዝርከብ ቀጽሪ ውድብ ሕቡራት ሃገራት ተዓቝቦም ከምዘለዉ እቲ ዜና ብተወሳኺ የመልክት።

ኣብ ጁባ ብዙሓት ኤርትራውያን ሰብ ዋኒን፣ ነጋዶን ሰራሕተኛታትን ከምዘለዉ ይፍለጥ።

ኩነታቶም ንምፍላጥ ሎሚ ቅድሚ ቀትሪ ብቴለፎን ደዊልና ከምዘዘራረብናዮም፣ ብዛዕባ ኣብ ኤርትራውያን ዝወረደ ጉድኣት ዛጊት ዝተሰምዐ ሓበሬታ የለን። ይኹንምበር፣ በቲ ግጭት ዝተሻቐሉ ኤርትራውያን ኣብ ኣባይቶም ተዓጽዮም ነቲ ኩነታት ይከታተሉዎ ከምዘለዉ ንኣሰና ሓቢሮም።

እቲ ቶኽሲ ካብታ ከተማ እናረሓቐ ይኸይድ ከምዘሎ ኳ እንተጠቐሱ፣ ኣብ ጁባ ዝርከቡ ኤርትራውያን ሰብ ዋኒን፣ ነጋዶን ሰራሕተኛታትን ተጠመቲ ብምዃኖም፣ ነቲ ለይቲ ዝጸንዕ ሰዓት እቶእቶ ከኽብሩዎን ዝያዳ ጥንቃቐ ከዘውትሩን ነተሓሳስብ።

ክቡራት ተኸታተልቲ ኣሰና፣ ሓድሽ ምዕባሌታት ኣብ ዝረከብናሉ ከነካፍለኩም ምዃና ‘ውን ነዘኻኽር።