ፍሉይ ኣሃዱ ሰራዊት ኢትዮጵያ ብሰለስተ ኣንቴኖቭ ነፈርቲ ብምስጢር ናብ ኤርትራ ካብ ዝኣቱ ሰሙናት ኣሕሊፉ ከምዘሎ ምንጭታት ካብ ኤርትራ ኣረጋጊጾም።

እተን ኣንቴኖቭ ዝዓይነተን ፍሉይ ኣሃዱ ሰራዊት ኢትዮጵያ ዝጸዓና ነፈርቲ ጸላም ተጎልቢበን ኣብ ኣስመራ ኣብ ዝርከብ ሓይሊኣየር ኤርትራ ከምዝዓረፋ እቶም ምንጭታት የረድኡ።

እቲ ሓበሬታ ካብ ዝበጽሓና ክልተ ሰሙን ኳ እንተሕለፈ፡ ከነረጋግጾ ግዜ ከምዝሓተተና ነዘኻኽር።

እቲ ውልቀመላኺ ኢሳይያስ፡ ብዘይ ዝኾነ ቅጥዕን ወግዓውነትን ብኢደ ወነኑ ምስ ኢትዮጵያ ዝገበሮ ርክብን ንልኡላውነት ኤርትራ ኣብ ዋጋ ዕዳጋ ዘእቱ ስምምዓትን ነቲ ምእንቲ ናጽነቱ ከቢድ መስዋእቲ ዝኸፈለ ህዝቢ ኤርትራ ኣቖጡዑዎ ብምህላዉ፡ ስልጣኑ ንምሕላው ካብ ኢትዮጵያ ወተሃደራት ኢምፖርት ምግባሩ ብህዝቢ ኤርትራ ክጽወር ዘይግብኦ ኳ እንተኾነ ዘገርም ኣይኮነን።

ኣብ ሓይልታት ምክልኻል ኤርትራ ዘለዎ ምትእምማን እናጥፍአ ዝመጽአ ውልቀመላኺ ኢሳይያስ፡ ነቶም ኣብ ኤርትራ ዘሰልጥኖም ዝነበረ ከም ደምሒት ዝኣመሰሉ ዕጡቓት ኣብ ዝሓለፈ ዓመታት ኣብ ሓለዋ ዶብን ግፋ ኤርትራውያን መንእሰያትን የዋፍሮም ከምዝነበረ ይፍለጥ።

ንሱ፡ ነቲ ንህዝቢ ኤርትራ ላል ዘበለሉ `ዶባት ከይተሓንጸጸ  ምስ ኢትዮጵያ ርክብ ምግባር ዘበት` ዝብል ፈኸራ ዓጺፉ ብውልቃዊ ውሳኔኡ ምስ ቀዳማይ ሚኒስተር ኢትዮጵያ ሃንደበት ድሕሪ ዝገበሮ ርክብ፡ ንኣዘዝቲ ሓይልታት ምክልኻል ኤርትራ ኣኪቡ `ድሕሪ ሕጂ ንስኻትኩም ኣይተድልዩን ኢኹም እዋንኩም ኣብቂዑ `ዩ` ከምዝበሎም `ውን ይዝከር።

እዚ ከምዚ ኢሉ ኸሎ፡ እቲ ወተሃደራት ኢትዮጵያ ብምስጢር ናብ ኤርትራ ዝጓርት ዘሎ ውልቀመላኺ ኢሳይያስ፡ ነቶም ህዝባዊ ሰራዊት ብዝብል መጸውዒ ኣብ ዝሓለፈ ዓመታት ብረት ኣዕጢቑዎም ዝነበረ ክሳብ 65 ዝዕድሚኦም ሽማግለታት ዝርከቡዎም ኤርትራውያን ብረቶም ከረክቡ መመርሒ ኣመሓላሊፉሎም ከምዘሎ `ውን ምንጭታት ኣረጋጊጾም።

እቲ ብረት ናይ ምእካብ መስርሕ ብዞባ ማእከል ተጀሚሩ ከምዘሎ `ውን ተፈሊጡ።

እዚ ሰራዊት ኢትዮጵያ እናዕደምካ ዕጥቂ ኤርትራውያን ናይ ምፍታሕ ስጉምቲ`ዚ `ውን ነቲ ውዲተኛ ኢሳይያስ ሓዲሩዎ ዘሎ ዘይምትእምማንን ፍርሕን ዘንጸባርቕ እዩ።

እቶም ቀደም ስልጣን ኢሳይያስ ንምሕላው ተገዲዶም ብረት ዝዓጠቑ ኤርትራውያን ግን፡ ኣብዚ ሰራዊት ኢትዮጵያ ብውዲት ኢሳይያስ ሃገሮም ብሰላሕታ ዝወረሉ፡ ናጽነት ኤርትራ ዝድፈረሉ ዘሎ እዋን ብረትና ኣይነወርድን ኢሎም ብምቅዋም ልኡላውነቶም ኣብ ምኽባር ክጥቀሙሉ እዩ ዝግባእ።

ውልቀመላኺ ኢሳይያስ፡ ነቲ ህዝቢ ኤርትራ ካብ ሓደ ስድራ ሰለስተ ኣርባዕተ ኣሰዊኡ ዝረኸቦ ናጽነትን ዝዓቀቦ ልኡላውነትን ብኸምዚ ዝኣመሰለ ውዲትን ጥልመትን ከዕንዎ፡ ካብኡ ሓሊፉ፡ ነቲ ንወዱ ኣብርሃም ኢሳይያስ ኣፈወርቂ ወራሲ ዓራት ክገብሮ ንነዊሕ እውን ብምስጢር ከሳልጦ ዝጸንሐ ውጥን ከግህድ ከሎ፡ ህዝቢ ኤርትራ ስቕ ኢሉ ፈዚዙ ምዕዛቡ ንገዛእ ርእሱ ጥልመት ሕድሪ ሰማእታት ኤርትራ ዘመልክት፡ መጻእቲ ወለዶታት ኤርትራ ብሕፍረትን ውርደትን ክዝክሩዎ ዝነበሩ ታሪኻዊ ዕዳ እዩ።