ካብ ኤርትራ ዝመጹ ዘለው ሓበሬታት ከምዘገንዝቡዎ፣ ስርዓት ኢሳይያስ በቲ ንህዝቢ ኤርትራ ሰላምን ቅሳነትን ምኽላእ ዝተእኾኡ ፖሊሲ መሰረት፣ አብ መላእ ኤርትራ ብቐጻሊ ከቢድ ግፋ የካይድ ኣሎ። ብመሰረት እቲ ሓበሬታ እዚ ንጸልማት ጉልባብ ጊርካ ዝካየድ ዘሎ ግፋ ዕድሜኦም ካብ 18 ዓመት ንላዕሊ ኣብ ዝኸኑ ሰባት ዝቐንዐ ኢዩ።

ካብዞም ዝግፈፉ ዘለው ሰባት መብዛሕትኦም እቶም ቅድሚ ሕጂ ሳዋን ካልእ መዓሰከራትን ንታዕሊም ወሪዶም ብዘለዎም ናይ ጥዕና ጸገማትን ስንክልናን ካብ ሰራዊት ብሓኻይም ብዘተገብረ ምጽራይ ብቦርድ ተፋንዮም ዝነበሩ ኢዮም። ኣብ ሰራዊት ብዙሕ ዓመታት ዘገልገሉ ከም ሕማም ሽኮርያ ብዝኣመሰሉ ሕዱራት ሕማማት ዝተፋነው ሓያለ ‘ውን ኣለዉዎም።

እዞም ብጸልማት ብሃንደበታዊ ግፋ ካብ መንገድን ካብ ገዝኦምን ዝውሰዱ ዘለው ሰባት ብዘይ መድሃኔት ክነብሩ ዘይክእሉ ብምዃኖም፤ አብቲ ዝኸድዎ መዓሰከራት ናይ ሞት ዕጫ ክገጥሞም ኢዩ ዝብል ስክፍታ አሎ። እዚ ዘይሓላፍነታዊ ናይ ዓይኒ የብለይ ስኒ የብለይ ስጉምቲ፣ ነቲ ድሮ ሳዕሪሩ ዘሎ ብኣጋ መንገድኻ ምጽራግ ይሓይሽ ዝብል ተስፋ ምቕራጽ ዘበገሶ ዋሕዚ ስደት ብዝተዓጻጸፈ ከምዝውስኽ ክገብሮ ምዃኑ ፍሉጥ እዩ።

ብዙሓት ካብዞም ተገፊፎም ከይዶም ዘለዉ ልዕሊ ዕድመ አቦታት፤ ደቆም ብስም ሃገራዊ ኣገልግሎት ኣብ ውትህድርና ንዓመታት ዝላደዩ ኮይኖም፣ ሕጂ ድማ አቦታቶም ይጽንበርዎም አለው። እዚ ጸረ ህዝቢ ዝኾነ ምልካዊ ስርዓት ኣብዛ ሓዳሽ ዓመት ንህዝብና ብግፋን ወረ ግፋን ረቢሹ ናብ ኣውያትን ምፍልላይን ሸሚሙዎ ምህላዉ፣ ቅሳነትን ሰላምን ህዝቢ ዘየብህጎ ሓሳድ ስርዓት ምዃኑ ደጊሙ ዘረጋግጽ እዩ።

እቲ ውድቀቱ ዝረኣዮ ዘሎ ምልካዊ ስርዓት ኢሳይያስ፣ ነቲ ክገብር ይኽእል ኢዩ ዝብሎ ክፋል ሕብረተሰብ ካብ ከተማታት ኣርሒቑ ኣብ መዓሰራት ከርዲኑ ከም እሱር ብምሓዝ ስግኣቱ ንምጕዳል እዩ ከምዚ ዝኣመሰለ ቀጻሊ ግፋ ዘካይድ ዘሎ።