ግብጺ ኣብ መሸጣ ህዋሳት ደቂ ሰብ ተዋፊሮም ንዝጸንሑ፣ ዶካትር፣ ነርሳትን ፕሮፌሰራትን ዝርከቡዎም ገበነኛታት ከምዝኣሰረት ምግላጻ ካብ ቢቢሲ ዝረኸብናዮ ሓበሬታ ኣረዲኡ።

ብመሰረት እቲ ሓበሬታ፣ መንግስቲ ግብጺ ዘዋደዶ ሓደ ጸረ ብልሽውና ኣካል  ብዝገበሮ ምንቅስቓስ ብውሑዱ 25 ገበነኛታት ኣብ ቀይዲ ክውዕሉ ከለዉ ሚልዮናት ዶላራትን ኣዋርቕን ተታሒዙ ‘ሎ።

እቲ ጸረ ብልሽውና ኣካል፣ እቲ ኣብ ዓለም ዝዓበየ ህዋሳት ደቂ ሰብ ናይ ምሻጥ መርበብ ኮይኑ ዝጸንሐ ናይ ገበነኛታት ጉጅለ፣ ንቑጠባዊ ኩነታት ድኻታት ዜጋታት ብምምዝማዝ ገንዘብ ከኻዕብት ዝጸንሐ ግብጻውያንን ኣዕራብን ዝሓቖፈ ጉጅለ  ምዃኑ ይገልጽ።

እቲ ናይ ማእሰርቲ ስጉምቲ ኣብ ግብጺ ኣዝዩ ዘሻቕል ዘይሕጋዊ መሸጣ ህዋሳት ደቂ ሰብ ከምዘሎ ንዓመታት ክዝረብ ድሕሪ ምጽንሑ እዩ መጺኡ።

ሓውሲ ደሴት ሲናይ ከም መሰጋገሪ ዘይሕጋውያን ስደተኛታት ገርጊሩሉ ኣብ ዝነበረ ቀረባ ዓመታት ብሕልፊ ኤርትራውያን ስደተኛታት ግዳይ ናይዚ በደዊን ሲናይን ራሻይዳን ዝዋስኡሉ ዝነበሩ ዘይስነምግባራዊ ዕዳጋ ህዋሳት ደቂ ሰብ ኮይኖም ከምዝተሳቐዩ ይፍለጥ።

ይኹን እምበር ራድዮ ኣሰና እትርከቦም ገለ ማዕከናት ዜናን ነቲ ጉዳይ ንህዝቢ ኤርትራን ዓለምን ንምቅላዕ ኣጽዒቖም ኣብ ዝጉስጉሱሉ ዝነበሩ እዋን፣ ብዙሓት ኤርትራውያን ኣብ ገገዝኦም ክሳብ ዝመጽኦም ከም ጽውጽዋይ ክኽሕዱዎን ክዋራዘዩሉን ፈቲኖም ዝነበሩ ኣብ ታሪኽ ኤርትራውያን ስደተኛታት ከም ጸሊም መድረኽ ዘይርሳዕ ተርእዮ እዩ።

ኣብቲ ዋሕዚ ኤርትራውያን ስደተኛታት ብሲናይ ዝረኣየሉ ዝነበረ 2010 ዓመተ ምህረት፣ ግብጺ ሓንቲ ካብተን ዝለዓለ መሸጣ ህዋሳት ደቂ ሰብ ዝረኣየለን ሓሙሽተ ሃገራት ዓለም ተባሂላ ብ ውድብ ጥዕና ዓለም ከምዝተጠቕሰት ይፍለጥ።