‘ሕድሪ ስዉኣት ንልምዓት’ ኣብ ትሕቲ ዝብል ጭርሖ ዲዩ — ናብ ሃገሮምን ህዝቦምን ወዲቚ ኣብ ልዕሊ ዘሎ ኩሉ ዓይነታዊ ጸገም ዝላገጹ ሰብ ሕመቕ መንእሰያት ህግደፍ (YPFDJ) ትማሊ ቀዳም 07/10/2017 ኣብ ከተማ ሸፊልድ ተኣኪቦም ዉዒሎም። እዚ ዋዕላ ብቐንዱ ነቲ ኣብ ሆላንድ ክካየድ-ዝተሓስበ ዋዕላ መንእሰያት-ህግደፍ 2017 እሞ ብድሕሪ ብኤርትራውያን ደለይቲ ለውጢ ዘጋጠሞ ተቓውሞ ምስራዙ ሞራል አባላት መንእሰያት ህግደፍ ብሪጣንያ (YPFDJ) ንምሕያል ዝዓለመ እኳ እንተኾነ ሕጂ ግን “ዓመታዊ ገምጋም መንእሰያት ህግደፍን ዘተ ኤርትራውያን ተቐማጦ ብሪጣንያ” ዝብል ዕባራ ምኽኒት ተጠቒሞም ኢዮም ጸዊዖሞ። እዚ ኣብ ኣወዳድባን ምውህሃድን ዝተኸተልዎ ኣገባብን ሜላን ከኣ መርኣያ ነቲ ብርዱእ ምኽንያት ቁጽሩ ዘንቆልቁል ዘሎ ብዝሒ ኣባልነትን ተሳታፍነትን መንእሰያት ህግደፍ (YPFDJ) ክብ ንምባል ብዘይካ መንእሰያት– “ዘተ ኤርትራውያን ተቐማጦ ብሪጣንያ” እንኮላይ ዝብል ሓረግ ወሲኾም ሓለፍቲ ሃገራዊ ሽማግለ በዓላት፣ ውዳቤታት ህግደፍ፣ ናይ ብሑሶት ማሕበረ-ሰባት፣ ብስም ሃማደኤን ገለ ግዳም ሓደር በጋሚንዶታትን ተቓሞርትን ሓዊስካ ብደረጃ ብሪጣንያ ብጥቡቕ ሚስጢር ኢዩ ክካየድ ተፈቲኑ።