ግልጹነት ዘይብሉ ፖለቲካዊ ማሕበር ብመብጽዓ ጥራሕ ክንሓቚፎ ኣይንኽእልን!!

ህዝቢ ኤርትራ ንዝሓለፈ 23 ዓመታት  ብግሉጽነት ዘይኣምን በረኻዊ ምሕደራ ተረጊጹ ግዳይ ጥፍኣትን ተቐባሊ ኩሉ ጽዩፍ ምሕደራዊ ኢሳያስን ስርዓቱን ኮይኑ መንነቱን ባህሉን አብ ሓደጋ ኣትዩ እቲ ፍጥር ክብል ዝውንኖ ሃገራዊ ሓድነቱ ብሰንኪ ውሑዳት ዓንደርቲ ጉጅለ ህግደፍ ላሕሊሑ መንእሰይ ወለዶ ዓዱ ገዲፉ ተመጽዋቲ ዓዲ ሃገር ክኸውን ተገዲዱ፡ ፤እዛ ኣብ ዓራርብ ብሽም ሓፋሽ ተጋዳላይ እንዳ ሸቀጠት ዝገበለት ቁንጫል ጉጅለ ዓዲ ኣትያ ነቲ ኣብ ዓለም መወዳድርቲ ዘይብሉ ቅያ ዝፈጸመ ተጋዳላይን ህዝብን ጠሊማ በረኻዊ ምሕደርኣ ብሓይሊ ጎነጽ ኣደልዲላ እቲ ንዓመታት ዝተቓለሰ ናይ ትማሊ መንእሰይ ዳግማይ ግዳይ ስደትን ጥፍኣትን ክትገብሮ ጌጋ ናይ ታሪኽ ምርጫ ወሲዳ ጥራሕ ዘይኮነት ሃገርን ህዝብን ዳግማይ ኣብ ዘይተደልየ ኩናት ጠቢሳ ብኣሽሓት ዝቑጸሩ ናይ መጻኢ ወለዶ ተቐበልቲ ሕድሪ ሕጻውንቲ ቆልዑት ኣብ ሓዊ ከም ዝቑለዉ ጌራ’ያ፡ ፤

መሪሕነት ህዝባዊ ግንባር ናይ ሎሚ ህግደፍ ኣብ ግሉጽነት ዘይኣምን ንበይናይ ጥራሕ ዝብል ባህርይ ዘለዎ ስሱዕን ዓንዳርን ጉጅለ ስለ ዝኾነ ኣብ ጽባሕ ናጽነት ንሓፋሽ ተጋዳላይን ጀጋኑ ስንኩላንን ስድራ ቤት ስዉኣትን ክጠልም ጊዜ ኣይወሰደሉን፡ ፡ ብሽም ስዉኣትና እንዳ ሸቀጠ ሕድሮም ዘይሕሉ ኣረሜናዊ ጉጅለ ሕድሩ ጠሊሙ ንበይኑ ክነብር ዝወሰዶ ስጉምቲ ንሕና ከም ህዝቢ ድቦላ’ዩ ወዲቑና፡ ፤ኣብ ምስጢራውነት ዝኣምን ጉጅለ ዓራርብ ንሃገር ብኣልማማ ክረግጻ ዝወሰነሉ ዋና ምኽንያት እቲ ኣብ ሜዳ ከሎ ዝፈጸሞ ገበን ኣብ ልዕሊ ንጹሃት ኤርትራውያን ድቃስ ስለ ዝኸልኦ እንኮ ኣማራጺ ሓይሊ ዝብል እምነት ኣብ ኣእምሮኡ ሰሪጹ ንሃገርን ህዝብን ኤርትራ ብሕሱም ባርነት ቆሪኑ ዕድመ ስልጣኑ ከራጉድ ምርጫ ወሲዱ፡ ፤

