ብህዝቢ ደቡብ ኣፍሪቃ ከም ኣቦ ሃገር፣ ብዓለም ድማ ኣርማ ሰላምን ዕርቅን ዝፍለጥ ፈላሚ ጸሊም ፕረዚደንት ናይታ ብዓሌታዊ ስርዓት እትምራሕ ዝነበረት ደቡብ ኣፍሪቃ፣ ህቡብ መራሒ ኒልሰን ማንዴላ፣ ኣብ መበል 95 ዓመቱ ሎሚ ሓሙስ 5 ታሕሳስ ዓሪፉ።

ሞት ናይቲ ኣንጻር ዕብለላ ጽዓዱ፣ ጸረ ኣፓርታይድ ዝተቓለሰ፣ ምእንቲ ዕላምኡ ን27 ዓመታት ዝተሓየረ ማንዴላ፣ ንህዝቢ ደቡብ ኣፍሪቃን ዓለምን ብተሌቭዥን ዘርድአ፣ መራሒ ደቡብ ኣፍሪቃ ጃኮብ ዙማ፣ “ ሃገርና ብሉጽ ውላድ፣ ህዝብና ድማ ብሉጽ ኣቦ ስኢኖም ኣለዉ፣ ማንዴላ ሓዲጉና ከይዱ” ክብል ሓዘኑ ድሕሪ ምግላጽ፣ ባንዴራ ‘ታ ሃገር ናብ ፍርቂ ለጠቕ ክትብል ኣዚዙ።

ዕረፍቱ ዝሰምዑ ደቡብ ኣፍሪቃውያን ባንዴራ ሃገሮም እናውለብለቡ ኣብ ፊት ገዝኡ ብምእካብ ሓዘሞም ክገልጹን ልዕሊ ዓሌታዊ ፍልልይ ክብል ኢሉ ህዝቢ ደቡብ ኣፍሪቃ ንምሕባር ከመጕሱን ኣብ ኣህጉራዊ ፈነወ ቴለቭዥናት ተራእዮም።

መራሕቲ ዓለም ከኣ ብሞት ናይቲ ንደቡብ ኣፍሪቃ ን5 ዓመት ድሕሪ መምርሑ ባዕሉ ስልጣኑ ዝገደፈ፣ ብሞራላዊ ልዕልናኡን ውርዙይነቱን ዓለማዊ ኣድናቖት ዝረኸበ ኒልሰን ማንዴላ፣ ዝተሰመዖም ሓዘንን ኣኽብሮትን ይገልጹ ኣለዉ።

ኒልሰን ማንዴላ ብሕማም ተኻኢሉ ሕክምናዊ ክንክን ክረክብ ድሕሪ ምጽናሕ እዩ ዓሪፉ።