ህዝቢ ኤርትራ፣ ክቡር መስዋእቲ ከፊሉ መግዛእቲ ብምሕምሻሽ ናጽነት መሬቱ ካብ ዘረጋግጽ 23 ዓመታት ኮይኑ ‘ሎ።  እዚ ዓቢ ዓወት’ዚ ንዘንት እለት ብኽብሪ ክዝከር ዝግብኦ ዓቢ ቁምነገር ‘ ኳ እንተኾነ፣ ምልካዊ ስርዓት ኢሳይያስ፣ መብጽዓ ጀጋኑ ኤርትራ ብምጥላም፣ ሃረርታ ህዝቢ ኤርትራ ንሓርነትን ፍትሕን ዲሞክራስያዊ ምሕደራን ብምዕምጻጽ፣ ናብ ሕሱም ባርነት መሊሱዎ  ይርከብ።

ናይ ሎሚ ዘበን መዓልቲ ናጽነት ፣ እቶም ብ3 ጥቅምቲ ኣብ ገምገም ባሕሪ ላምፐዱዛ ኣብ ሓደ እዋን ዝተቐዝፉ 367 ኤትራውያን ግቡእ ቀብሪ ኣብ ዘይረኸቡሉ፣ ስድራቤቶም ሬሳ ደቆም ስኢኖም ሰንፈላል ኮይኖም ኣብ ዘለዉሉ፣ ኣብ ርእሲ ‘ዚ ኣብዚ ቕንያት ‘ዚ፣  ሞት ኤርትራውያን ኣብ ምድረበዳን ባሕርን ዕለታዊ ኣርእስተ ዜና ዓለም ኮይኑ ንመንፈስ ኤርትራውያን ኣጨኒቑሉ ኣብ ዘሎ እዋን ትዝከር ምህላዋ ፍሉይነታ ንኹሉ ኤርትራዊ ግሁድ እዩ።

ኣብ ከምዚ ኩነታት፣ እቲ ሞትን ብርሰትን ህዝቢ ኤርትራ ዘይዓጦ፣ ‘ድሕረይ ሳዕሪ ኣይብቆላ’ ዝጭርሖኡ ምልካዊ ስርዓት ኢሳያስ፣ እቶም ብሰንኪ ንሕስያ ዘይብሉ ዓመጹ ፈቐዳ ጎረባቲ ሃገራት ተዘርዮም ዘለዉ ኣሽሓት ኤርትራውያን እናተዋረዱን እናተሳቐዩን፣ ሬሳታቶም ኣብ ሑጻ ምድረበዳ ሰሃራ እናተደፍነ ፣ ካብ ማያት ማእከላይ ባሕሪ ተዘቝቑ እናወጽአ ከሎ፣ በቲ ዝጠለሞ ናጽነት ኣመኽንዩ፣ ፍሽለቱ ንምሽፋን ኣብ ውሽጥን ወጻእን ፈንጠዝያን ዳንኬራን ከካይድ ተዳልዩ ‘ሎ።

ኩሉ ሕልና ዘለዎ ኤርትራዊ እምብኣር፣ እንተሓመቐ፣ እቲ ምልካዊ ስርዓት ኣብ ዘዋደዶ ብዓል ካብ ምስታፍ ነብሱ ብምግታእ ክዅንኖ፣ በንጻሩ ብናይ ገዛእ ርእሱ ኣገባብ ክዝክሮ፣ እንተነፍዐ ከኣ ኣብቲ ንክዉንነት ሃገርና ብዘንጸባርቕ ትሕዝቶን ቅጥዕን ዝካየድ ናይ ደለይቲ ፍትሒ ጽምብላት ናጽነት ብምስታፍ ነቲ ገበነኛ ስርዓት ክቐጽዖን ከቃልዖን ይግባእ።

ምልካዊ ስርዓት ኢሳይያስ፣ ብዘይካ ‘ቲ ኣብ ውሽጢ ሃገር ህዝቢ ቀሲቡ ዝገብሮ ጽምብላት፣ ሓያለ ደረፍትን ሙዚቀኛታትን ናብ ዝተፈላለያ ሃገራት ወጻኢ ብምውፋር፣ ንስደተኛታት መንእሰያት፣ ኣብ ልዕሊ ሬሳ ናይቶም ንቡር ቀብሪ ዘይረኸቡ ኣብ መንገዲ ገዲፎሞም ዝኣተዉ ግዳያት ከሳዕስዖም ላዕልን ታሕትን ይብል ኣሎ። ስለዚ፣ ስደተኛታት መንእሰያት ኤርትራ ብሕልፊ ንቕሓቶም ክብል ብምባል ነብሶም ካብ ስሕታን ምልካዊ ስርዓት ኢሳይያስ ኣድሒኖም ሕልናኦም ከቕስኑ ከምዘለዎም ከስተብህሉ ኣለዎም።

እቲ ብመስዋእቲ ጀጋኑ ደቂ ኤርትራ ዝተረኽበ ናጽነት ወትሩ ብኽብሪ ክዝከር ኣለዎ፣ እቲ መብጽዓ ናጽነት ዝጠለመ፣ ናጽነት ህዝቢ ኤርትራ ዝሰረቐ ሽፍታ ስርዓት ግን ኣቦ ዳስ ናጽነት ክኸውን ክፍቀደሉ ኣይግባእን። እቲ ኣብ ነጻ መሬቱ ሓርነት ዝተሓረመ ህዝቢ ኤርትራ፣ ልቡ ብቕሑሩ ልቢ በዳሊኡ ከዐግስ፣ ነቲ ገበነኛ ከቶ ከምእዘዞ የብሉን። ኩሉ ኣብ ቦትኡ፣ ኩሉ ኣብ ግዚኡ እዩ መልክዕ ዘለዎ።

ምልኪ ይፍረስ ሕጊ ይንገስ!!

ኣሰና ፋውንዴሽን

15 ግንቦት 2014