መሪሕነት ህዝባዊ ግንባርን ሓፋሽ ተጋዳላይ ህዝባዊ ግንባርን ብባህርይ ፍልልይ ኔርዎ፡ ፤ ሓፋሽ ተጋዳላይ ወዲ ገርሂ ልባ’ዩ ኔሩ፡ ፤ እንኮ ሕልሙ ናጽነት ትብል ኣምር ሒዙ ሂወቱ ንሃገርን ህዝብን ከወፊ ኣንጊሁ ወጽዩ፡ ፤ሓፋሽ ተጋዳላይ ስልጣንን ዘውድን ኣብ ሕልሙ ኣይነበረን፡ ፤እንኮ ሕልሙ ኤርትራ ከም ሃገር ናጽነታ ረኺባ ህዝቢ ብልዕልና ሕጊ ዝግዛእ መንግስቲ ተኺሉ ነፍሲ ወከፍ ኤርትራዊ ንፋስ ሓርነት ኣተንፊሱ ተቛዳሲ ጸጋታት ሃገሩ ክኸውን ዝብል’ዩ ኔሩ፡ ፤ እታ ኣብ ዓራርብ ዝገበለት ቁንጫል መሪሕነት ህዝባዊ ግንባር ግን ሕልማ ንሳ ባዕላ’ምበር ሓፋሽ ተጋዳላይ ይኹን ሓፋሽ ህዝቢ ኣይፈለጦን፡ ፤ ንሕና ብግርህነትና ተጠሊምና፡ ፤ ምሳና ዘለዉ’ዩ መሲሉና ኔሩ፡ ፤ ኤርትራ ንኹልና ማዕረ ክትክወን’ዩ ሕልምና ዝነበረ፡ ፤ ሕልምናን ኣብ ባይታን ዝተርአ ሓቂ ግን በበይኑ ኮይኑ ረኺብናዮ፡ ፤ ኤርትራ ናይ ውሑዳት ዓመጽቲ ርስቲ ኮይና ናይ 30 ዓመታት ቃልስና ኣብ ማይ ከም ዝኣተወ ቁማር ተባሂልና፡ ፤ መሪሕነት ህዝባዊ ግንባር ኣብ ዕድልና ቁማር ተጻዊቶም መሰልናን ክብርናን መንጢሎም ግዳይ ጥፍኣትን ሞትን ክንከውን ወሲኖሙልና፡ ፡

እቲ ዘሕዝን ግን እዚ ሕጂ መንእሰይ ወለዶ ስመር ኢሉ ጀሚርዎ ዘሎ ማዕበል ንመሰረታዊ ለውጢ ዘየሐጎሶም ዕባይ ዓራርብ “ራዛ ናይ ኣብኡ ሓዛ” ኮይኑ ነገሩ እታ ናይ ሜዳ ዘይግሉጽነት ተቐኒቶም ሓዋርያ ለውጢ ኢና ክብሉ ውጥም ቅልቅል ምባሎም ዘገርም ተዋስኦ ኮይኑ’ሎ፡ ፤ ዝኾነ ይኹን ሰብ ወይ ማሕበር ንመሰልን ሓርነትን ህዝቢ ክቃለስ’የ ዝበለ መሰሉ’ኳ እንተ ኾነ ተቐባልነት ክረክብ ግን ግሉጽነት ዓንዲ ሕቖኡ ጌሩ ናብ ህዝቢ ክቐርብ ይግብኦ፡ ፤ ህዝቢ ኤርትራ በረኻዊ ምስጢራውነት ኣጽሊእዎ ሱር ነቀል ለውጢ ኣብ ዝጠልበሉ ዘሎ እዋን ዘይግሉጽነት ባህርይ ሒዝካ ኣነ መርሃዊ’የ ክትብል ምፍታን ፖለቲካዊ ነፍሰ ቅትለት ትፍጽም ከም ዘለኻ ክርድኣካ ይግብኦ፡ ፤ እዋኑ እዋን ብምስጢር እትጎዓዘሉ እዋን ዘይኮነ ናብ ህዝቢ ቀሪብካ ዝሓለፈ ሓጥያት እንተለካ ተናዚዝካን ምሕረት ሓቲትካን ካሕሳ እትኽሕሰሉ ክኸውን ኣለዎ፡ ፤ ህዝቢ ዘጽግቦ ቅጫ ይፈልጦ’ዩ ስለ ዝኾነ ከኣ ምስ ህዝቢ ብዘይግሉጽነት ኣገባብ እንኸደሉ መድረኽ ኣብቂዑ ስለ ዝኾነ ምሕባእ ምትሕብባእ ዝብሃል ሕማቕ ባህርይ ክውገድ ዘለዎ ኣጽናቲ በረኻዊ ልምዲ’ዩ፡ ፡

