ኣብ ዝባን ደቂ ህዝቢ ሸይሸይ ዝብል ዘሎ  ናይ ኢሳያስ ስርዓት፡ ብምንታይ’ዩ ካብ ናይ መንግስቱ ስርዓት ክፍለ ዚኽእል። እዚ ኣብ ኤርትራ  ዝግበር ዘሎ ቅዝፈት ኣብ ኣፍሪቃ’ውን መዳርግቲ የብሉን።ስለዚ እዞም ፍትሒ ዝሕላገትና፣ ዲሞክራሲ ዝኣርማና፡ ነዛ ኣብ ፎርቶ ዝተወለዐት ሽግ ከይትቅህም ፡ ነዚ ብእከይ ተግባራቱ ዚፍለጥ ናይ ኢሰያስ ስርዓት ብምሉእ ዓቅምና ንኹንኖ ኣለና። ሃገር ለኪሙ ዝጠፈአ’ምበር ሃገር ኣልሚዑ ዝወደቐ ውልቀ-መላኺ ስለ ዘየለ ድማ፡ ኢሳያስ’ውን ካብቶም ኣብ ዓለም ዚተፈልጡ: ውልቀ-መለኽቲ ሓደ ምኻኑ ሎሚ ከም ጸሓይ ቀትሪ በሪሁሉ ዘሎ ጊዜ ስለዝኾነ፡ ንሕና ንኹሉ ናይ ኣረኣእያና ፍልልይ ኣብ ቦትኡ ኣቀሚጥና፡ ሕጂ ኩሉና ሓቢርና ኢደይ ኢድካ እናተቀባበልና፡ ሓመድ ንድበዮ።

ጠበቃ ዉጹዕ ኤርትራዊ፡ ጅግና ወዲ ዓሊ:

ብኣንክሮ ትእምት፡ በሊሕ መስተውዓሊ፡

ወዲቅካዶ ምእንቲ ዓደቦ፡ንክርዳድ ክትኣሊ፡

መቃብርካ ይግበሮ: ውሓዚ ዛራ ፈልፋሊ፡

ታሪኽ ኢኻ ገዲፍካ፡ ታሪኽ ዘይሃስስ ዘይበሊ።

 

ወዲ ዓሊ፡ እንተ ተኸወለና ገጽካ፡

መንፈስካ ግን፡ ኣብ ልብና ኣሎ ኣጆኻ፡

ክስዕርር ኢዩ ፡ ዝሓጸርካዮ ቃጽዖኻ፡

ዘራዓይ ክሕልዎ፡ ተቀቢሉ ሕድርኻ፡

ስለዝተወፈኻ፡ ምእንቲ ውጹዕ ህዝብኻ ።

 

ንፎርቶ ደይበ፡ ንወዲ ዓሊ ኣመሩ ክገብር፡

ፎርቶ ብሓጎስ ተቀቢላትኒ፡ ውዕለቱ ነጊራትኒ ብዝርዝር፡

ዘይጽዓድ ጅግና ምዃኑ፡ ንህዝብና ከበስር:

ሕድሪ ሂባትኒ፡ ናይ ወዲ ዓሊ ለበዋ ክትግበር:

ሰራዊት ኤርትራ፡ ኣብ ሓደ ሰሚሩ ክጥመር:

ስቅያት ህዝቡ ኣብቂዑ፡ ደቂሱ ክሓድር።

 

ወዲ ዓሊ፡ ደላዪ ለውጢ፡ ፍትሒ፡ ዲሞክራሲ፡

ጸግዒ ውጹዓት፡ ምርኩስ መበገሲ፡

ንያቱ ዘየዕርብ፡ ኣብ ዓውደ ኩናት ቀላሲ፡

ድምብርጽ ዘይብሎ፡ ብኣድራጋ ቶካሲ፡

ከማኻስ ይሰስኑ፡ ክዓዝዝ እዚ ቃልሲ።

 

ከብቅዕ ኢዩ ኩሉ: ወዲ ዓሊ ሓወይ ቅሰን፡

ከም ኣምበሳ: ስለ ዝጓዘመ ድምጽኻ: ተሓበን፡

ምእንቲ ሓቂ ስለዝጎየኻ፡ ተደብያ ከይትድፈን፡

ይጎዩ ኣሎዉ፡ ክቅበሉኻ ሕድሪ ብዓል ሽደን፡

ኣብ ምዕራፉ በጺሑ: ክድምደም ናይ ስቃይ ዘመን።

 

ሓይልኻ ስለ ዝሓጸቦ፡ ናይ ህዝብኻ አበሳ:

መንገዲ ጸርዩ: የለን ኣብ ብሎኮ  ፍተሻ፡

እፎይ ኢሉ ኣዕሪፉ ህዝብኻ፡ ኣብቂዑ ራብሻ:

ኤርትራና እውን: ትስፍው ካባኣ ለቢሳ:

ትግስግስ ኣላ፡ ንግደት ክተርክብ ብከቢድ ማርሻ፡ ጸበል ክትካፈል: ናይ ኑዛዜ ጣዕሳ:

 

ዘለኣለማዊ ዝኽሪ ንስውኣት፡

ዓወት ንመሰል ውጹዓት፡

ውድቀት ነዚ ቀናን ስርዓት።

 

 ካብ ደላዪ ለውጥን ፍትሕን

 ማይክል ተኽለ(ብራዘር)

 ሆላንድ

23-02-2013