ኣብዚ ቅንያት’ዚ ዝርአ ዘሎ ምቅልቓል ዘይግሉጽ ፖለቲካዊ ምንቅስቓስ ከም ትምህርቲ ወሲድና ንሕና ከም ህዝቢ ምርጫና እንታይ ምዃኑ ክንውስን ታሪኽ ይሓተና’ሎ፡ ፤ ህዝቢ ሕቶታት ኣለዎ፡ ፤ክቃለስ’የ ዘዝበለ ሰብ ወይ ማሕበር ስለ ዝበለ ጥራሕ ከም ኣባጊዕ ደድሕሪኡ ክንስዕብ እንተኾይና ዳግማይ ግዳይ ክንከውን ዓቢ ተኽእሎ ኣሎ፡ ፤እዞም ዝቀላቐሉ ዘለዉ ባእታታት ትማሊ ኣብ ላዕለዋይ ጽፍሒ መሪሕነት ህዝባዊ ግንባርን ህግደፍን ዘገልግሉ ዝነበሩ ምዃኖም ዘይፈልጥ ሰብ የለን፡ ፤ ሎሚ ጉጅለ ህግደፍ ኣብ ኣፍ ሞት ኣብ ዘለወሉ እዋን ድልድል ክንሰርሓልኩም ክብሉና ከለዉ ሕቶታት ክንሓቶምን ከም ላዕለዎት ሓለፍቲ መንግስቲ ነበር ትሕተ ባይትኦም መርሚርና ብቑዕነቶም ክነረጋግጽ ግዴታ ኣለና፡ ፤ ኣብዚ ከም ኣብነት ክወስዶ ዝደሊ ጉዳይ ኣሎ፡ ፤ ሕጂ ኣብ ስልጣን ዘለዉ ንኣብነት ኣቶ የማነ ገብርኣብ፡ ሓጎስ ኪሻ፡ ኣቶ ዘምህረት፡ ወዘተ…ንመንግስቲ ጠንጢኖም ማሕበር መስሪትና ኣለና’ሞ ሰዓቡና ምስ ዝብሉ መልስና እንታይ ይኸውን? ስለ ዝበሉ ጥራሕ ከም ኣባጊዕ ክንስዕቦም ኣለና ድዩ? ህዝበይ ኣስተውዕል!! ኣብ ኤርትራ ሂወት ሓሊፉ’ሎ፡ ፤ኣሽሓት ስድራ ቤታት ንቡር ስኢነን ዝወለድኦም ደቀን ኣብ ፈቖዶ መዳጎኒ ተደርብዮም ህላዌኦም ኣይፍለጥን፡ ፡ ህዝቢ ኤርትራ ዝድብሶ’ምበር ኣብ ልዕሊ ቁስሉ ቁስሊ ዝውስኸሉ ኣይደልን፡ ፤

ልክዕ’ዩ ለውጢ ንደሊ’ለና፡ ፤ መሰረታዊ ለውጢ ዲና ንደሊ ወይስ እንኮስ ኢሳያስ ይተኣለ’ምበር ንካልኦት ምሕረት ጌርና ንኹሉ ረሲዕና ተሓድሶ መንግስቲ ክንገብር ምርጫ ምውሳድ? ኢሳያስ እንተ ኾይኑ ዒላማና ምስ እዞም ሎሚ ቅነ ድልድል ክንሰርሓልኩም ዝብሉ ዘለዉ ንሰለፍ፡ ፤ሱር ነቀል ለውጢ ንደሊ እንተኾይና ግን ዓቢ ስራሕ ኣለና፡ ፤ ዓቐበት ይጽበየና’ሎ፡ ፤ ኢሳያስ ባዕሉ ንሱ ጥራሕ ሽግር ህዝቢ ኤርትራ ከም ዘይኮነ ይፈልጥ’ዩ፡ ፤ ንሕና’ውን ሕመቕና ሸፋፊንና ጽገናዊ ለውጢ ክንጠልብ እንተ ዘይመሪጽና ሽግር ህዝቢ ኤርትራ ኢሳያስ ጥራሕ ከም ዘይኮነ ኣብ ልብና ኣላ፡ ፤ ክልተ ምርጫ ኣለና፡ ፤ እቲ ሓደ ክንቃለስ ኣይንኽእልን ኢልና ኣሚና ሕራይ ኢሳያስ ጥራሕ እለዩልና ክንብሎም ወይ ከኣ ጅግንነት ኣቦታትና ወሪስና ብሓይልና መሰረታዊ ለውጢ ክነምጽእ ንሕና ንሓድነትና ሸጥ መዓንጣና ክንብል ምርጫ ኣለና፡ ፤

ኣብ መወዳእታ ጉዕዞ ቃልስና ግሉጽነት ክህልዎ ኣለዎ፡ ፤ ስምረትናን ሓድነትናን ተቐኒትና ኩሉ ዘሳትፍ መሰረታዊ ለውጢ ክነምጽእ ህዝቢ ይሓተና’ሎ፡ ፤ መንእሰይ ወለዶ ሒዝካዮ ዘለኻ ኣገባብ ቃልሲ ንኹሉ ዘሳትፍ ኮይኑ ስምረትን ሓድነትን ህዝቢ ተሓልዩ ፊት ንፊት ተመያይጥና ብሓንሳብ እንጎዓዘሉ መድረኽ ክንፈጥር ይግብኣና፡ ፤ እዋን ሓሶትን ጸለመን ኣብቂዑ ክሉና ኤርትራውያን ተኸባቢርና ፍልልያትና ብልዝብን ተጻዋርነትን ክንፈትሕ ኤርትራዊ ባህሊ ኣለና፡ ፤ ኣብ ፖለቲካዊ ጉዕዞ ሓርጎጽጎጽን ባእስን ከጋጥም ይኽእል’ዩ፡ ፤ ከይንሰማማዕ’ውን ንኽእል ኢና፡ ፤ ኣብ ውልቃዊ ጸለመን ሓሶትን ተሸሚምና ብሓይሊ ገንዘብን ንዋትን ሰኺርና ንደለይቲ ፍትሒ ክንዕንቅጽ ዘይሓላፍነታዊ ስራሕ’ዩ፡ ፤ ኣብ ገለ ገለ ዝርአ ዘሎ ጽዩፍ ተግባራት ፎእ ክንብሎ ይግብኣና፡ ፤ ናይ ግሊ ሚድያ ወኒና ንውልቀሰባት ክነጸልመሉ ሓዲርካ ምውዓል ቅቡል ኣይኮነን፡ ፤ህዝቢ ኤርትራ ካብ ነፍሲ ወከፍና መፍትሒ ይደሊ’ሎ፡ ፤ ነፍሲ ወከፍና ግደና ክነበርክት መብጽዓ ክንኣቱ ይግብኣና፡ ፤ሕጂ’ውን ንሕና ንሓድነትና ሸጥ መዓንጣና ክንብል ትብዓት መሊኡና’ሎ፡ ፤

ፍትሒ ይንገስ

ወልዱ ተኽለ